Hulyo

Kada no mansalita si Jesus odino walay gawaen to, aaligen ton lanang so panagnonot tan ugali na Ama to. (Juan 14:9) Antoy naaralan tayod saray milagro nen Jesus? Inar-aro itayon maong nen Aman Jehova tan si Jesus. Nen wadiad dalin si Jesus, inusar toy pakayari ton manggawa na milagro pian natulongan to iray totoon maniirap. Aminsan, walay duaran bulag ya mikakasi ed si Jesus ya tulongan to ra ta labay da lay makanengneng. (Mat. 20:30-34) “Akasian ira” nen Jesus kanian pinaabig to ra. Say Griegon salita ya inusar parad “akasian” et ontutukoy ed graben emosyon ya alikna nen Jesus—ansaki-sakit ed sikato ya nanengneng ton maniirap ira. Atan met so alikna nen Jesus nen pinakan to iray narasan tan pinaabig to so sakey ya aketong. (Mat. 15:32; Mar. 1:41) Antoy naaralan tayo ed saya? Nasasakitan met si Aman Jehova tan say Anak to no nanenengneng dan maniirap tayo. (Luc. 1:78; 1 Ped. 5:7) Inar-aro da tayo kanian labalabay da lan ekalen so amin ya problema ya mamapairap ed sikatayo. w23.04 3 ¶4-5

Iwasan tayo iray bagay o situasyon ya iyasingger da itayo ed tukso. Singa bilang, agtayo manbabasa, ondedengel, tan manbabantay na anggan anto ya mandutak ed isip tayo tan mantukso ed sikatayon manggawa na aliwa. Manbasa tayoy Biblia tan man-personal study tayo pian napano so isip tayo na espiritual iran bagay. Naprotektaan met so nonot tayo no lanang tayon miaral tan manpulong. No gawaen tayo iratan ya amin, im-promise nen Jehova ya ‘agto abuloyan a nipaarap tayod tukso ya agtayo nayarian.’ (1 Cor. 10:12, 13) Diad sayan kaunoran iran agew, dakel ya subok so aarapen tayo. Kanian kada agew, wala komoy eskedyul mon manpikasi ya impapuso ed si Aman Jehova. ‘Ibalikas mod sikato so amin a walad pusom’ lapud atan so labay to. (Sal. 62:8) Irayew tan pisalamatan mo ed amin ya gagawaen to. Ipikasim ya ikdan to kay pakpel ya manpulong. Agka onsasawa ya onkerew na tulong ed sikato pian nasarag mo ray problemam tan nalabanan moy tukso. On, agka komon ompapayag ya walay makasagabal ed eskedyul mon mitongtong ed si Jehova. w23.05 7 ¶17-18

Akin et mimiaral tayo? Say manunan rason et pian idayew tayoy Jehova. (Sal. 26:12; 111:1) Mimiaral tayo met pian napaseseg tayoy sakey tan sakey, lalo la ta manbibilay tayo ed sayan mair-irap ya panaon. (1 Tes. 5:11) No mankokomento tayo, nagagawaan tayo itan ya dua—nairarayew tayoy Aman Jehova tan napapaseseg tayoy sakey tan sakey. Pero ompan wala ray subok. Singa bilang, ompan nanenerbiyos tayon mankomento, odino lanang tayon mangitatagey na lima pero mataltalag tayon natawag. No oniay situasyon, antoy gawaen mo? Makatulong imay insulat nen apostol Pablo. Indanet to ya importantin “manpapasesegan itayo.” Agtayo lilingwanan ya anggan say simplin komento et makapaseseg la ta balikas itan na pananisia tayo. No atan so sankanonot tayo, nabawasan so pannerbiyos tayo. Tan anggano mataltalag tayon naturo, maliket tayo nin siansia ta walay tsansa na arum ya mankomento.—1 Ped. 3:8. w23.04 20 ¶1-3

Walay balita! Inyanunsio na ari ya amin ya Judio ya abihag ed Babilonia et sarag da lay ompawil ed Israel. (Esd. 1:2-4) Manga 70 taon met iran abihag! Seguradon si Jehova so walad benegan na sayan maong ya balita. Akin et ontan so nibaga tayo? On ta singa imposiblin nibulos ira ta agan balot ibubulos na Babilonia iray bihag to. (Isa. 14:4, 17) Pero asakop na Medo-Persia so Babilonia, tan pinmayag so balon ari ya makasempet la ray Judio ed bansa ra. Kanian walay importantin desisyonan na kada Judio, lalo la ray ulo na pamilya. Kasin ompawil irad Jerusalem, odino agla ra onalis ed Babilonia? Pero singa mairap itan ya desisyonan. Akulaw tan masiken la ray arum ya Judio kanian mairap da lay manbiahe. Ontan met, maslak ya Judio et inyanak tan binmaleg lad Babilonia. Kanian ompan atan lay ituturing dan bansa ra. Seguro no nabitla so bansan Israel, say naisip da et dalin itan na saray ninuno da. Say arum ed sikara et akapundar lay abung tan negosyo ed Babilonia, kanian ompan ansakit ed loob da ya taynan iratan, tan nayarin inisip da ya mairap so man-umpisa lamet ed lugar ya agda kabisado. w23.05 14 ¶1-2

