Pulongan so “Amin a Klase na Totoo”

1. Antoy piparaan na saray epektibon ebanghelisador ed saray marundunong a komikimey?

¹ Say marundunong a komikimey et dakel so kagawaan to, tan amta to no kapigan tan panon ya usaren so balang sakey ed saratan. Mipadpara, nanduruma met iray kagawaan tayo ya ontulong pian nasumpal so kimey tayo bilang ebanghelisador. Alimbawa, saray brosyur tayo et walaan na nanduruman tema ya ontulong pian napulongan so “amin a klase na totoo.” (1 Cor. 9:22) Arum ed sarayan brosyur et akalista ed insert na sayan isyu, a mangipapaliwawa no parad siopa iya tan mangiiter na suhestion no panon ya iyopresi.

2. Kapigan tayo usaren iray brosyur diad ministeryo?

² No Kapigan Usaren Iray Brosyur: Usaren na komikimey so sakey a kagawaan to kapagno nakaukolan itan. Mipadpara, nayari tayon iyopresi so sakey a brosyur kapagno amta tayon makagunggona itan ed sakey, aliwa labat a legan na saray bulan sano iyopresi iratan. Alimbawa, no say opresi et say libron Ibabangat na Biblia tan manpupulong itayo ed lugar na saray aliwan-Kristiano ya agtanton interesado ed Biblia, ompan mas maabig no iyopresi so matukoy a brosyur insan ipaimano so libron Ibabangat na Biblia no nala lay interes na samay too.

3. Akin et nepeg tayoy magmaliw ya eksperton mangusar ed saray kagawaan tayod panagpulong?

³ Kokomendaan na Biblia iramay marundunong ed kimey da. (Uli. 22:29) Tan seguradon anggapo lay mas importantin kimey natan nen say “masanton kimey na maong a balita.” (Roma 15:16) Pian magmaliw itayon “sakey a komikimey ya anggapoy nepeg ton ibaing,” pansagpotan tayoy magmaliw ya eksperton mangusar ed saray kagawaan tayo.​—2 Tim. 2:15.