Pabiskegen To Ka

1. Panon ya binmiskeg iray matoor ya lingkor na Dios nensaman?

NO BABASAEN tayo ray salaysay ed Biblia tungkol ed saray matoor ya lingkor na Dios nensaman, say naiimadyin tayo et makmakpel tan mabisbiskeg ira. Pero diad tua, wala ray panaon ya kinmapuy met ira. Singa bilang, imbaga nen David ya no maminsan et sikatoy ‘mabiskeg ya singa palandey,’ pero wala met iray panaon ya sikatoy “tinmakot.” (Sal. 30:7) Si Samson et kabkabat ed ekstraordinaryon biskeg to, pero amta to ya nanlapu itan ed si Jehova. Inamin to ya no anggapoy tulong na Dios, ‘naandi so biskeg to tan onkapuy.’ (Ukom 14:5, 6; 16:17) On, si Jehova so nampabiskeg ed sarayan lingkor to.

2. Akin et imbaga nen apostol Pablo ya, “No kapigan a makapuy ak, diman ak mabiskeg”? (2 Corinto 12:9, 10)

² Binidbir met nen apostol Pablo ya kakkaukolan toy biskeg ya manlalapud si Jehova. (Basaen so 2 Corinto 12:9, 10.) Wala ray problema tayo natan ya dinalan to met. Singa bilang, wala ray inanosan ton sakit. (Gal. 4:13, 14) No maminsan et nanairapan kunon gawaen so duga. (Roma 7:18, 19) Tan wala ray panaon ya aburidon maong tan natatakot no antoy nagawa ed sikato. (2 Cor. 1:8, 9) Pero imbaga to: “No kapigan a makapuy ak, diman ak mabiskeg.” Akin et ontan so imbaga to? On ta no onkukulang lay biskeg nen Pablo, wadtan si Aman Jehova ya mangaarum na biskeg to.

3. Anto ran tepet so ebatan tayo ed sayan artikulo?

³ Im-promise nen Jehova ya pabiskegen to tayo met. (1 Ped. 5:10) Pero walay kaukolan tayon gawaen pian ikdan to tayo na biskeg. Singa onia ’tan ay: Anggano mabisbiskeg so makina na kotse, onandar labat itan no gatinan na drayber so silinyador o accelerator. Mipadpara, si Jehova et Makapanyarin-amin ya Dios tan labalabay to tayon pabiskegen. Pero wala ray kailangan tayon gawaen pian ikdan to tayo na biskeg. Anto ray uusaren nen Jehova pian ombiskeg tayo? Tan antoy nepeg tayon gawaen pian ikdan to tayo na biskeg? Pian naebatan iratan, aralen tayo no panon ya pinabiskeg nen Jehova so taloran lingkor to nensaman​—si propetan Jonas, si Maria ya ina nen Jesus, tan si apostol Pablo. Nengnengen tayo met no panon ya papabiskegen nen Jehova iray lingkor to natan.

OMBISKEG KA NO MANPIKASI TAN MAN-PERSONAL STUDY KA

4. Antoy gawaen tayo pian ikdan itayo nen Jehova na pakayari?

⁴ Pian ikdan itayo nen Jehova na pakayari to, manpikasi tayo ed sikato. Bilang ebat ed pikakasi tayo, ikdan to tayo na “pakayari . . . a mas mabiskeg nen say pakayari na too.” (2 Cor. 4:7) Ombiskeg tayo met no manbasa tayo na Biblia tan no dalepdepen tayo ray nababasa tayo ditan. (Sal. 86:11) Say mensahe nen Jehova ya walad Biblia et “makapanyari.” (Heb. 4:12) On, no manpikasi kad si Jehova tan manbasa kay Biblia, seguradon tulongan to ka tan ombiskeg so liknaan mo pian nasarag mo ray subok, agnabalang so liket mo ed panaglingkor, tan nakayam so antokaman ya asainmin. Nengnengen tayo no panon ya pinabiskeg nen Jehova si propetan Jonas.

5. Akin et kakkaukolan nen propetan Jonas so pakpel tan biskeg?

⁵ Kakkaukolan nen propetan Jonas so pakpel tan biskeg. Walay ipapagawa nen Jehova ed sikato. Pero lapud tinmakot, tinakasan toy asainmin to. Tan lapud saya, sikatoy inatey lawari ed bagyo, pati saray kaiba tod barko. Nen sikatoy imbantak na saray marino ed dayat, inakmon na balbaleg ya sira. Anto kasi alikna nen Jonas nen walad eges na sira tan agaylay bilunget? Kasin inisip to ya anggapo lay pibabali nen Jehova ed sikato tan diman la ompatey? Seguradon mapagpagan maong si Jonas tan nanlalaok lay emosyon to.

