Isinop
Kasin Uusaren Mo Irayan Brosyur?
Say Biblia—Anto So Mensahe To?
Parad saramay daiset so amta rad Biblia, lalo lad saramay say relihyon da et aliwan-Kristiano
No panon ya iyopresi: “Labay min naamtaay opinyon yo ed sayay ibabagay Kasulatan (odino masanton libro). [Basaen so Salmo 37:11, ya tutukoyen ed seksion 11.] Antoy naiisip yon nagawad dalin no nasumpal la iyan propesiya? [Abuloyan ya onebat.] Sakey iya ed saray ilalo tan ligliwa ya naawat na totoo manlapud Biblia, antokaman so kultura tan pananisia ra.” Basaen so parapo ed tagey na pahina 3, insan iyopresi so brosyur.
Sali yon gawaen iya: No walay iyaaralan yon aliwan-Kristiano so relihyon to ya uusarey libron Ibabangat na Biblia, konsideraen so sakey a seksion na sayan brosyur ed pigaran minuto antis odino kayari na kada panaral pian sikatoy nawalaan na ideya no antoy karga na Biblia.
Libron Parad Amin a Totoo
Parad saramay de-aral ya daiset so amta rad Biblia
No panon ya iyopresi: Basaen so 2 Timoteo 3:16, 17. Insan ibaga: “Manisia kayo ed ibabaga to dia ya say Biblia et impuyan na Dios? Odino iisipen yon satan et sakey labat ya marakep a libro? [Abuloyan ya onebat.] Dakel so walaay sarilin opinyon ed satan a tepet, balet naamtaan mi ya diad tua et pigpigara labat so talagan nan-usisa ed Biblia. [Basaen so eksperiensya ed leksab na tema diad pahina 3.] Ipapanengneng na sayan marakdakep a brosyur iray maabig ya rason no akin a nepeg ya ikonsidera na totoo so karga na Biblia, antokaman so kipapasen tan pananisia ra.”
Sali yon gawaen iya: No inawat na householder so brosyur, ibaga: “Say sakey a rason no akin ya iisipen na dakel a totoo ya aliwan importante so pambasa na Biblia et lapud papaugesen na relihyon so Biblia tan aliway pangipapatalos dad satan. No ompawil ak dia, mangiter ak na alimbawa.” Kapawil yo, konsideraen so arum ya impormasyon diad pahina 4-5.
Nayarian Moy Magmaliw a Kaaro na Dios!
Parad saramay ag-akapanaral odino agtanton makabasa
No panon ya iyopresi: “Parad sikayo, posible kasi ya magmaliw tayon kaaro na Dios? [Abuloyan ya onebat. Insan basaen so Santiago 2:23.] Ginawa iyan brosyur pian ontulong ed sikatayon magmaliw a kaaro na Dios, singa si Abraham.”
Sali yon gawaen iya: Diad unonan pitongtong odino diad ipawil, idemostra so panangiyaral na Biblia diad pangonsiderad kabiangan odino interon leksion 1.
A Satisfying Life—How to Attain It
Parad saramay aliwan relihyoso
No panon ya iyopresi: “Ombibisita kamid sikayo lapud dakel a totoo so malabay ya magmaliw a mas maliket so bilay da. Amin tayo et makakaeksperiensya na saray problema ya mamapaermen ed sikatayo. No nagawa itan, nayarin onkerew tayoy simbawa ed sakey a panmamatalkan a kanayon o kaaro odino diad saray libro o diad Internet. Antoy apaneknekan yo lan maabig ya napangalaay simbawa? [Abuloyan ya onebat.] Mankelaw so arum nen naamtaan dan wala manayay praktikal ya simbawa ed Biblia. Nia ay so sakey ya alimbawa. [Ipanengneng ed householder so kapitulo 2 tan manbasa na sakey ya inaon a teksto.] Ipaliwawa na sayan brosyur no panon a magmaliw ya mas maliket so bilay tayo.”
Sali yon gawaen iya: No inawat na householder so brosyur, ibaga: “Arengelan na dakel ya amayamay so lingo ed Biblia. Diad ipawil ko, labay kon ipanengneng ed sikayo so sakey a prueba ya sustoy Biblia no nipaakar ed siensia. Ompan nainteresan kayo ed saya.” Kapawil yo, konsideraen so parapo 4 diad pahina 12.
