Report na Saray Manangiyabawag na Panarian
Naaralan na Kalangweran a Mahilig ya Onlugan ed Tren so Katuaan
NO SAY puso na sakey a too so onkiling ed inkatunong, sirin si Jehova a Dios, diad pangusar ed si Kristo Jesus tan saray mangatatawen ya anghel, so onkiwas pian satan a malakarneron too so makaamta’d maong a balita na Panarian. Diad nigetar a panaon satan a too so ondapag ed naabobonan a nikawanan nen Jesus. (Mateo 25:31-33) Saya so agawa ed sakey a kalangweran diad Austria a mahilig ya onlugan ed tren ya akaamta ed katuaan diad nikadkaduman dalan.
Say sankasayaksakan a kabiangan na hilig na sayan balolaki et say ilugan ed kab na saray makina na tren (locomotives), diad panangiyabuloy na manangipakurang na tren. Irerekord to so kada biahe ed video camera to ta pian nabantayan itan diad isabi’d ayaman to. Diad aminsan a panbabaroy to manlapud Vienna a mamaarap ed Salzburg, say inhinyero na tren so sakey ed saray Tasi nen Jehova. Inanamot to so pankanawnawa pian ibalita so nipaakar ed Panarian diad samay mahilig ya onlugan ed tren. Diad inmuna say balolaki so nikelawan ed pakadngel a say inhinyero so mangisasalaysay nipaakar ed Dios tan say Biblia, balet legan na panbibiahe, sikato so nanimanon tuloy ed marakep a nenengnengen nen say ibabaga na say inhinyero ed sikato.
Kasabi to’d abung, aglabat aminsan noagta aminsamplon danay a binantayan na sayan balolaki so inrekord toran nenengnengen ed video, unong ta sikato so interesadon maong ed sayan impanbaroy. Lapud ta nirekord to met so tanol, naulit-ulit ton arengelan so imbaga ed sikato na say Tasi. No lalon babantayan to so video, sikato so nagkalalon magmamaliw a pamilyar ed nibaga ed sikato. Diad saman ginapoan ton ninonot iman, tan diad kaunoran et sikato so nagmaliw ya interesado ed makapakelaw ya impormasyon a nanlapud Biblia. Kaliktan to ni so mangamta na malaem.
Anonotan to so ngaran na inhinyero tan kabat ton sikatoy manaayam ed Vienna. Kanian sikato so linma’d post office tan angidayal na dakel a numero ed telepono ya akalista’d silong na saman a ngaran ed direktoryo. Say tepet to’d saramay oneebat ed telepono so: “Inhinyero kayo na tren?” No say ebat so andi, sikatoy ontawag lamet ed sananey a numero. Diad kaunoran, aromog to so inhinyero. Inestorya to’d sikato so agawa tan inkuanton sikatoy interesado’d mensahe na Biblian nadngelan to diad video.
Say Tasi so nanggawa na saray oksuyan diad panamegley na sangan opisina pian bisitaen na sakey a manaayam ya asingger ed balolaki. Nibanbana a diad lokal a kongregasyon et walay sananey nin Tasi a sakey met ya inhinyero na tren. Sayan komaduan inhinyero so binmisita’d mahilig ya onlugan ed tren tan nigapo so panagaral na Biblia. Diad tiagew na 1991, say balolaki so abautismoan.
Talagan anengneng nen Jehova, a manguusisa ed amin a puso a sayan too et walaan na masimoon a panangaro ed inkatunong. Kanian, sikatoy intarok to a makapikabat ed katuaan na Biblia—anggaman diad nikadkaduman dalan.—1 Awaran 28:9; Juan 10:27.
[Picture Credit Line ed pahina 9]
Courtesy of the Austrian Railways