Saray Patalos na Biblia ed Aprikano

Say sankasakbayan iran patalos na interon Biblia ed Aprikanon lenguahe so ginawa diad Ehipto. A kabkabat bilang saray bersyon ed Coptic, sikara so sinisian manpetsa manlapud komatlo odino komapat a siglo K.P. Ngalngali taloran siglos ed saginonor, say Biblia so nipatalos ed Etiopic.

Saray nilasus ya agnisulat iran lenguahen sasalitaen ed abalaten na Etiopia tan Sahara so kaukolan a manalagar ed isabi na saray misionero diad koma-19 siglo. Nen 1857 adampot so iyaaligwas sanen kinumpleto nen Robert Moffat so patalos na Biblia ed Tswana, sakey a lenguahe ed mamaabalaten ya Aprika. Sikato met so angimprinta ed atan ed balang-kabiangan diad ipapakurang-na-liman imprintaan (handpress). Saya so unaan a kumpleton Biblia a niimprinta ed Aprika tan unaan met a kumpleton patalos ed datin agnisulat ya Aprikanon lenguahe. Makapasagyat, inusar nen Moffat so madibinon ngaran a Yehova ed patalos to. Diad 1872 a bersyon ya impalapag na British and Foreign Bible Society, say ngaran a Yehova so inusar ed manuna iran balikas nen Jesus a singa nikurit ed Mateo 4:10 tan Marcos 12:29, 30.

Diad 1990 say interon Biblia so nipatalos ed 119 Aprikano iran lenguahe, tekep na saray kabiangan na atan a wala la ed kaaruman nin 434.