Manalwar ed Saray Palson Propeta!

SAKEY a sanasawan taga-Brazil so dinmukol pian onugip sanen nadngel daray matakew ya onloloob ed ayaman da. Say ataktakot a sanasawa so akabatik diad indalan ed bentana na kuarto tan anawag na pulis. Balet kayari to say asawan bii so ontanlan naermenan ed saman ya eksperiensia ya agmakaugip tan nakaukolan a sikato so onla’d abung nen ina to.

Siopaman a walan alooban odino atakewan ed arum a dalan et miabagey ed sikato. Say ontan ya eksperiensia so makapanerbiyos, tan, makapaermen, ya ondarakel nin totoo so maniirap ed sayan dalan. Anggaman ontan, wala so sakey a nengneng na panagtakew a walaan na lalon seryoson pansumpalan.

Anto iyan seryoson tuloy a nengneng na panagtakew, tan siopa iray matatakew? Angiter si Jesus na pigaran impormasyon ed sikatayo nipaakar ed atan sanen, sasalitaen to so nipaakar ed agew tayo, inkuanto: “Onlesa iray dakel a palson propetas tan palikdoen da so amayamay.” (Mateo 24:11) Saray palson propetas et matatakew. Diad anton dalan? Anto so tatakewen da? Say panagtakew da so misiglaot ed panagpropesiya ra. Kanian ta pian nagnap a talosan so pamaakaran, nakaukolan tayon amtaen ya ununa no anton panagpropesiya so unong ed Biblia.

Anto so Kabaliksan na Panpropesiya

Sano nononoten yo so panagpropesiya, palagi say ununan nanonotan yo et say panangipasakbay ed arapen. Peteg a saya so sakey a nengneng na kimey na saray propeta na Dios nensaman, balet aliwan atan so manunan kimey da. Alimbawa, nibaga ed si propeta Ezequiel diad pasingawey a “manpropesiya ed dagem,” simplin sikato so mangiter na ganggan a nanlapud Dios. (Ezequiel 37:9, 10) Sanen si Jesus so nabibista ed arap na saray saserdote, sikato so nilutdaan tan tinampal, tan nanludlurey a nankuan iray managpasegsegang to: “Ipropetam ed sikami, sika Kristo. Siopa so angabil ed sika?” Agda kekerewen ya ipasakbay nen Jesus so arapen. Sikato so aangaten dan mangituro ed saramay angabil ed sikato diad panamegley na pakayari na Dios.​—Mateo 26:67, 68.

Diad tua, say manunan kanonotan ya imparungtal na orihinal a lenguahe iran salita ed Biblia so nipatalos ya “ipropeta” odino “propesiya” so manunan mangibaga ed kanonotan na Dios nipaakar ed sakey a pamaakaran odino, unong ya ipanengneng na libro na Gawa, a mangibaga ed “makapakelaw iran gawa na Dios.” (Gawa 2:11) Diad sayan pantalos a dakel a totoo so natatakewan na saray palson propeta.

Sirin, siopa iray palson propeta, tan anto so tatakewen da? Pian naebatan iyan tepet, nengnengen tayo so abenegan ya awaran na nasyon na Israel ed panaon nen Jeremias.