The Origin of Life—Five Questions Worth Asking
Parad saray Kristianon kalangweran ya nababangatan na ebolusyon ed eskuelaan, tan makatulong met sano mikakatunongan ed saray manisiad ebolusyon, saray agnostiko tan ateista (Ag-iyoopresi iyan brosyur ed panagkabkaabungan.)
No panon ya usaren no mitotongtong ed sakey a manisiad ebolusyon odino sakey ya ateista: “Ibabangat na amin lawarin science textbook natan so ebolusyon. Kasin manisia kayo a say ebolusyon et sakey labat a teorya, odino aawaten la bilang katuaan? [Abuloyan ya onebat.] Pian makagaway dugan desisyon, seguradon mipakna kayon kaukolan ya parehon ikonsidera so duaran dapag. Ipapanengneng na sayan brosyur so arum ya ebidensya a lapud saratan et dakel so manisian pinalsa so bilay.”
Sali yon gawaen iya: Diad eskuelaan, ikarga so brosyur ed desk mo tan nengneng mo no kasin wala ray kaklasem ya mantepet nipaakar ed satan.
Why Should We Worship God in Love and Truth?
Parad saray Hindu
No panon ya iyopresi: “Diad sakey a kabkabat ya pikakasi na Indian, akalaktip so kerew ya naanap komon so katuaan tan liwawa. Parad sikayo, importante kasin mandayew ed Dios diad aro tan katuaan? [Abuloyan ya onebat.] Imanoen yo pay imbaga nen Jesus nipaakar ed saya.” Basaen so Juan 4:24. Insan basaen so parapo 4 ed pahina 3 tan iyopresi so brosyur.
Sali yon gawaen iya: No inawat na householder so brosyur, ibaga: “Ibabaga na arum ya Hindun managbangat a say katuaan et walad puso tayo. Ibabaga balet na arum ya naromog so katuaan ed masanton kasulatan. Diad ontumbok, labay kon itongtong ed sikayo so tepet ya walad sampot na parapo 3 diad pahina 4: ‘Iner so pakalmoan tayoy katuaan ya nanlapud Dios?’”
The Pathway to Peace and Happiness
Parad saray Buddhist
No panon ya iyopresi ed maedad ya Buddhist: “Nayarin napapagaan kayo met ed karakel na mabanday iran babantayan o babasaen natan tan ed epekto na saratan ed ananak tayo. Diad padesir yo, akin et ongragrabe so imoralidad ed saray kalangweran natan? [Abuloyan ya onebat.] Amta yo, nipasakbay la iya ed sakey a libro ya insulat antis nin ginmapo iray relihyon a Kristiano, Hindu, tan Muslim. [Basaen so 2 Timoteo 3:1-3.] Sarayan kipapasen et onloloor anggano tuloytuloy so panaaral na totoo. [Basaen so bersikulo 7.] Atulongan ak na sayan publikasyon a natalosan so katuaan ya agbalot naamtaan na maslak a totoo. Labay yon basaen iya?”
Sali yon gawaen iya: Diad ipawil yo, sano apawala lay interes na householder ed Biblia, ipanengneng iray tepet ed beneg na brosyur, tan ipaimano so coupon parad libron Ibabangat na Biblia. Ibagan angawit kayo na ontan a libro no labay ton nengnengen. Ipanengneng so table of contents na libro tan pantongtongan so sakey odino duaran parapo ed kapitulon pinili to.
Our Problems—Who Will Help Us Solve Them?
Parad saray Hindu
No panon ya iyopresi: “Maslak ya akatongtong mi et napapagaan ed saray kaugsan a nagagawa. Onsabi kasi panaon ya ekalen na Dios iray problema ed sayan mundo? [Abuloyan ya onebat.] Mangiiter na ilalo iyan propesiya. [Basaen so Salmo 37:11.] Sayay binasak et Biblia, say libron mabetbet ya aliway pangipapasen tan panguusar da. Aliwa iyan libro parad saray Amerikano tan taga Europa. Diad tua, ag-isusugsog na saya so kolonialismo odino inkasuperyor na sakey a rasa. Imbes, iikdan to itayo na ilalo ya magano lan ekalen na Dios iray problema tayo. Nabasa met dia iray prinsipyo ya ontulong pian nasarag tayo ray problema natan. Sayan brosyur et mankarga na dakel nin impormasyon nipaakar ed Biblia.”
Sali yon gawaen iya: Diad ipawil yo, sano apawala lay interes na householder ed Biblia, ipanengneng iray litrato ed pahina 4-5 diad libron Ibabangat na Biblia. Manbasa na anggan sakey ed saray akasulat ya teksto tan iyopresi so libro.