Papasesegen itayo na Biblia ya tuloytuloy tayon ipanengneng so anos, malasakit, tan panangaro. Ibabaga na Lucas 21:19: “Diad pansungdo [o pananos] yo et niliktar yoy bilay yo.” Ibabaga met na Colosas 3:12: “Isulong yo so . . . panangabagey [o malasakit].” Tan ibabaga na 1 Tesalonica 4:​9, 10: “Imbangat kayo la na Dios ya aroen yoy sakey tan sakey. . . . Balet papasesegen mi kayo, agagi, ya itultuloy yon gawaen itan a mas nagkalalo ni.” Nen akasabi irayan panamaseseg ed saray inmuunan Kristiano, ipapanengneng da la so anos, malasakit, tan panangaro. Pero importante ya tuloytuloy dan ipanengneng iratan. Ontan met so dapat tayon gawaen. Aral mo no panon ya impanengneng na saray inmuunan Kristiano iratan ya kualidad. Tan isip mo no panon mon naalig so alimbawa ra, diad ontan et akaparaan ka la ed baleg ya kairapan. No apasal ka lan mananos natan, mas desidido kan ituloy so panaanos mo no baleg a kairapan la. w23.07 2 ¶4; 3 ¶8

Balanglan alanaan itayo o kaiba tayod ‘arum a karnero,’ importante ya itultuloy tayoy manakar ed “Dalan na Kasantosan.” (Juan 10:16) Ditan tayo naeksperiensya so espiritual ya paraiso tan atan labat so dalan pian naawat tayoy bendisyon na Panarian. Manlapu la nen 1919, milyon-milyon lan lalaki, bibii, tan ugugaw so tinmaynan ed Makapanyarin Babilonia (say empiryo na palson relihyon) tan ginmapo ran nanakar ed sayan simbolikon dalan. Nen tinmaynan iray Judio ed Babilonia, sinegurado nen Jehova ya nakal so amin ya makahadlang ed ipawil dad Israel. (Isa. 57:14) Panon met itan ya agawa ed panaon tayo? Nilasus ya taon antis na 1919, wala ray lalakin matakot ed Dios ya inusar nen Jehova pian nalinisan so dalan ya papaway ed Makapanyarin Babilonia. (Ikompara so Isaias 40:3.) Balbaleg so agawaan da pian naiparaan so “Dalan na Kasantosan.” Ditan so panakaran na saray mauyamon totoo ya ompaway ed Makapanyarin Babilonia, ta labay day mandayew ed si Jehova diad dugan paraan. w23.05 15-16 ¶8-9

Labay nen Jehova ya maliket tan mabulos tayon manlingkor ed sikato. (2 Cor. 9:7) Panon to balet no anggapo tayod mood tan kaukolan tayon piliten so sarili tayon gawaen so goal tayo? Kasin agnaliliketan si Jehova? Makala tayoy ideya ed si apostol Pablo. Oniay imbaga to: “Pepekpeken [o didisiplinaen] koy laman ko tan gagawaen kon aripen.” (1 Cor. 9:25-27, paimanod leksab) On, pinilit nen Pablo so sarili to ya manggaway duga anggano agto komon labay. Kasin aliketan si Jehova ed satan ya ginawa nen Pablo? On! Tan benendisyonan nen Jehova iray sagpot to. (2 Tim. 4:7, 8) Antoy naaralan tayo ed sayan eksperiensya nen Pablo? Naliliketan si Jehova no nanenengneng ton mani-effort tayo nin siansia ya gawaen so goal tayo anggano singa anggapo tayo ed mood. Akin ey? On ta amta to ya ginawa tayo iman lapud panangaro tayo ed sikato, anggano no maminsan et agtayo komon labay. Tan singa si Pablo, bendisyonan met nen Jehova iray sagpot tayo. (Sal. 126:5) No diman tayo nalilikna so bendisyon nen Jehova, ompan diman tayo la magmaliw ya ganado. w23.05 29 ¶9-10

Imbaga nen apostol Pablo ya saramay naderal diad agew nen Jehova et singa ra nanaugip. Agda amtay nagagawa ed kaliberliber da tan agda nalilikas so oras. Maslak ya totoo natan et nanaugip ed espiritual. (Roma 11:8) Agda natatalosan no antoy labay ya ibaga na saray nagagawa ed mundo. Ag-ira manisia ya tanda iratan ya manbibilay tayo lad “kaunoran iran agew” tan asingsingger la so baleg a kairapan, kanian agda uumanen so kabibilay da. (2 Ped. 3:3, 4) Duma tayo balet ta uunoren tayoy bilin na Biblia ya mansiansia tayon aliing tan alerto kada agew. (1 Tes. 5:6) Importante ya mansiansia tayon kalmado tan agtayo man-panic anggano dakel so mauges ya nagagawa natan. Ta no andi, ompan agtayo nalilikas et mibabali tayo la manaya ed politika tan ed saray isyu ed bansa o komunidad tayo. Legan ya manasingger so agew nen Jehova, seguradon lalon nasubok so neutralidad tayo tan i-pressure itayo na arum ya manpili tayoy panigan. Agtayo natatakot no antoy iyebat o gawaen tayo. Tulongan itayo na masanton espiritu na Dios pian kalmado tayo nin siansia, malinew so nonot tayo, tan makapandesisyon tayoy duga.—Luc. 12:11, 12. w23.06 10 ¶6-7

