Anto ray Nanlapuan na Halloween?
Say ebat na Biblia
Ag-abitla ed Biblia so holiday ya Halloween ya seselebraan na dakel no Oktubre 31 na kada taon. Balet saray nanlapuan tan saray tradisyon na Halloween et kontra ed bangat na Biblia.
Diad sayan artikulo
Say history tan saray tradisyon na Halloween
Samhain: Say Halloween et nayarin nanlapu ed sayan “piesta a sinelebraan na saray Celt masulok lan 2,000 taon so apalabas,” kuan na The World Book Encyclopedia. “Panisiaan na saray Celt a nayarin miulop iray inaatey ed saray mabilay legan na Samhain. Tan sarag na saray mabilay so ombisitad saray inaatey.”—Nengnengen so “Akin ya tinawag itan ya Halloween?”
Saray kostyum, kendi, tan “trick or treat” diad Halloween: Unong ed sakey ya reperensya, saray arum a Celt et mansusulong na makapataktakot iran kostyum pian “say amta na saramay liber-liber ya espiritu et kaiba da ra” tan agda ra diwiten. Saray arum et mangiyaatang na saray kendi parad saray espiritu pian agda ra sakitan.a
Diad Europe nen Middle Ages, inalig na saray pari ya Katoliko iray paganon kustombre ed lugar da tan papaonlaen da ed kaabungan iray membro da ya aka-kostyum tan onkekerew na simpli iran regalo.
Saray anyani, bampira, werewolf, manananem, tan zombie: Abayag lan papanisiaan ya kabiangan iraya ed mauges iran espiritu. Diad libron Halloween Trivia, tinukoy iratan bilang “supernatural monster” tan nabasa met ditan ya “mikonektaan iratan ed patey, saray inatey odino takot ed patey.”
Saray kalubasa: Diad Britain nen Middle Ages, “oonlad kaabungan iray totoo pian onkerew na naakan bilang kasalat na pandasal da parad inaatey,” tan wala ray awit dan “silew a gawad binungawan ya lakamas tan isisimbolo na kandila ya walad dalem to so kamarerwan akulong ed purgatoryo.” (Halloween—From Pagan Ritual to Party Night) Ibabaga na arum ya uusaren iratan ya silew pian paarawien iray mauges ya espiritu. Diad North America nen dekada 1800’s, saray lakamas et sinalatan la na kalubasa lapud mas dakel tan mas mainomay iratan ya bungawan tan ukitan.
Kasin importante nin amtaen iray paganon nanlapuan na Halloween?
On. Anggaman iisipen na arum ya say Halloween et panliketan met labat tan anggapoy uges to, saray gagawaen na totoo pian selebraan itan et kontra ed ibabangat na Biblia. Say Halloween et imbase ed saray palson papanisiaan nipaakar ed saray inatey tan saray espiritun agnanengneng, odino saray demonyo.
Imanoen irayan bersikulo ya mangipapanengneng no antoy pakanengneng na Dios ed saray papanisiaan na totoo ya mikonektaan ed Halloween:
“Nepeg ya anggapoy siopaman ed sikayo . . . so onkonsulta ed saray anyani odino espiritu, odino manpatawag na inatey.”—Deuteronomio 18:10-12, The Jerusalem Bible.
Say labay ton ibaga: Aglabay na Dios ya salien tayoy mitongtong ed inatey odino anggan ipanengneng ti labat ya sarag tayoy makapitongtong ed inatey.
“Saray inatey et anggapon balot so amta ra.”—Eclesiastes 9:5.
Say labay ton ibaga: Anggapo lay amta na saray inatey kanian ag-ira makapitongtong ed saray mabilay.
“[Agkayo] mibibiang ed saray demonyo. Agkayo nayarin oninum ed kopa na Katawan insan diad kopa na saray demonyo.”—1 Corinto 10:20, 21, New International Version.
Say labay ton ibaga: Saramay labay dan naawat so pabor na Dios et nepeg dan paliisan so antokaman ya koneksion ed saray demonyo.
‘Labanan yo iray masilib a pakana na Diablo; lapud mipupuligesgesan itayo . . . [ed] saray armada na mauges ya espiritu.’—Efeso 6:11, 12.
Say labay ton ibaga: Nepeg ya sumpaen na saray Kristiano iray mauges ya espiritu, tan ag-ira mankukunwarin manseselebra ya kaiba ra.
a Nengnengen so libron Halloween: An American Holiday, an American History, pahina 4.