Sakey a Mundon Andian na Saray Matakew

AGAYLAY peles na agawa. Sakey ya amisteng a laki so nanpatuyong na paltog ed ulo nen Antônioa ed arap na ayaman to ed São Paulo, Brazil, kinerew iray tombok tan papeles na kotse to, tan tamtampol ya inmalis.

Diad Rio de Janeiro, diad imaton na samploy-taon ya anak ton bii, apatiran armadon lalaki so nandakep ed sakey a lakin manngaran na Paulo. Insan, kayari inlugan ed kotse tan makasabi ed ayaman to, saray matakew so linmoob tan tinakew da so antokaman a labay da, a napno so duaran kotse nen Paulo. Tinaktakot dan pateyen so asawa nen Paulo, sikato tan sakey ed empleado so inala ra bilang pinagka-hostage tan amaarap ed panaglakoan nen Paulo na alahas ed baley, ya inala ran amin so angkablin bengatla diman. Anggaman ontan, ag-inilaloan, diad saginonor et nantelepono iray matakew pian ipakabat no iner so angitilakan daray kotse.

Talagan makapadismaya so pakatakewan na kuarta tan bengabengatlan nanirapan! Anggaman si Antônio nisay si Paulo so agbinmawi, saray arum so kinmiwas ed inkasikaran dili ya aliwan unong ed ganggan. Ompan napatey da ni ingen, odino nabaldado so matakew, odino ompan nabalang da ni ingen so mismon bilay da. Alimbawa, sanen sakey a malangwer so anamsam ed relo to, say mansyodot a biin taga Brazil so angipaway na paltog ed bag to tan pinaltog to so matakew a sengegay impatey to. Say resulta? Isasalaysay na O Estado de S. Paulo: “Saray akatasi ed agawa so nandinayew ed awawey na agkabkabat a bii, tan anggapo so malabay ya ontulong ed pulis a mangipabidbir ed sikato.” Anggaman panpipirawatan da so mundon andian na saray matakew, saray Kristiano so ag-ombales a singa ginawa na saman a bii. Lapud say panangibales so kien na Dios, tutumboken daray salita na Uliran 24:19, 20: “Agka napasnokan nisengeg ed saray managgawa na mauges; agka met onsiblet ed saray marelmeng. Ta angapo so tumang ed mauges a too.”

Balet no inataki, anto so nayarian mon gawaen? Ipapanengneng na sakey ya insidenti ed Rio de Janeiro so kaimportantian na pansiansian kalmado. Sakey a Kristianon bii, si Heloi̇́sa, so akalugan ed bus a mamapaarap ed iyaaralan to na Biblia. Ginapoan na duaran lalakin takewan iray pasahero. Diad insabi luluganan ed kaukolan ton epasan, imbaga nen Heloi̇́sa ed sikara a sikatoy sakey ed saray Tasi nen Jehova tan sikato so kaukolan a mangikondukta na panagaral na Biblia. Impanengneng to’d sikara so Biblia tan say katulongan ed panagaral. Sikatoy inabuloyan na saray matakew ya onepas ya agtinakewan. Balet, sakey a pasahero so ag-inabuloyan ya onepas. Inkuan na drayber ed saginonor ya agto nin balot akanengneng na singa onman.

Si Regina so nansiansian kalmado met sanen sikato so dinagdag na duaran armadon lalakin onlugan ed kotse to. Diad impangipanengneng na personal a kopya ton magasin ya Awake!, nampulong si Regina. Lapud saray matakew so mannerbyos, kinerew to’d sikaran lukasan da so compartment ya anginan to na pigaran kendi. Balet diad impakanengneng na saray cassette tape a Kingdom Melodies, dinengel da so musika. Lapud nagmaliw a mas makaaro so kipapasen, deniside na saray matakew ya itilak si Regina ed highway ya ag-apasakitan, ya impaseguro ed sikaton sikatoy makaromog na mapangasin toon ontulong ed sikato. Kayari impanakar to na samploran minuto, sikatoy akaromog na sakey ya abung, balet say unabong so agmanisia ed estorya to, ya inkuanto: “Agmo nengneng so inataki; sika so kalmadon tuloy.”

Anggaman say sakey a biktima so nayarin agkinabil, say ontan a makapakebbiew ya eksperiensia so walaan na seryoso iran epekto. ‘Say biktima so nayarin manlikna na ag-inkaligen, maunganget ed saray membro na pamilya odino ed saramay manggugunaet ya ontulong ed sikato, agmakapanmatalek ed arum, masibeg ed pangorganisa na saray detalye, a liknaen ton say mundo so andian na hustisya,’ unong ed report na O Estado de S. Paulo. Diad kasuniyan, say sakey a biktima a manmamatalek ed si Jehova a Dios so mas maseguron makalegyas ed eksperiensia ya ag-apasakitan ed pisikal tan emosyonal. Anggaman kuan, agka ta mipakna a magmaliw a bendisyon no anggapo la so krimen nisay antokaman a sengegay itakot?

