Akin ya Ontan lan Kabayag a Naresolbe so Salisalan?

DIAD apalabas a 6,000 taon, say inkasoberano na Dios so aliwan salisalan. Diad impanompleto to na makapakelaw iran kimey na inkapalsa, “anengneng na Dios so amin a bengatla a ginawa to tan, nia! maong a tuloy.” (Genesis 1:31) Insan sikato sirin so linmoob ed andukey a panaon na “painawa”; aliwa, siempre, a sikatoy pisikal a naksawan. Imbes, sikatoy nanpainawa salanti sikatoy tinmunda ed panamalsan kimey to ed dalin, matalek a say maabig a gagala to nipaakar ed saraya so kompleton matalona.​—Genesis 2:1-3; Isaias 55:11.

Anto itan a gagala? Impasen nen Jehova so inmunan sanasawan too ed sakey a pasen a tinawag a hardin na Eden. Say ununan kimey da so manasikaso ed paraison ayaman da, a pati dakel a nanduruman bilay na ayayep. Ontan met, sikaray manilalak tan manpabaleg na saray anak. Diad dugan panaon, unong ya ombaleg so pamilya ra, sikaray mamalaknab ed Paraiso ed kasampotan na dalin diad itulok ed ganggan na Dios a ‘patuloken so dalin.’ Sirin, agmanbayag say dalin so magmaliw a marakep ya ayaman, napnoan na liket, nankakasakey a pamilya a manlinkor ed mangatatawen ya Ama. Satan so orihinal a gagala na Dios.​—Genesis 1:27, 28; 2:8, 15, 20-22.

Kasin si Adan tan si Eva et mibiang ed panumpal ed sayan engraden gagala ya anggad kasumpalan to? Satan so mandepende ed pantultuloy dan mikoopera ed satan diad katutulok ed Amalsa ra. Say katutulok da so aliwan bulag, agmaniisip. Sikaray naitdan na bulos a linawa, ta labay na Dios a manlikor ira a manlapud manamablin puso ra. Bilang nanengneng a panonot ed makanepegan ya inkasoberano to, angitarok na sakey a simplen subok. Nayarin kanen da so antokaman a probisyon ed hardin nilikud ed sakey. Wala so sakey a bunga na kiew a nipaakar ed satan et inkuan na Dios: “Diad agew na pangan yo manlapud satan sikayo so ompatey.”​—Genesis 2:16, 17.

Ibaga na sarayan salita ed sikatayo a si Adan tan si Eva so aliwan apalsan ontatken tan ompatey. Onsabi lambengat so ipapatey no sikaray ontunganga ed simplen ganggan. No nansiansian tinmulok si Adan tan si Eva ed Dios, sikara nin siansia so mabilay ed dalin natan bilang ateng na sankamundoan a pamilya na ayadyarin ananak.​—Nengnengen so prinsipyon asalita ed Salmo 37:29.

Anggaman ontan, sakey ed saray anghelikon palsa na Dios, a natan et tinawag a Satanas, so nambalaw ed dalan na panguley na Dios. Sinagyat to si Eva a mangan na insebel a bunga, sipapalikdon angipanengneng a diad pagmaliw ya independenti ed inkasoberano na Dios, sikato so magmaong. Say peteg a gagala nen Satanas, anggaman kuan, say pilalek a magmaliw a dios ed say iilaloan a pamilya na katooan.​—Genesis 3:1-5; Mateo 4:8, 9; Juan 8:44.

Lapud walan inter nen Jehova ed inmunan sanasawan too so amin a bengatlan kaukolan da, amenben komon si Eva ed inkasoberano to tan inkaindan to so sititilan suheri nen Satanas. Makapaermen, inlolot to tan inkaindan so ganggan na Dios. Kayari na satan, pinili nen Adan so akiulop ed asawa to ed agmakabat a kundang to. Sirin say nansarilin-linawa a sanasawa, tan ontan met ed si Satanas, so nanrebelde a sumpad Dios, tan say salisalan na madibinon soberanya so linmesa.​—Genesis 3:6.

Panaon a Nakaukolan ed Pangareglo na Makana Iran Salisalan

Nayarin dineral a tampol nen Jehova iray taloran rebelde diad saman tan diman. Balet satan so agmangareglo ed saray tepet a linmesa ed impanrebelde da. Kasin nauleyan na too so inkasikaton matalona nilikud ed Dios? Kasin hustisya ed biang na Dios ya onkerew na pamasakup ed inkasoberano to? Niarum ni, nisengeg ed kondukta na inmunan sanasawa, kasin siopaman a too so andi-siblet a manpili a manlinkor ed Dios ed dilin bulos a linawa ra​—anggan sano nasubok nen Satanas? (Job 1:7-11; 2:4) Nakaukolan so panaon pian ebatan irayan tepet. Ontan met, nakaukolan so panaon, pian natalonaan iray epekto na orihinal ya impanrebelde tan sumpalen so gagala na Dios a gawaen so dalin a paraison atooan na andi-kasalanan a rasa na katooan. Sikatayon siansia so manalagar na pinal a resolusyon na sarayan salisalan.