Antoy onlad isip mo no nabitlay ngaran ya Samson? Seguro say naisip mon tampol et amay lingkor na Dios ya mabisbiskeg. Duga met, ta kabkabat si Samson lapud ekstraordinaryon biskeg to. Pero walay desisyon nen Samson ya aliwliway nansumpalan to. Anggano onman balet, nampokus si Jehova ed saray maabig ya agawaan to tan say matoor ya impanlingkor to. Impaisulat iratan nen Jehova diad Biblia pian pakaaralan tayo. Dakdakel so makapakelaw ya agawaan nen Samson diad tulong nen Jehova. Sikatoy inusar na Dios pian natulongan iray Israelita. Anggano abaybayag lan inatey si Samson, impaipila nen Jehova ed si apostol Pablo so ngaran nen Samson ed listaan na saray lingkor na Dios ya mabisbiskeg so pananisia ra. (Heb. 11:​32-34) Napaseseg tayo ed alimbawa nen Samson. Sikatoy nantiwala ed si Jehova anggano mair-irap so situasyon. Talagan napaseseg tayo no aralen tayoy alimbawa to. w23.09 2 ¶1-2

Agtayo labat manpipikasi ed si Jehova no mair-irap so dadalanen tayon subok. Maabig no ipasal tayoy sarili tayo ya ibagad si Jehova iray pakakaaburidoan tayo anggano simpli labat iratan. (1 Tes. 5:17) Singa bilang, no aliwliway agew mo, no nai-stress ka, tan no dakdakel so iyuulom, kasin kekerewen moy tulong nen Jehova? No apasalan mo la ya si Jehova so kekerewan moy tulong anggano simpli labat so problemam, sikaton tampol so batikan mo no ondalan ka lad mair-irap ya subok. No natan ni labat et nanenengneng mo la ya tutulongan to ka diad angkekelag iran problemam, ombiskeg so tiwalam ya anggan antoy nagawa diad arapen et tulongan to ka. (Sal. 27:1, 3) No aanosan tayo la ray subok natan, mas baleg so tsansa ya naanosan tayoy baleg a kairapan. (Roma 5:3) Akin et ontan so nibaga tayo? Apatunayan la na dakel ya agagi ya kada no nalampasan day sakey ya subok, napipino ira tan ombibiskeg so pananisia ra ta anengneng dan mismo ya tinulongan ira nen Jehova. Lapud binmiskeg so pananisia da, mas ready iran arapen so antokaman ya subok ya onsabi.—Sant. 1:​2-4. w23.07 3 ¶7-8

Makatunongan si Jehova lapud mapaabeba tan walay malasakit to. Makapabilib so inkamapaabeba to nen asingger to lan deralen iray mauges ya totoo diad Sodoma. Angibaki si Jehova na saray anghel ya manligtas ed si Lot tan ed pamilya to. Say instruksion nen Jehova et diad kapalandeyan so batikan da. Pero natatakot kunoy Lot ya onla diman, kanian akikasi ya dia lad baley na Zoar so batikan da. Diad tua balet, kaiba itan ed saray deralen nen Jehova. Kasin nampasnokan nen Jehova si Lot ta mitatawalan ni? Andi. Pinagbigyan toy kerew nen Lot, tan agto dineral so Zoar. (Gen. 19:18-22) Kalabas na nilasus ya taon, impanengneng met nen Jehova so malasakit ed saray taga Ninive. Imbaki toy Jonas pian ipasabi so mensahe ya deralen To ra tan say syudad da lapud mauges ira. Pero nen nagbabawi iray taga Ninive, akasian ira nen Jehova tan agto la intuloy so panderal tod sikara.—Jon. 3:1, 10; 4:10, 11. w23.07 21 ¶5

Si Jehoas et singa kiew ya ataptapew so lamot to tan atukoran labat kanian akaalagey. No ekalen mo may tukor tan ondagem labat na daiset, magangganon natumba so ontan ya kiew. Ontan so agawa ed si Jehoas. Nen anggapo lay Jehoiada ya onsusuporta ed sikato, agangganon naimpluensiaan na saray apostata, tan tinaynan toy Jehova. Antoy naaralan tayo ed saya? Say takot tayo ed Dios et agkomon akadepende ed maong ya impluensya na saray agagi tan ed panamaseseg na saray kapamilya tayo. Kaukolan tayon pabiskegen ya mismo so espiritualidad tayo. Say panangaro tan takot tayod si Jehova et akadepende ed kuli tayon man-personal study, mandalepdep, tan manpikasi. (Jer. 17: 7, 8; Col. 2:​6, 7) Diad tua, ag-ipagawa nen Jehova so agtayo sarag. Diad Eclesiastes 12:​13, onia labat kasimpli so labay ton gawaen tayo: “Takotan moy tuan Dios tan unor mo ray ganggan to, ta saya so manunan obligasyon na too.” No walay takot tayod Dios, makapanpakpel tan makapanmatoor tayo. Nasarag tayoy anggan anton subok tan mansiansia tayon kaaro si Jehova anggad angga! w23.06 19 ¶17-19