“Saman so Nantatakew nen Saman ag Komon la Mantakew”

Anggaman mas kaliktan na dakel so sinisiblet ya estiloy-panagbilay da, say Salita na Dios so tinmulong ed saray matakew ya umanen daray pilalek tan personalidad da. (Efeso 4:23) Walaan na peteg, nibased-Biblian gagala na bilay, tutumboken daray salitan: “Magmaong so melag, a tekep na inkatunong, nen saray belag [baleg] ya abang a tekep na inkapikewet.” (Uliran 16:8) Onia so salaysay nen Cláudio: “Ngalngali amin a membro ed pamilyak so Tasi, balet agko dedengelen so ibabaga ra nipaakar ed si Jehova tan saray gagala to. Diad ipawil ko manlapud sakey a biahen ngalngali 1,200 a milyas ya akalugan ed sakey a tinakew a pickup, siak so dinmalan ed dakel a checkpoint na pulisya. Diad satan ya agawa amoriak a kaukolan kon pasimbaloen so panagbilay ko. Sakbay na saya et sinalik lan ginawa itan balet ta agak tinmalona. Natan et anonotan ko so nipaakar ed kakanayon kon Tastasi nen Jehova ya agaylan sikaray duma, walaan na gayaga, liket, tan deen.” Bilang nansumpalan, ginapoan nen Cláudio so manaral na Salita na Dios, tinmunda ed panagdruga tan ed pililimog ed saray datin kaaro to, tan nagmaliw a sakey a Kristianon ministro.

Saray arum so ontutumbok met la natan ed saray salitan: “Ag kayo manmatalek ed panangimermer, tan ag kayo komon magmaliw a maapa lapu ed panagtulisan.” (Salmo 62:10) Kayari inkasentensyaan ed inkipisok lapud panasalin pamatey legan na pantatakew, si José, a sakey a nailuam ed druga tan managlako na isesebel a tambal, so agunggunaan ed piaaral to na Biblia ed bayaw to. Intunda to la so panagdruga tan panaglako na isesebel a tambal tan natan et sakey lan maseseg a Tasi.

Anggaman kuan, say balon personalidad so agnagagamoran a tamtampol odino ed mamilagron paraan. Si Oscar a nimedmer a tuloy ed panagdruga tan panagtakew, so mangisasalaysay: “Sisisimoon ak a nampikasi ed si Jehova a singano say datal so nagmaliw a sakey a melag a linok lapud dakel a lua.” On, nilikud ed maseet a panagaral na Salita na Dios, nakakaukolan so mantultuloy, impapuson panagpikasi. Imanoen so kakabatan ed sayan sipipikasin panmoria: “Agmo iter komon ed siak so kadukaan ono saray kayamanan; taganoen moak ed kanen a nakaokolan ed siak. Ompan napesel ak, tan iburi ta ka, tan kuan ko, Siopa si Jehova? Odino ompan onduka ak, tan mantakew ak, tan agamilen ko a modmoraen so ngaran na Dios ko.”​—Uliran 30:8, 9.

Say dilin-interes so kaukolan a sandian na puron panangaro: “Saman so mantatakew nen saman ag komon la mantakew, no ag mansagpot, a gawaen na saray limalima to so bengatla a makapaabig, pian wala so niiter to ed satay walay pankaokolan to.” (Efeso 4:28) Singa ed kipapasen na saray inmunan-siglon Kristiano a datin ‘matakew, maagum,’ diad panamegley na dondon ya inter nen Jesu-Kristo, saray magbabawi so sipapangasin pinerdona nen Jehova. (1 Corinto 6:9-11) Agaylan makaligliwan naamtaan ya antokaman so apalabas tayo et napasimbalo tayo so estiloy-panagbilay tayo tan nagamoran so pabor na Dios!​—Juan 3:16.

Say Inkaligen ed Balon Mundo na Dios

Isipen pa so sakey a mundon andian na saray matakew. Agla kaukolan diman so sakey a magastos a sistema na panangipaskar-na-ley a tibukelen na saray ukom, abogado, pulis, tan panangipangawan! Satan so magmaliw a maaligwas a mundo a balang sakey so manrespeto ed arum tan ed kayarian da! Kasin mairap itan a panisiaan? Kasin say Dios so talagan onsalet ed saray kurang na too tan panganggaen to so kaugsan? Imbitaan mi kan mangusisa ed ebidensya a say Biblia et Salita na Dios tan saray propesiya to so napanmatalkan. Naromog mo so sakey a putel a letnegan a nawalaan na kumpiyansa ya asingger la so sakey a pansalat. Anggapon balot so makaamper ed Dios ed pangitarok na pakainawaan ya insipan to ed amin a mangaro ed inkatunong: “Agmo gonigonen so inkasika nisengeg ed saray managawa na mauges, nisay makasiblet ka ed saray manggaway kasulitan. Ta sikara nasipsip ira a magano a singa dika, tan namagaan a singa malangbot a balansi.” (Salmo 37:1, 2) Saratan a salita ya abayag lan nisulat so asingger lan sigpot a nasumpal.

