2022: Taon ya Dakdakel so Aliwliwan Agawa—Antoy Ibabaga na Biblia?

Legan na 2022, say karga na balita et puro tungkol ed guerra, problema ed ekonomya, tan kalamidad. Balet say Biblia labat so talagan makapangipaliwawa no akin ya agawa iratan.

Say labay ya ibaga na saray agawa nen 2022

Lapud saray agawa ed apalabas ya taon, lalon apruebaan ya manbibilay tayo lad ibabaga na Biblia ya “kaunoran iran agew.” (2 Timoteo 3:1) Ginmapo itan ya panaon nen 1914. Imanoen no panon ya mipara ed impasakbay na Biblia iray agawa nen 2022:

“Saray Guerra.”—Mateo 24:6.

• “Alikna Lamet na Europe so Makapataktakot ya Epekto na Guerra nen 2022.”a

“Eras.”—Mateo 24:7.

• “2022: Say Taon na Graben Eras.”b

“Salot.”—Lucas 21:11.

• “Ipapanengneng na impawil na polio, indakel na kaso na monkeypox tan tuloytuloy nin idarakel na nanaalisan na COVID-19, ya talagan delikado iray makaalis ya sakit tan anggapoy nagawaan na too.”c

“Wala ray makapataktakot a nanengneng.”—Lucas 21:11.

• “Wala ray agawan heatwave, kelang, wildfire, tan delap. Agnalingwanan so summer na taon 2022 lapud graben petang. Nilibo so inatey tan minilyon ya totoo diad interon mundo so tinmaynan ed ayaman da lapud saratan.”d

“Saray gulo.”—Lucas 21:9.

• “Ampetang so ulo na dakel lapud irap na bilay, tan lapud binmilin maong iray sasaliwen, kanian dakdakel iray namprotesta ed gobierno nen 2022.”e

Anto kasi nagawa ed onsublay ya taon?

Anggapoy makapangibaga no antoy eksakton nagawa no 2023. Balet amta tayo ya asingsingger lan onaksion so Panarian na Dios, odino say gobierno ed tawen, pian manggaway baleg ya pananguman diad interon dalin. (Daniel 2:44) Ekalen na satan so panlalapuan na paniirap na totoo tan seguroen ton nasumpal so linawa Dios diad dalin.—Mateo 6:9, 10.

Komon ta tumboken yoy bilin nen Jesu-Kristo ya “mantultuloy ya manbantay” ed no panon ya susumpalen na saray nagagawad mundo natan iray propesiya na Biblia. (Marcos 13:37) Kontak yo kami pian naamtaan yo no panon kayon natulongan na Biblia natan tan no panon kayon nawalaan na tuan ilalo ed arapen.