Antis ya imbaga nen Jehova iray rason no akin ya makapantiwala tayo ed saray promise to, oniay nabasan introduksion: “Inkuan na samay akayurong ed trono.” (Apo. 21:5a) Akin et espisyal iya? Diad interon libro na Apocalipsis, taloran beses labat ya nabasa ya si Jehova a mismo so mansasalita, tan sakey iyay walad Apocalipsis 21:5. Amay nabasa tayo sirin ditan ya garantiya et ag-imbaga na sakey ya makapanyarin anghel, aliwa met ya si Jesus so mansasalita, noagta si Aman Jehova ya mismo—say Dios ya “agto nayarian so mantila.” (Tito 1:2) Ambelat itan ya rason pian panisiaan tayo imay nabasa ed Apocalipsis 21:5, 6. Kasin naimanom met ya say imbaga nen Jehova et, “Gagawaen kon balo,” aliwan “Gawaen kon balo”? Tua ya diad arapen ni nagawa iray sipan to, pero imbaga to ya singa la iratan nagagawa pian idanet ya seguradon ontua iratan.—Isa. 46:10. w23.11 3-4 ¶7-8

Wala ray nilabanan nen apostol Pedro ya kakapuyan. Singa bilang, nen imbaga nen Jesus ed saray apostol ya sikatoy manirap tan ompatey ta atan so akapropesiya ed Biblia, kinmontra si Pedro tan imbaga ton ag-itan nagawa. (Mar. 8:31-33) Paulit-ulit met ya nankolkolan nen Pedro tan arum nin apostol no siopay sankaimportantian ed sikaran amin. (Mar. 9:33, 34) Tan diad samay labi antis ya pateyen si Jesus, basta labat sinigbat nen Pedro so layag na sakey ya aripen. (Juan 18:10) Diad saman met lanlamang ya labi, adaeg na takot si Pedro, kanian amitlo ton imburi ya kaaro toy Jesus. (Mar. 14:66-72) Pagbabawian ton maong so ginawa to kanian inmakis ya ampaipait. Anggano makapadismaya so ginawa nen Pedro, inaro nin siansia nen Jesus. Nen inmoli lay Jesus, inikdan toy Pedro na tsansa ya paneknekan toy panangaro tod Katawan to. Inikdan to ni ingen si Pedro na asainmin ya pastolan iray karnero to. (Juan 21:​15-17) Mabulos itan ya ginawa nen Pedro. Diad samay agew na Pentecostes, sakey si Pedro ed saray sankaunaan ya alanaan na masanton espiritu diad Jerusalem. w23.09 22 ¶6-7

Oniay bilin nen apostol Pedro ed saray kapara ton elder: “Pastolan yoy pulok na Dios.” (1 Ped. 5:1-4) No sakey kan elder, amta mi ya inar-arom iray agagi tan labalabay mo ran i-shepherding. Pero no maminsan, ompan iisipen mo ya agmo la itan nagawaan ta busy kan maong o naksawan ka la. Antoy makatulong? Manpikasi kad si Jehova tan ibagam ed sikato ya labalabay mon i-shepherding iray agagi. Oniay insulat nen Pedro: “No walay manlilingkor, manlingkor komon ya akadepende ed biskeg ya iiter na Dios.” (1 Ped. 4:11) Siempre, wala ray problema na agagi ya aglan talagan nasolusyonan ed sayan sistema. Pero agmo komon lilingwanan ya anggano limitado labat so nagawaan mo, sarasarag iran tulongan na “manunan managpastol,” si Jesu-Kristo, natan tan anggad balon mundo. Say kekerewen met labat nen Jehova ed saray elder et aroen da iray agagi, i-shepherding da ra, tan “magmaliw [iran] alimbawa ed pulok.” w23.09 29-30 ¶13-14

No naimpluensyaan tayoy panagkatunongan na maslak ya totoo, ompan ibaliwala tayo la ray ganggan nen Jehova. (1 Cor. 3:19) Maslak ya totoo natan et gagawaen da no antoy labay da anggano amta ran kontra itan ed ganggan na Dios. Wala ray Kristiano nen inmunan siglo diad kongregasyon na Pergamo tan Tiatira ya naimpluensyaan na saray kabaleyan dan imoral tan mandadayew ed saray idolo. Sinimbawa nen Jesus irayan kongregasyon ta kokonsintien da lay seksual ya imoralidad. (Apo. 2:14, 20) Diad panaon tayo natan, maksil so impluensya na saray totoo. Ompan wala ray kapamilya o kaarom ya ibaga ran masyadon istrikto so relihyon tayo. Ompan kombinsien da ka ya ag-unoren so Biblia ta makaluma la kuno itan. Tan ayos labat kunoy manggaway imoral, basta anggapoy natatapakan mon arum ya too. Wala ni ingen iray situasyon ya ompan ‘onlampas tayo la ed saray bengatlan nisulat’ ta say pakalikna tayo et singa kulang so instruksion nen Jehova.—1 Cor. 4:6. w23.07 16 ¶10-11