Will There Ever Be a World Without War?
Parad saray Judio
No panon ya iyopresi: “Manlapu la nensaman maniirap iray totoo lapud saray guerra. Parad sikayo, akin et wala ni ray guerra anggano ibabaga na totoon labay day kareenan? [Abuloyan ya onebat.] Mangiiter na ilalo iyan propesiya nen Isaias. [Basaen so Isaias 2:4.] Balet, wala ray tepet nipaakar ed saya: Kapigan tan panon ya nasumpal so propesiya nen Isaias? Akin et makaseguro itayon say Kasulatan et napanmatalkan ya lapuan na ilalo? Ebatan na sayan brosyur irayan tepet.”
Sali yon gawaen iya: No inawat na householder so brosyur, ipanengneng so pahina 16-17 tan ibaga: “No nanonotan na arum iray agawan kaugsan singa say Holocaust, itetepet da, ‘No walay Dios, akin et aabuloyan toy kairapan?’ Sarag tayon pantongtongan itan no ompawil ak.”
The Guidance of God—Our Way to Paradise
Parad saray Muslim ya manaayam ed lugar ya ag-ira sesebelan a manaral na Biblia
No panon ya iyopresi: “Amta mi ya saray Muslim et manisia ed sakey a tuan Dios tan ed amin a propeta. Tua ‘man? [Abuloyan ya onebat.] Labay koy mitongtong ed sikayo nipaakar ed abayag lan propesiya a say dalin et magmaliw a paraiso. Sarag ton ibasak ed sikayo iman a propesiya? [Basaen so Isaias 11:6-9.] Iisipen na dakel a totoo no panon kasin gawaen na Dios so ontan a pananguman ed dalin. Nabasam ed sayan brosyur no antoy imbaga na saray propeta nipaakar ed sayan tema.”
Sali yon gawaen iya: No inawat na householder so brosyur, ibaga: “Ibabaga na sayan libron nanlapud Dios a diad gapo et nanayam so too ed paraiso. No ompawil ak, labay kon ipaliwawa so ebat ed tepet ya, ‘Panon ya imbeneg na too so panangigiya na Dios tan agnantultuloy a nanayam ed paraiso?’” Kapawil yo, pantongtongan so gapo na yunit ya walad pahina 6.
Real Faith—Your Key to a Happy Life
Parad saray Muslim ya manaayam ed lugar ya ag-ira sesebelan a manaral na Biblia
No panon ya iyopresi: Ipanengneng so litrato ed pahina 16-17 tan ibaga: “Niduman talaga iyan eksena no ikomparad nanenengneng tayo ed mundo natan. Parad sikayo, posible kasin nasabi panaon et nagawa iya diad dalin? [Abuloyan ya onebat.] Nengneng yo pa no antoy isisipan na sayan libron nanlapud Dios. [Basaen ed Bibliam so sakey ed saray akasulat ya teksto.] Natulongan itayo na sayan brosyur a nawalaan na mabiskeg a pananisia ya nagawa irayan sipan.”
Sali yon gawaen iya: Diad pansampot na unonan pitongtong yo, pampilien so householder na sakey a tepet diad beneg na brosyur. Insan iyeskedyul no kapigan yo pantongtongan so ebat a walad brosyur.
Lasting Peace and Happiness—How to Find Them
Parad saray Chinese
No panon ya iyopresi: “Amayamay so problema tayod bilay ya mangeekal na liket tayo. Antoy makakatulong ed sikayo pian mansiansian maliket? [Abuloyan ya onebat.] Dakel so nagmaliw a maliket nen inyaplika da ray simbawa na Biblia. [Basaen so Salmo 119:1, 2.] Ipapasen na arum a say Biblia et libro parad saray Amerikano tan taga Europa. Balet imanoen yo pa iya. [Pantongtongan so parapo 16 ed pahina 17.] Ipaliwawa na sayan brosyur no panon tayon nawalaan na agmanganggan deen tan liket.”
Sali yon gawaen iya: No inawat na householder so brosyur, basa yon dua so unonan taloran sentence na parapo 18 ed pahina 17 tan ibaga: “No ompawil ak dia, labay kon ipanengneng ed sikayo no antoy ilaloan tayon nagawa base ed Biblia.” Kapawil yo, pantongtongan so sakey ed saray punto ed parapo 6 diad pahina 30.