Saray Kaugalian o Prinsipyo na Biblia—Dinan So Manguuley ed Bilay Yo?
SAY lakin Hapones a binmisita ed sananey a dalin ed Asia so ninmengneng ed impakakigtot diad agpakapanisia. Say anankaili ed sikato, ya inusar toray dilin chopsticks to, so angala na karne ed plato, a pinili to so sankarakpan, tan insan to inkarga ed plato na sankaili a nankarga na niluto! Diad Hapon, saya so impasen a mabanday ya ugali. Anggapo so mangusar ed saray dilin chopsticks to a pangala na tagano ed plato likud no saray chopsticks so ununan balinsueken ta pian say sampot ya insubo la ed sangi so agmaniwit ed tagano. Ingen say anankaili so peteg a manaanap lambengat na pamagalang ed sikato, aliwan pamasakit. Say ag-inisip ed Hapon so tanda na panagrespeto ed sayan dalin!
Agaylan manduruma so kaugalian! Agaylan aliwan makana so dakel iran kaugalian! Tan siopa so makapangibaga no dinan so sankaabigan? Anggaman kuan, arum iran kaugalian so nibase ed saray anito odino palson bangabangat. Para ed saramay saray konsiensia ra so nipasal ed Biblia, saratan a kaugalian so malinlinew a paliisan. Anto so ontulong ed sakey a manpilalek a mamaliket ed Dios diad pandesidi no dinan iran kaugalian so nepeg a tumboken tan diad anton kalaknab? Say panumbok ed saray prinsipyo na Biblia so makatulong, para ed sakey a Kristianon awaten to so Biblia a bilang estandarte to anggaman iner so panaayaman to.
Panangiyaplika ed Saray Prinsipyo na Biblia
A say Salita na Dios so walaan na baleg a pakayarin onkiwas ed mapaabeban puso na sakey a too tan mangitarok ed bilay to a nagkalalon mitukoyan ed dalan na Dios so niparungtal a malaknab. Imbaga nen apostol Pablo a saray Kristiano ed Tesalonica so angawat ed Salita na Dios “a simamatua, bilang salita na Dios, a mankikimey met ed sikayo a mananisia.” (1 Tesalonica 2:13) Satan a Salita so ontan lan mabiskeg, a singa ituturo na 1 Corinto 6:9-11, ya amakiwas ed dakel diad kadaanan a Corinto, a bantog ed karutakan ed moral, so anaynan ed saray datin kurang na panagtakew, pilalawanan, panagbuanges, tan homoseksualidad. Kasin say Salita na Dios so mankikimey ed sikayo? Kasin saray prinsipyo to so manguuley ed bilay yo a sankalaknaban, a gawaen to kayon makatebek ed no anto so gawaen sano nidunget ed lokal iran kaugalian?
No maminsan et mapatnag a say sakey a kaugalian so direktan misumlangan ed saray prinsipyo na Biblia. Diad ontan iran kaso et say sakey a mikabat ed saray estandarte nen Jehova tan manpilalek a mamaliket ed sikato so ompaliis ed saratan a kaugalian. Alimbawa, say kaugalian et nayarin say panagpool na insenso diad panangiponpon pian napaliket so inatey odino say tinmaynan a “kamarerwa” to odino pian iter ed sikato so maabig ya impamasipot tan gawaen so “kamarerwa” to a maliket. Odino nayarin saray modelo na abung, TV, kotse, tan arum nira, so poolan diad panmoria na pangiter ed sikato na panliket ed espiritun ayaman. Anggaman kuan, say sakey a Kristianon manisia ed balikas na Biblia a saray inaatey “so andian na pakalikna a balot” so mikabat a saray ontan a gawa so nibase ed saray palson sisisiaen tan sirin saratan so paliisan.—Eclesiastes 9:5, 10; Salmo 146:4.
Anggaman kuan, sano say sakey ya ugali so aliwan direktan manumlang ed saray prinsipyo na Biblia noagta gawaen to lambengat a mairap so panlingkor ed si Jehova a Dios a nagnap, mairap ya igeter so totontonen tan ipanengneng a saray prinsipyo na Biblia so manguley ed bilay yo. Say atagey a panangipasen ed edukasyon tan materyal ya aligwas, legay-bilay a panagpauley ed saray atateng, tan say panagpili na atateng ed asawaen so sakey ed malaknab a kaugalian a mangaapekta na relasyon na sakey ed si Jehova. Panon so nayarin kiyaplika na saray prinsipyo na Biblia ed saray kipapasen a singa saraya?
[Litrato ed pahina 3]
Pinoolan iran modelo diad sakey a ponpon