Si Maria ya ina nen Jesus et kakkaukolan ton pabiskegen so liknaan to nen naamtaan to ya sikatoy manlukon anta anggapo ni asawa to. Agto ni asali so nankomis na sarili ton anak, insan say komisan to et say ugaw ya magmaliw ya Mesias. Sakey ni, panon ton ibaga ed nobyo ton si Jose ya sikatoy malukon? Panon ton napanisia ya milagro na Dios so impanlukon to? (Luc. 1:26-33) Antoy ginawa nen Maria pian ombiskeg so liknaan to? Sikatoy nampatulong ed arum. Singa bilang, nantepet ed si Gabriel pian makaala na kaaruman ya impormasyon ed asainmin to. (Luc. 1:34) Ag-abayag, linma si Maria ed “mapalandey a lugar” diad Juda pian bisitaen toy kanayon ton si Elizabet. Nen kasabi to, kinomendaan nen Elizabet si Maria tan pinakilos nen Jehova si Elizabet ya mangibaga na makapaseseg ya propesiya tungkol ed lukon nen Maria. (Luc. 1:39-45) Binmiskeg si Maria ed satan ya arengel to tan imbaga ton si Jehova et “nanggaway makapanyari iran bengatla.” (Luc. 1:46-51) On, inusar nen Jehova si Gabriel tan Elizabet pian pabiskegen si Maria. w23.10 14-15 ¶10-12

Imbaga na Biblia ya walay 144,000 ya disipulo nen Jesus ya nilanaan na masanton espiritu tan espisyal so relasyon da ed si Jehova. Sikaray manlingkor ya saserdote diad tawen kaibay Jesus. (Apo. 14:1) Diad tabernakulo, say Masanto et isisimbolo toy kipapasen da diad dalin bilang alanaan ya “ananak na Dios.” (Roma 8:15-17) Isisimbolo na Sankasantosan so tawen ya panaayaman nen Jehova. Say “kurtina” ya mangibibiig ed Masanto tan Sankasantosan et isisimbolo toy laman nen Jesus bilang too. Anggad agto ni nilakseb itan, agmakaloob diad tawen bilang Atagey a Saserdote na espiritual ya templo. Nen inyapay nen Jesus so laman to bilang dondon parad totoo, naikdan na pribilehyon manbilay ed tawen so amin ya alanaan ya Kristiano. Kaukolan da met ya lakseben so laman da pian makaloob irad tawen.—Heb. 10:19, 20; 1 Cor. 15:50. w23.10 28 ¶13

Nen kinuestion na saray Efraimita si Gideon, nansiansian kalmado tan agto la pinabaleg so isyu. (Ukom 8:1-3) Agto ira pinatolan. Amta to ya anggan sikaton mismo et aliwan perpekto. Kanian imbes ya onsyodot, dinengel toy reklamo ra tan kakkalmadon akitongtong, anggad kinmepa so petang na ulo ra. Ontan met so gagawaen na saray mapaabeban elder natan. No wala ray agagi ya manbalaw o manreklamo, kalmado iran ondengel tan mitongtong. (Sant. 3:13) Ontan so gagawaen da ta sankanonot day deen ed kongregasyon. Nen atalo nen Gideon iray Midianita, sikatoy inrayew na saray totoo, pero impaarap toy dayew ed si Jehova. (Ukom 8:22, 23) Panon ya naalig na saray elder so alimbawa nen Gideon? No walay agawaan dan marakep, bidbiren da ya agawaan da iman lapud tulong nen Jehova. (1 Cor. 4:6, 7) Singa bilang, no walay angibaga ed sakey ya elder ya agaylay dunong ton manpaliwawa, antoy ibaga to pian ag-onla ed sikato so atension? Sarag ton ibaga ya nanlapu lanlamang ed Biblia imay impaliwawa to. O ipaimano to ya amin tayo et ipapasal na organisasyon nen Jehova. Maabig sirin no isipen na saray elder no anto kasi epekto na panagpaliwawa ra. Kasin nairarayew si Jehova, o no maminsan et agda nalilikas ya ipapaarap da la manayay atension ed sarili ra? w23.06 4 ¶7-8