Panampoten na Panarian na Dios so irap tan ag-inkatunong, a sengegay ontanlan inkaandi-ilalo tan ag-inkaligen. Anggapo la so mankaukolan, a liknaen ton nadedesdes a mantakew. Sikatayo so napapaseguroan ed propesiya: “Wala so daakan ya ilik ed tapew na dalin ed tapew na toktok na saray palandey; say bunga to onyogayog a singa Libano: tan saray wala ed ciudad onaligwas ira a singa balansi na dalin.” (Salmo 72:16) Peteg, diad nipawil lamet a Paraiso, anggapoy siopaman a manigensigen ed kareenan na totoon makaamta tan mandadayew ed tuan Dios.​—Isaias 32:18.

Agaylan tumang itan ed totoon mamabarangka ed saray paraan na sayan maagum a mundo! Kuan na Uliran 11:19: “Say mareereen ed inkatunong makarandan na bilay; et say mantombok ed mauges sikato so gawaen to a dili a patey to.” On, kayari kapegpeg na saray marelmeng, anggapo la so rason na siopaman ya ontakot a walay manamsam ed bilay to odino kaykayarian to. Say Salmo 37:11 so mangiiter ed sikatayo na onian sipan: “Saray maoyamo tawiren da naani dalin: tan manliket ira a dili ed inka daakan na kareenan.”

[Paimano ed leksab]

[Kahon ed pahina 5]

Itatalona ed Inkapeteg na Panagtakew

DIAD AYAMAN​—Lapud saray matakew so nayarin onloloob ed abung mo balanglan sika so wadtan odino andi, pansiansiaen ya akasara tan akakandado iray puerta. Irerekomenda na saray eksperto so pakawalaan na saray alarm odino bantay ya aso. Ipakabat ed napanmatalkan a kaabay sano sika so onalis a manbakasyon. Mansiansian kalmado​—masiglat so ikiwas na saray matakew, ag-iilaloan, tan makapan-uman a tampol ed saray plano ra no nanerbyos ira. No sakey ka ed saray Tasi nen Jehova, ipakabat mo so inkasika a sakey ka ed sikara tan panggunaetan mon pulongan ira. Ompan sika so napidenengan bilang sakey a kaaro odino nawalaan ira na simpatya ed sika. Ag onlalaban nilikud labat no kabilen da ka la.

DIAD PUBLIKO​—Magmaliw ya alisto ya imanoen no wala so ontutumbok ed sika. Manakar ed pegley na gilig na kalsada. Paliisan so idalan ed ambilunget tan andiay-too iran lansangan. Iyamot mo so pitakam odino angkabli iran bengatla. Paspas a manakar a singano wala so laen mo. Paliisan so pangisulong na angkabli iran kawes odino mansyayap iran alahas. Mansaliw a wala so kaiba sano abuloyan na saray sirkumstansya. Mangawit lambengat na kuartan nakakaukolan mo, a niiyan ed nanduruman bulsa odino napanginanan.

DIAD KOTSE​—No uso so “carjacking” ed lugar mo, agka mansiasiansia ed kotsem ya akaparada. Panuman-umanen mo so rotam a mamaarap tan pasempet ed trabahom. Pilim so mas maligen a dalan, anggan satan so mas arawi. Sakbay a manparada, onnengneng ed kaliberliber ompan wala so bengatlan makapasuspetsa. Paliisan so pangilukas ed compartment diad andiay-toon pasen. Agka mangititilak na angkablin bengatlan sankanengneng ed kotsem. Say sankanengneng a kandadon walaan na gulong-gulong odino arum niran kagawaan sumpad saray matakew so nayarin manismaya ed agsanay a matatakew.

[Kahon ed pahina 6]

“Ag kayo mantipon a nipaakad ed sikayo na kaykayamanan ed tapew na dalin, a sikara’y deralen na saray bokbok tan lati, tan sikara’y kotkoten tan takewen dia na saray matakew. Noag say mantipon kayo a nipaakar ed sikayo na kaykayamanan ed tawen, ya diman ag deralen na saray bokbok tan lati, tan diman ag kotkoten tan ag takewen na saray matakew.”​—Mateo 6:19, 20