6. Base ed Jonas 2:1, 2, 7, antoy amabiskeg ed si Jonas nen walad eges na sira?

⁶ Antoy ginawa nen Jonas nen walad eges na sira? Sikatoy nampikasi. (Basaen so Jonas 2:1, 2, 7.) Anggano ag-inmunor, baleg so tiwala to ya no sikatoy manpaabeba tan magbabawi, dengelen nen Jehova so pikakasi to. Dinalepdep met nen Jonas iray abasa to ed Kasulatan. Akin et nibaga tayo itan? Diad samay pikakasi to ya nabasa ed Jonas kapitulo 2, dakel so inusar ton salita tan ekspresyon ya nabasa met ed Salmo. (Singa bilang, ikompara so Jonas 2:2, 5 ed Salmo 69:1; 86:7.) Mapatpatnag ya kabisado nen Jonas irayan salmo tan dinalepdep to iratan. Bilang resulta, binmiskeg so tiwala to ya sikatoy tulongan nen Jehova. Kanian nen inyula na baleg ya sira si Jonas ed amagan dalin, ready la ya gawaen so ipapagawa nen Jehova ed sikato.​—Jon. 2:10–3:4.

7-8. Antoy ginawa nen Brother Zhiming pian nakaya to iray subok ed bilay to?

⁷ No ondadalan tayo ed nanduruman subok, nonoten tayo so alimbawa nen Jonas. Ontan so ginawa nen Brother Zhimingb ya taga Taiwan. Anta dakdakel la lanti sakit to, aliwliwa ni trato ed sikato na saray kapamilya to lapud sakey ya Tasi. Say baleg kunon akatulong ed sikato et say pikakasi tan personal study. Oniay inamin to: “No naproproblema ak, aburido ak ya maong tan maguloguloy nonot ko kanian agak makagapon man-personal study.” Pero naynay ya mantitiwala si Zhiming ed tulong nen Aman Jehova. Oniay imbaga to: “Say gagawaen ko, manpikasi ak ed si Jehova, insan ak man-earphone tan ondengel ak na saray Kingdom song tayo. No maminsan ingen, sabayan ko tan mangansion ak ya makalna. Nagunoyan, onkalma ak la kanian onggapo ak lan man-personal study.”

⁸ Antoy epekto ed si Zhiming na pampe-personal study to? Aminsan nen kakkayari ton nampa-opera, imbaga na nurse ya abebbebay red blood cells to tan kailangan to kunoy manpa-blood transfusion. Pero diad samay labi antis na operasyon, binasa nen Zhiming so eksperiensya na sakey ya sister ya parehas iray sakit tan nampa-opera met. Inmabeba met so red blood cells to iyan sister​—mas abeba ingen nen say si Zhiming—​pero inmabig anggano aga nampa-blood transfusion. Maong labat ta binasa nen Zhiming itan ya eksperiensya. Lapud satan, binmiskeg so determinasyon ton manmatoor.

9. No makapkapuy ka lapud walay dadalanen mon subok, antoy gawaen mo? (Nengnengen met so litrato.)

⁹ No walay dadalanen mon ambelbelat ya problema, kasin ngalngali agmo amtay ibagam ed si Jehova ta maguloy isip mo? Kasin makapkapuy ka kanian anggapoy ganas mon man-personal study? Natatalosan nen Jehova so situasyon mo. Tandaan mo ya anggano simpli labat so ibagam, dengelen nen Jehova so pikakasim tan iter toy kaukolan mon tulong. (Efe. 3:20) No nanairapan kan manbasa tan manaral ta makapkapuy ka o aburido kan maong, marakep no ondengel kay audio recording na Biblia tan saray publikasyon tayo. Balibali met no dengelen mo iray kansion tayo o manbantay ka na saray video tayo ed jw.org. No manpikasi kad si Jehova tan anapen moy ebat to diad Biblia tan ed saray publikasyon tayo, iikdan moy Jehova na rason pian pabiskegen to ka.

OMBISKEG KA NO MANPATULONG KA ED SARAY AGAGI

10. Diad anto ran paraan ya napabiskeg itayo na saray agagi?

¹⁰ Uusaren met nen Jehova iray agagi pian pabiskegen itayo. No ondadalan tayod subok odino nanairapan tayo ed asainmin tayo, saray agagi so lapuan na “makapabiskeg a tulong.” (Col. 4:10, 11, paimanod leksab) Kakkaukolan tayoy kaaro, lalo lad “panaon na gonigon.” (Pro. 17:17) No onkakapuy tayo, makatulong iray agagi diad materyal ya pankaukolan tayo, pabiskegen day liknaan tayo, tan pasesegen da tayon manmatoor ed si Jehova. Nengnengen tayo no antoy ginawa nen Maria ya ina nen Jesus pian ombiskeg so liknaan to.

