Pangibunog na Imbitasyon ed Memoryal ya Onggapo no Marso 17
1. Anton kampanya so onggapo no Marso 17?
1 Diad tinaon ya panseselebra na Memoryal et niyaabawag so impatey nen Jesus. (1 Cor. 11:26) Kanian labay tayon nakaiba iray arum ya onatendi tan mandengel nipaakar ed dondon ya maaron inter nen Jehova. (Juan 3:16) Diad sayan taon, say kampanyan pangimbitad totoo parad Memoryal et onggapo no Sabado, Marso 17. Kasin manplaplano ka la pian sigpot a makapibiang ed satan?
2. Antoy nayarin ibaga tayo sano mangiter tayoy imbitasyon?
2 No Antoy Nayarin Ibaga Tayo: Mas maabig no antikey labat so ibaga tayo. Nayarin ibaga: “Hello. Walay iter min imbitasyon parad pamilya yo nipaakar ed importantin tinaon a selebrasyon ya nagawad interon mundo no Abril 5. Walay paliwawan nibase ed Biblia nipaakar ed no antoy agawaan na impatey nen Jesus tan no antoy gagawaen to natan. Akasulat dia no iner iya nagawa diad lugar tayo tan no anton oras.” No mibiang ed panagbunog diad weekend, mangiyopresi met na magasin no matukoy.
3. Antoy gawaen tayo pian dakel so naimbitaan tayo?
3 Mangimbitay Dakel: Say kalat tayo et mangimbitay dakel ya totoo anggad posible. Kanian seguradoen yon imbitaan iray iyaaralan yoy Biblia, saray papawilen, kakanayon, katrabaho, kaeskuela, kakaabay, tan arum ni ran kabat yo. Mangiter na instruksion iray elder ed kongregasyon yo no panon ya nasumpal so teritorya yo. Wala ray maabig ya resulta na tinaon a panangimbita ed Memoryal. Nen imbeneg ya taon, sanen linmoob so sakey a bii diad nanselebraan na Memoryal, inasinggeran na attendant pian tulongan ya anapey publisher ya angimbitad sikato. Balet inkuan na bii ya anggapoy kabat to diman, inter labat kunod sikato so imbitasyon na samay manpupulong ed kaabungan diad saman ya kabuasan.
4. Anto ray rason no akin a maseseg ya mibiang ed kampanya?
4 Nayarin say sakey ed saray onatendid Memoryal et wadman lapud imbitasyon ya intilak mo. Anggano onatendi odino andi so inimbitaan yo, siansian mangiter na pantasi so impansagpot yo. Saray imbitasyon ya ibunog yo et mangiyabawag ya si Jesus et sakey la natan ya makapanyarin Ari. Say maseseg ya pibiang yo et mangipatnag ed amin ya makanengneng—saray totood teritorya, kaparan publisher, tan manunad amin, si Jehova—ya talagan aapresyaen yo so regalo ya dondon.—Col. 3:15.