Mitunosan ed ganggan to, inekal na Dios a manlapud si Adan tan si Eva so pribilehyon manbilay ed ando lan ando. Sikaralay agmakanan mibiang ed panumpal na baleg a gagala to. Anggaman ontan, sakbay iran inatey, sikaray naabuloyan a manilalak tan manpabaleg na ananak. Tua, si Adan tan si Eva so agla makapangipatawir ed ananak na mabiskeg, andi-kasalanan a bilay. (Roma 5:12) Balet anggaman a saray ontombok a kailalakan so nianak ya ag-ayadyari tan ompatey, dakel iran sinansakey so walaan na pankanawnawa a mangipanengneng no iner so talindeg da no nipaakar ed baleg a salisalan na inkasoberano.

Panresolbe ed Salisalan

Panon a relsolbien na Dios irayan bengatlan nisiglaot ed inkasoberano to? Diad sakey a sentido say tepet a linmesa ed Eden so naebatan la natan. Saray nilibon taotaon na awaran na too so nagawan makapasakit a mapatnag a say kuan nen Satanas a si Eva et magmaong ed panindependiente ed Dios so tila. Say uley na too a mangiburi ed Dios so walan nantultuloy a sinmaew. Unong ya ikuan na Biblia: “Uleyan na too so kaparan too ed dilin kaugsan to.”​—Eclesiastes 8:9.

Diad biek a dapag, dakel iran maabig a bengatla so walan dinokumentoan legan na andukey iran taon nanlapulad impankasalanan di Adan tan Eva. Dakel ed katooan so walan angidemostra ed agnabuyak ya inkaapit ed inkasoberano nen Jehova, say sankamanunaan ya alimbawa et “say Anak na too,” si Jesu-Kristo a mismo. (Mateo 20:18; Hebreos 11:1–​12:3) Saramay tinmonbok ed saray ganggan na Dios tan amidbir ed inkasoberano to so walan akaromog a saya so peteg a sankaabigan a dalan. Walan naeksperiensia ra so katuan na uliran a: “Say bendisyon nen Jehova​—satan so mamayaman, tan agmangarum na irap ed satan.” (Uliran 10:22) Niarum ni, misalamat ed probisyon na kioli, agmanbayag et sikaray mibiang ed panumpal na engraden gagala na Dios.​—Juan 5:28, 29.

Ag-alingwanan nen Jehova so orihinal a gagala to. Saramay mangipulisay ed inkasoberano to so agnaabuloyan a manuley ed dalin ed amin a panaon, tan ipasakbay na Biblia ya asingger lan onakto so Dios a sumpad sikara. Nabasa tayo: “Say sanok na Dios so niparungtal a manlapud tawen a sumpad amin na agmaridios.” (Roma 1:18) Sayan onsasabin balikas na sanok na Dios, a tatawagen na Biblia ya Armagedon, so agmanduwaruwan mangidemostra a sikatoy peteg a wala. Saraman lambengat so mangawat ed inkasoberano to so makaliktar ed satan ya ebento. “Saray maptek so manayam ed dalin, tan saray andi tilol so mansiansia. No nipaakar ed saray marelmeng, sikaray napegpeg a manlapu ed mismon dalin.”​—Uliran 2:21, 22.

Say Baleg a Salisalan tan Sika

Nipaakar ed sarayan katuaan, balang sakey ed sikatayo​—a singa ed si Adan tan Eva​—​so nepeg a manpili. Kasin salien tayon manbilay ya independiente ed Dios? O Kasin sikatayoy pauleyan ed inkasoberano to? Nonoten, saya so sankamakanaan a salisalan a kidudungetan tayo natan. Saray arum a salisalan, ompatnag man ya importante, so misiglaot ed kaplesan a bilay yo. Saya so mangapekta ed andi-anggaan a bilay. Say desisyon a gawaen yo so mangapekta ed andi-geter ya arapen yo.

Panon yon ipanengneng ya awaten yo so inkasoberano na Dios? Diad panamegley na magunaet a panaral na Salita to, say Biblia, tan pantultuloy ya ontumbok ed linawa to a mikasakey ed arum a tua iran Kristiano. (Sofonias 2:2, 3) No gawaen yo so ontan, nawalaan kayo na maliket ya ilalo ed pakanengneng na panumpal na engranden gagala na Dios. Nanengneng yo so pakabidbiran na sayan makapakelaw a sipan: “Ta wala ni so daiset et say bagel onandi . . . Ingen ta saray mauyamo tawiren da naani dalin, tan manliket ira ed dili ed inkadaakan na kareenan.” (Salmo 37:10, 11) Agaylan makapelaw a resulta ed amin a pasakup ed inkasoberano na Dios! Agaylan mabiskeg a rason parad makabat a mandeside ed sankaimportantian a bengatla!