11. Akin et kakkaukolan nen Maria ya pabiskegen so liknaan to?

¹¹ Kakkaukolan nen Maria ya pabiskegen so liknaan to. Isip mo pay alikna to nen imbaga nen anghel Gabriel ya ilukon toy Mesias. Makapanerbiyos itan ya asainmin ta sikatoy sakey ya birhen tan anggapo ni asawa to. Agto ni asali so nankomis na sarili ton anak, insan say komisan to et say ugaw ya magmaliw ya Mesias. Ambelbelat itan ya responsabilidad! Sakey ni, panon ton ibaga ed nobyo ton si Jose ya sikatoy malukon? Panon ton napanisia ya milagro na Dios so impanlukon to?​—Luc. 1:26-33.

12. Base ed Lucas 1:39-45, panon ya pinabiskeg nen Jehova si Maria?

¹² Antoy ginawa nen Maria pian ombiskeg so liknaan to tan nasumpal toy nikadkaduma tan ambelbelat ya asainmin to? Sikatoy nampatulong ed arum. Singa bilang, nantepet ed si Gabriel pian makaala na kaaruman ya impormasyon ed asainmin to. (Luc. 1:34) Ag-abayag, linma si Maria ed “mapalandey a lugar” diad Juda pian bisitaen toy kanayon ton si Elizabet. Sulit so impanbiahe to. Nen kasabi to, kinomendaan nen Elizabet si Maria tan pinakilos nen Jehova si Elizabet ya mangibaga na makapaseseg ya propesiya tungkol ed lukon nen Maria. (Basaen so Lucas 1:39-45.) Binmiskeg si Maria ed satan ya arengel to tan imbaga ton si Jehova et “nanggaway makapanyari iran bengatla.” (Luc. 1:46-51) On, inusar nen Jehova si Gabriel tan Elizabet pian pabiskegen si Maria.

13. Antoy maabig ya resulta nen nampatulong si Sister Dasuri ed saray agagi?

¹³ Alig moy Maria. No kaukolan moy panamabiskeg, manpatulong kad arum. Asali itan nen Sister  Dasuri ya taga Bolivia. Nen nansakit na grabe so tatay to tan naospital, inako nen Dasuri so pangasikaso ed si tatay to. (1 Tim. 5:4) Pero siempre, aliwan mainomay so mangasikaso na mansasakit. Oniay imbaga nen Dasuri: “Wala ray panaon ya ngalngali ak la onsuko.” Pero anggano ontan so dadalanen to, ambaing toy onkerew na tulong. Kuan to: “Agko la labay ya abalaen iray agagi. Inisip ko, ‘Si Jehova lay akauley ya ontulong ed siak.’ Pero a-realize ko lanlamang ya no isian koy sarilik ed saray agagi, singa agak met lanlamang manpapatulong ed si Jehova ta sosoloen ko so problemak.” (Pro. 18:1) Kanian impaamta nen Dasuri so situasyon to ed pigaran kakaaro to. Kuan to: “Maong labat ta ginawak iman. Balbaleg so nitulong na saray agagi pian ombiskeg so liknaan ko. Iyaawitan da kami naakan diad ospital tan ishi-share dad siak iray makapabiskeg ya teksto ed Biblia. Amay antam ya agmo bukbukor, balibali iman ya liknaan! Parte tayo na balbaleg ya pamilya nen Jehova​—pamilya ya akaparaan ya ontulong, miakis irad sika, tan kaibam iran milaban pian nakayam so antokaman ya subok.”

14. Akin et importante ya manpatulong tayo ed saray elder?

¹⁴ Uusaren met nen Jehova iray elder pian pabiskegen itayo. Regalo ira nen Jehova ya mamaseseg tan manligliwa ed sikatayo. (Isa. 32:1, 2) Kanian no walay dadalanen mon problema, ibagam itan ed saray elder. No walay iisipen dan paraan pian natulongan ka, awat mo ta nanlapu itan ed si Jehova. Labay to ya ombiskeg ka.

OMBISKEG KA NO SANKANONOT MOY ILALOM

15. Antoy mabmablin ilalo na amin ya Kristiano?

¹⁵ Saray sipan nen Jehova ya walad Biblia et mangiter ed sikatayo na ilalo. No sankanonot tayo itan, onligsa tayo. (Roma 4:3, 18-20) Amin tayo ran Kristiano et iilaloan tayoy manbilay ya anggapoy anggaan​—maslak et diad paraison dalin tan say arum et diad tawen. No mabilabilay itan ed isip tayo, ombiskeg so liknaan tayo kanian nasarag tayoy antokaman ya subok, agtayo ontabang ed panagpulong, tan makuli tayon gampanan iray responsabilidad tayod kongregasyon. (1 Tes. 1:3) Atan ya ilalo so amabiskeg ed si apostol Pablo.