No agni inebatan nen Jehova so pikakasi tayo, tepetan tayoy sarili tayo: ‘Kasin duga so ipipikasik?’ Wala ray pagkakataon ya say amta tayo et parad pankaabigan tayo so kekerewen tayo, pero andi manaya. Ompan walay kekerewen tayod si Jehova ya espisipikon solusyon ed problema tayo, anta manaya et walay mas marakep ya solusyon. Tan ompan wala ray ipipikasi tayo ya aliwan “unong ed linawa [nen Jehova].” (1 Juan 5:14) Singa bilang, impikasi na sanasawan Tasi ya si Jehova lay akauley ed anak da pian makapanmatoor. Singa duga met so ipipikasi da, awa? Pero di ba, agto tayo pipiliten nen Jehova ya manlingkor ed sikato. Labay to ya sikatayon mismo so mandesisyon, balanglan adulto tayo la o kabataan tayo ni labat. (Deu. 10:​12, 13; 30:19, 20) Mas marakep sirin no say ipikasi na saray atateng ed si Jehova et tulongan To ran nasabi so puso na anak da pian naar-aro toy Jehova.—Pro. 22:6; Efe. 6:4. w23.11 21 ¶5; 23 ¶12

No liligliwaen tayo iray agagi, akin et patunay itan ya inar-aro tayo ra? Base ed sakey ya reperensya, say kahulugan na Griegon salita ya in-translate ya “ligliwaen” et “iyabay ed sakey ya too ya ondadalan ed mair-irap ya subok ta labay mon pasesegen.” Kanian no liligliwaen tayo so sakey ya agi ya onkakapuy so liknaan to, singa tayo tutulongan ya onalagey lamet pian makapantultuloy ya manakar ed dalan ya paarap ed bilay. Kada no ipalikna tayo ed sakey ya brother o sister ya agto bukbukor tan walay malasakit tayod sikato, patunay itan ya tua so panangaro tayo. (2 Cor. 7:6, 7, 13) Mankonektaan so panangasi tan pangiter na ligliwa. Akin et nibaga tayo itan? On ta no say sakey et makasi, labalabay ton ligliwaen iramay ondadalan ed irap tan subok, tan walan-walay gawaen to pian nainawaan ira. Importante sirin ya makasi tayo, ta atan so manpakilos ed sikatayo ya ligliwaen so arum. Ontan ya ontan si Aman Jehova. Imbaga nen Pablo ya si Jehova so “Ama na maaron panangasi tan say Dios na amin a ligliwa.”—2 Cor. 1:3. w23.11 9-10 ¶8-10

Ondalan ya ondalan ed kairapan so amin ya Kristiano. Si apostol Pablo et asali toy nanduruman klase na irap. Oniay imbaga tod saray agagi ed Tesalonica: “Sanen kaiba mi kayo ni, ibabaga mi lad sikayo a napairap itayo, tan agawa itan.” (1 Tes. 3:4) Tan oniay imbaga to ed saray agagi ed Corinto: “Agmi labay . . . ya anggapoy amta yo ed irap a naeksperiensya mi . . . Agkami segurado no antoy nagawad bilay mi.” (2 Cor. 1:8; 11:23-27) On, anggapo tay Kristiano ya exempted ed subok. (2 Tim. 3:12) Anto la ray dinadalan mon subok lapud pananisiam? Ompan asalim lay binalaw tan ininsulto ni ingen na saray kakaarom tan kakanayon mo. Kasin kabusol ka laingen na saray katrabahom o na mismon boss mo ta honest ka? (Heb. 13:18) Kasin diad lugar yo et kontra so gobierno ed kimey ya panagpulong? Antokaman ya kairapan so dadalanen tayo, imbaga nen Pablo ya maliket tayo nin siansia. w23.12 10-11 ¶9-10

Dakel ya problema so dinalan nen Jacob. Say duaran anak nen Jacob ya si Simeon tan Levi et walay mauge-uges ya ginawa ra ya angiter na kababaingan ed pamilya ra tan ed ngaran nen Jehova. Insan inatey so inad-aron asawa nen Jacob ya si Raquel nen inyanak toy komaduan anak da. Tan nen masiken lay Jacob, walay agawan graben eras kanian apilitan so pamilya ra ya manayam lad Ehipto. (Gen. 35:16-19; 37:28; 45:​9-11, 28) Diad amin ya dinadalan nen Jacob, sikatoy agbalot inmikban ed si Jehova tan agbalot kinmapuy so pananisia to. Kanian nanggawa na paraan si Jehova pian nipalikna tod si Jacob ya naliliketan ed katooran to. Singa bilang, sikatoy benendisyonan nen Jehova kanian yinmaman. Nanggawa met na paraan si Jehova pian makapannengneng lamet si Jacob tan Jose—amay anak to ya say amta to et inatey la! Seguradon misatsalamat ya maong si Jacob ed si Aman Jehova nen anengneng tan alakap to lamet so anak to. On, asarag nen Jacob so amin ya subok ta sikatoy tinulongan na malet ya Kaaro to, si Jehova. (Gen. 30:43; 32:​9, 10; 46:​28-30) No agka met onikban ed si Jehova, ituring to kan kaaro tan tulongan to ka pian nasarag mo ray ag-iilaloan ya nagawa ed bilay mo. w23.04 15 ¶6-7