16. Akin et kakkaukolan nen apostol Pablo so biskeg?

¹⁶ Kakkaukolan nen Pablo so biskeg. Nen sinulatan to ray agagi ed Corinto, inkompara toy sarili to ed mibebetag a pananginan ya gawad pitek. Imbaga to ya sikatoy “nadedetdetan,” “nawewetwet,” “napapasegsegang,” “itutumba,” tan lanang ingen ya napepeligroy bilay to. (2 Cor. 4:8-10) Insulat iratan nen Pablo legan na komatlon impanbiahe to bilang misionero. Pero kayari na satan, mas grabe ni ran subok so dinalan to. Singa bilang, asali toy inggayugoy na dakel ya totoo, inaresto, agaygay so barkon niluganan to, tan apriso.

17. Base ed 2 Corinto 4:16-18, antoy ginawa nen Pablo pian nakaya to ray subok?

¹⁷ Binmiskeg si Pablo ta nampokus ed ilalo to kanian akaya to ray subok. (Basaen so 2 Corinto 4:16-18.) Imbaga to ed saray agagi ed Corinto ya anggano “onkakapuy so laman [to],” aliwa itan ya rason pian onsuko la. Imbes ya kasian toy sarili to, sikatoy nampokus ed arapen. Imbaga to ya say ilalo ton manbilay ya andi-anggaan diad tawen et “gloria” ya agbalot na paraan. Espisyal ya maong itan kanian sulit so panaanos to ta amta to ya seguradoy premyo to. Sankanonot ya lanang itan nen Pablo kanian sikatoy ombibiskeg o “napapasimbalo ya inagew-agew.”

18. Antoy epekto ed si Tihomir tan ed pamilya to lapud iimadyinen day ilalo ed arapen?

¹⁸ Say ilalo ed arapen so amabiskeg ed si Brother Tihomir ya taga Bulgaria. Pigaran taon lay apalabas, adisgrasya tan inatey so ading ton si Zdravko. Ansakisakit itan ya agawa kanian agaylay ermen nen Tihomir. Antoy ginawa to tan say pamilya to pian nakaya day ermen da? Iimadyinen da la kunoy nagawa no bilayen la nen Aman Jehova si Zdravko. Oniay imbaga nen Tihomir: “Paniistoryaan mi no iner mi kasi abeten si Zdravko, no anto ray iparaan min naakan parad sikato, no siopa ray imbitaan mi diad resurrection party to, tan no anto ray istoryaen mi ed sikato ya agawa diad kaunoran iran agew.” Lapud atan so sankanonot nen Tihomir tan say pamilya to, manmamatoor ira tan ag-ira onsasawan mantalaran ed isabi na agew ya bilayen la nen Jehova si Zdravko.

19. Antoy gawaen mo pian mabilabilay ed nonot mo so ilalom? (Nengnengen met so litrato.)

¹⁹ Antoy gawaen mo pian ombiskeg so pananisiam ed saray sipan nen Jehova? No say ilalom et manbilay ya andi-anggaan diad dalin, basam iray ibabaga na Biblia tungkol ed bilay diad Paraiso tan dalepdep mo itan. (Isa. 25:8; 32:16-18) Salim pan imadyinen ya wala ka lad balon mundo. Siopa ray kaibam? Anto ray narerengel mo? Antoy naliliknam? Pian onggana so imahinasyon mo, mannengneng ka na litrato na Paraiso ed saray publikasyon tayo. O manbantay kay music video tayo, singa say Nengneng Mo, Dia ed Balon Mundo, Asingsingger La, tan Imadyin Mon Paraiso La. No naynay tayon imadyinen iray bendisyon ed balon mundo, magmaliw ya “anlemew” iray problema tayo, tan na-realize tayo ya “magano” o temporaryo labat iratan. (2 Cor. 4:17) On, pabiskegen ka na ilalon inter nen Jehova!

20. No onkakapuy tayo, panon tayon ombiskeg?

²⁰ No onkakapuy tayo, tandaan tayo ya “say Dios so mangiter ed [sikatayo] na pakayari.” (Sal. 108:13) Diad tua, si Jehova lay nanggaway paraan pian makaawat kay biskeg. Kanian no akaawat kay responsabilidad, ondadalan kad subok, o nababalang lay liket mo, agka nababaingan ya manpikasi ed si Jehova tan man-personal study ka pian naanap moy ebat to. Manpatulong kad saray agagi tan i-appreciate moy panamaseseg da. Imadyin moy ilalom diad arapen pian mabilabilay itan ed nonot mo. No gawaen mo iratan ya amin, ‘makaawat ka na baleg a pakayari unong ed maglorian pakayari na Dios pian sigpot kan makapansungdo a walaay anos tan liket.’​—Col. 1:11.