Say Salmo 23 et kansion ya kinompos nen David. Insulat to dia so panamabli to ed pangaasikaso tan panangaro nen Jehova ed sikato. Indeskribe toy elet na pankakaaro dan dua nen Jehova ya inturing ton Pastol to. Sikatoy lanang ya akadepende ed si Jehova. Maligen so liknaan to ta say Dios so mangigigiya ed sikato. Matalek si David ya agmanguman so panangaro nen Jehova ed sikato diad interon bilay to. Akin et ontan lay kabiskeg na tiwala tod si Jehova? Lanang ya itatarya nen Jehova so amin ya pankaukolan nen David kanian agton balot alikna ya sikatoy apaulyanan. Amta to ya kaaro so turing nen Jehova ed sikato tan walad sikato so pabor na Dios. Aratan so rason no akin ya seguradoy David ya sikatoy asikasoen nen Jehova anggan antoy nagawa. Lapud amta nen David ya sikatoy inaro tan aasikasoen nen Jehova, aga aburidon maong. Malikeliket ingen, ta singa wala lad sikaton amin basta wadtay Jehova.—Sal. 16:11. w24.01 28-29 ¶12-13

Kayari na World War II, niwalay deen ed dakel ya bansa. Kanian walay kalayaan na saray Tasi nen Jehova ya manpulong. Dakel so akaamta ed katuaan tan linmawak so kimey tayo. Diad panaon tayo, saray membro na Mananguley ya Ulop et tuloytuloy ya manpapaigiya ed si Kristo. Labay dan aligen so panagnonot nen Aman Jehova tan Jesus, kanian atan so manunan ikokonsidera da antis iran mangiter na instruksion. Saratan ya instruksion et ipapadalan da ed saray manangasikaso na sirkito tan saray elder ed kongregasyon. Saray alanaan ya elder et walad “kawanan a lima” nen Kristo, tan onaplika iya ed amin ya elder ed kongregasyon. (Apo. 2:1) Pero siempre, nalilingo met iray elder ta aliwa ran perpekto. Anggan saray lalakin inusar nen Jehova nensaman et alingo met ira—singa si Moises, Josue, tan saray apostol. (Num. 20:12; Jos. 9:14, 15; Roma 3:23) Pero tandaan tayo ya si Jesu-Kristo ya mismo so mangigigiya ed matoor ya aripen tan ed saray elder, tan tuloytuloy ton gawaen itan. Mantiwala tayo sirin ed saray lalakin uusaren to ya mangidaulo ed sikatayo. w24.02 23-24 ¶13-14

No itotongtong mod arum so tungkol ed si Jehova, kasin nalikas da ya sikatoy inar-arom tan agaylay pisasalamat mod sikato? Kada no nanenengneng nen Jehova ya ontay gagawaen mo, seguradon naliliketan ed sika. No manpupulong tayo, tandaan tayo ya say gagala tayo et nakabat na totoo si Jehova, naar-aro da, tan ituring dan Ama. (Sant. 4:8) Labalabay tayon ipabasa ed sikara iray teksto tungkol ed saray balibalin kualidad nen Jehova, singa say panangaro, hustisya, karunongan, pakapanyari, tan arum ni. Nairarayew tan napapaliket tayo met si Jehova no aaligen tayo iray ugali to. No ontay gawaen tayo, napansin na totoo ya duma tayo tan ompan mankelaw ira. (Mat. 5:14-16) Diad inagew-agew ya bilay tayo, samboten tayo ray pagkakataon ya i-explain ed sikara no akin et duma tayo. Malay mo, ompan atan so rason pian labay da met lan kabaten so Dios. On, no irarayew tayoy Aman Jehova diad ministeryo tan diad inagew-agew ya bilay tayo, napapaliket tayoy puso to.—1 Tim. 2:​3, 4. w24.02 10 ¶7

Ontatken kad espiritual no manaral kay nanduruman skill. Makatulong iratan pian nagampanan mo iray responsabilidad mo ed kongregasyon, tan makalmo kay trabaho ya pansuportam ed sarilim tan walay naiderew mod pamilyam. Makatulong met itan pian maong kan mitoo. Singa bilang, aral mon maong so manbasa tan mansulat. Ibabaga na Biblia ya maliket tan maaligwas so toon inagew-agew ya manbabasa na Biblia tan dadalepdepen to iray nababasa to. (Sal. 1:1-3) No say sakey et inagew-agew ton gawaen itan, naamtaan toy paraan na panagnonot nen Jehova, nakabisado to ray prinsipyo ed Biblia, tan ibase to ditan iray desisyon to. (Pro. 1:3, 4) Diad kongregasyon, saray maespiritual ya brother so manbabangat, tan maslak et sikara so mangiiter na advice ya base ed Biblia. No mabasa ka tan apasal kan mansulat, sarasarag moy manparaan na makapaseseg iran paliwawa tan komento. Dakel met so naisulat mon mararakep ya punto pian napabiskeg moy espiritualidad mo tan napaseseg moy arum. w23.12 26-27 ¶9-11

No natatakot ka, dalepdep mo iray gawaen nen Jehova diad arapen no anggapo lay Satanas. Nen 2014 ya regional a kombension, akaaral tayo ed sakey ya demonstrasyon. Ditan et walay tatay ya diad family worship da et sinalatan to na balibali iran ugali imay nabasad 2 Timoteo 3:​1-5 pian naimadyin na pamilya to so bilay ed Paraiso. Oniay impangibaga to: “Diad balon mundo et magmaliw lan maliket tan mainaway bilay. Ta saray totoo et magmaliw a maaro ed kapara dan too, maaro ed espiritual ya kayamanan, aliwa ran mapasirayew, mapaabeba ra, idadayew da so Dios, matulok ira ed atateng da, amta ray misalamat, matoor ira, inar-aro da ray kapamilya ra, mainomay iran katalosan, maabig so ibabaga ra tungkol ed arum, walay kontrol da ed sarili da, mahinahon ira, aaroen da so kamaongan, napantiwalaan ira, mapalugar ira, ipapasen dan mas atagey so arum, maaro ira ed Dios imbes ya maaro ed panliliket, matakot ira ed Dios. Mikaaro ka ed sikara.” No kaistoryaan mo ray kapamilyam o saray agagi, kasin napantotongtongan yo so bilay ed balon mundo? w24.01 6 ¶13-14

Balibali ed liknaan ya amta tayon walad sikatayoy pabor nen Jehova bilang Tasi to! Oniay ibabaga na Biblia: “Panliliketan nen Jehova so totoo to.” (Sal. 149:4) Pero no maminsan, ompan naisip mo, ‘Siak ey, kasin inaro ak nen Jehova tan naliliketan ed siak?’ No ontan so naliliknam, agmo bukbukor. Diad tua, alikna met itan na saray matoor ya lingkor nen Jehova diad panaon na Biblia. (1 Sam. 1:6-10; Job 29:2, 4; Sal. 51:11) Anggano agtayo perpekto, sarag tayon napaliket si Aman Jehova tan naala so pabor to. Nagawaan tayo itan no ipanengneng tayoy pananisia ed si Jesu-Kristo tan manpabautismo tayo. (Juan 3:16) Atan so mangipanengneng ed saray totoo ya nagbabawi tayo lad saray kasalanan tayo tan im-promise tayo lad si Jehova ya gawaen tayo lay panlabayan to. (Gawa 2:38; 3:19) Nen indedikam so sarilim ed si Jehova tan nampabautismo ka, sikatoy apaliket mo kanian mas naar-aro to ka. No gawaen moy anggaay nayarian mon manmatoor ed sikato ya singa ed samay im-promise mo, napaliket moy Jehova tan ituring to kan kaaro.—Sal. 25:14. w24.03 26 ¶1-2

Aligen tayoy ginawa na saray disipulo, ituloy tayoy manpulong anggano patundaen itayo na gobierno. Ipikasi tayod si Jehova ya ikdan to tayoy pakpel tan karunongan. Seguradon tulongan itayo nen Jehova pian nagawaan tayoy ministeryo tayo. Ipikasim met ed si Jehova ya tulongan to ka ed saray problemam. Dakel ed sikatayo so ondadalan ed mairap iran situasyon. Singa bilang, ompan walay graben sakit tayo, nadi-depress tayo, inateyan itayo na kapamilya o kaaro, walay problema tayod pamilya, kokontraen na arum so panagdayew tayod si Jehova, tan arum ni. Anta wala la ray ontan ya problema, insan onarum ni pandemic tan guerra, doble-doble laingen so irap! No napro-problema ka, ibagam ed si Jehova so amin ya walad pusom. Mitongtong kad sikato ya singa ka mitotongtong ed best friend mo. Manmatalek ka ya “sikatoy onkiwas parad sika.” (Sal. 37:3, 5) No ondadalan tayod problema, ‘seetan tayoy manpikasi’ ta makatulong itan pian naanosan o ‘nasungdoan tayoy kairapan.’ (Roma 12:12) Amta nen Jehova iray dadalanen na saray lingkor to, tan “dedengelen to so ikekerew day tulong.”—Sal. 145:​18, 19. w23.05 5-6 ¶12-15

Antis tayon mandesisyon, dapat malinew ed sikatayo “no antoy linawa nen Jehova,” tan ditan tayo ibase so desisyon tayo. (Efe. 5:17) Panon tayo balet ya naamtaan no antoy linawa o panlabayan nen Jehova? Kailangan tayoy onkonsulta ed Biblia. Anapen tayo ditan iray prinsipyo ya makatulong ed situasyon tayo. No unoren tayo iratan ya prinsipyo, seguradon makapandesisyon tayo na duga. Labay nen Satanas ya iyupot tayoy panaon tayo ed sayan mundo pian kerakera labat so niiter tayo ed si Jehova o anggapo lan talaga. (1 Juan 5:19) No say sakey ya Kristiano et mas iyuuna to lay edukasyon, materyal, o trabaho to nen say si Jehova, pakanengnengan itan ya sikatoy naimpluensyaan la na sayan mundo. Tua, aliwa met ya mauges so manaral, mantrabaho, o nawalaan na materyal iran bagay, pero say aliwa et no atan lay manuna ed bilay tayo. Agtayon balot ompapayag ya nagawa itan! w24.03 24 ¶16-17