Nilukas so Sakey a Sagradon Sekreto

“Say sagradon sekreto na sayan maridios a debosyon so agaylan baleg.”​—1 TIMOTEO 3:16.

1. Anton sekreto so adiskrebe ed 1 Timoteo 3:16?

KASIN makatawag-interes iray misteryo ed sikayo? Kasin sikayoy magayagan mansusukimat ed saray sekreto? Kaslakan ed sikatayo so ontan! Miulop ed sikami, sirin, legan a sikatayoy manosisa ed sakey ed saray sankabalgan a sekreto ed amin​—sakey a sekreton maalwar a niyamut ed Salita na Dios ed loob na nilibon taon. Baleg so epekto na sayan sagradon sekreto ed saray bilay tayo, nampara ed kaplesan tan arapen. Satan so ‘sagradon sekreto na maridios a debosyon,’ ya adeskribe parad sikatayo ed 1 Timoteo 3:16. Agaylan kaukolan a misalamat tayo ed si Jehova, “say manangiparungtal na saray sekreto,” lapud maaron imparungtal to ed sikatayo iyan baleg a sekreto tan kabaliksan to!​—Daniel 2:28, 29.

2. (a) Kapigan ya inmunan abitla nen Jehova so sakey a sagradon sekreto, tan insan anto so insipan to? (b) Antoran tepet so mankaukolan na ebat?

² Inmunan binitla nen Jehova so sakey a sagradon sekreto kayarin pinalikdo na Uleg si Eva, tan tinmonbok si Adan ed isusumpa to. Sirin insipan na Dios a satan a “bini,” odino anak, so mamekmek ed ulo na Uleg. (Genesis 3:15) Siopa so sayan Bini? Panon ton deralen so Uleg? Kasin sikato so mangialangon ed inkamatua na Dios tan gagala To ed sayan dalin?

3. Saray madibinon propesiyas so mangitarok na anto iran sinyas unong ed pakabidbiran tan kimey na Bini?

³ Diad dugan panaon, angiparungtal iray madibinon propesiyas na sinyas no nipaakar ed pakabidbiran tan arapen a kimey na Bini. Sikatoy sakey a kailalakan nen Abraham, a makatawir ed panarian nen David, tan natawag a Prinsipe na Kareenan. ‘Diad idaak na gobierno to tan kareenan angggapo so anggaan.’ (Isaias 9:6, 7; Genesis 22:15-18; Salmo 89:35-37) Ingen unong ya ibabaga na Roma 16:25, satan a sagradon sekreto so “nisimpen ed kaitlekan na ando lan ando a panaon.”

Panresolbe ed Misteryo

4. Panon a ginmapon niparungtal so sagradon sekreto nen 29 K.P?

⁴ Kaunoran, kayari na apatiran milenyo, tampol a binmotay so liwawa! Diad anton dalan? Nen 29 K.P., binautismoan nen Juan si Jesus na Nazareth ed Ilog na Jordan, tan inkuan na boses na Dios ed tawen: “Saya so Anako, say inad-aro, ya inabobonan ko.” (Mateo 3:17) Ah, nia la ed sampot so Bini na sipan! Ginmapon niparungtal so sagradon sekreto ed amin a maglorian kabiangan to, a kaibay pamaakaran ed maridios a debosyon.

5. Anto so “maridios a debosyon,” tan panon a lanoren toray manaagamil ed satan?

⁵ Anto so pakatalos tayo ed “maridios a debosyon”? Diad Kristianon Griegon Kasulatan, ya abitla itan a balikas a 20 danay lambengat et masulok a kapaldua na saraya diad saray sulat nen Pablo ed si Timoteo. Say palapagan ya Insight on the Scriptures ipatalos to so “maridios a debosyon” a “panamagalang, dayew, tan lingkor ed Dios, a tekep na katooran ed sakatalbaan ya inkasoberano to.” Say baleg a panamagalang so manlalapud sakey a puson maapit ed Dios, ya ontakot ed kabalgan to, say inkaando to, tan ed saray dakerakel a makapakelaw a palsa to, tekep na pisasalamat ed espiritual tan material iran palangkap ya iiter to ed saray maapresyan totoo. Manepenepeg, a balang sakey ed sikatayo a manaagamil na maridios a debosyon so nayarin mangikuan, ya unong a ginawa na salmista ed Salmo 104:1: “Galangen mo si Jehova, O kamarerwak. O Jehova a Dios ko, pinaneknekan mo a balbaleg. Tekep na kagalangan tan inkaari so inkawes mo ed inkasika.”

6. (a) Panon a miduma iray managdayew ed si Jehova a manlapud saray akayurong ed saray yurongan na Kakristianoan? (b) Anto so imbaga nen Pablo ed Roma 11:33, 34, tan anto iray apalesan tepet?

⁶ Nepeg a nipanengneng so debosyon tayo ed Dios, tan nagawa iya ed panamegley na inkiwas. Diad sayan bengatla, saray managdayew na tuan Dios, si Jehova, so niduman baleg a manlapud saray akayurong ed yurongan na nagegeban iglesias na Kakristianoan. Diad dakel a totoo ed dalin, say relihyon​—no wala ni so relihyon da​—​so sakey a pormalidad, sakey a kulibenben a nausar pian ipanengneng a masanto ra legan a manbilay iran mitukuyan ed nadederal a mundo ed liber da. Agda ni ingen kabat no siopa so Dios. Maseguron, ontan iran totoo so nepeg a manisip ed saray salita nen Pablo ed Gawa 17:23, sanen inkuanto ed saray Ateneos a mandadayew ed “sakey ya Agkabat a Dios”: “Saman sirin so agyo kabat a pangiiteran na maridios a debosyon, saya so ipakabat ko ed sikayo.” No nipaakar ed satan ya apagalangan a Dios, inmeyag si Pablo ed Roma 11:33, 34: “O say kaaralman na kayamanan na kakabatan tan pikakabat na Dios! Agaylan agnaosisa a kanonotan to, tan agnatebek iray dalan to! Ta ‘siopa ta so akatalos na kanonotan nen Jehova, odino siopa so nagmaliw a mananimbawa to?’” Panon, sirin, a kabaten iray dalan na Dios? Sikato so diad panamegley na panaral ed ‘sagradon sekreto na maridios a debosyon.’ Ingen panon tayon gawaen itan?

7. Akin a nibagan satan a “sagradon sekreto na sayan maridios a debosyon so abalbaleg”?

⁷ Diad 1 Timoteo kapitulo 3, inmunan indatak nen apostol Pablo no anto so kakaukolanen ed saray responsablen ariripen ed kaabungan na Dios, ya adeskribe ed bersikulo 15 unong a “say kongregasyon na mabilay a Dios, sakey a lusek tan salimbeng na katuaan.” Insan inyarum nen Pablo, diad bersikulo 16: “Say sagradon sekreto na sayan maridios a debosyon so abalbaleg a tuloy.” Baleg a tuloy lapud imbaki nen Jehova so bogtong ya Anak to ed dalin pian iparungtal iyan sekreto, pian idemostra no anton tua so maridios a debosyon tan panon a sikato so makana, sentro, na tuan panagdayew. Say sagradon sekreto na maridios a debosyon so nipatnag ed kurso na impanbilay nen Jesus dia ed dalin. Nepeg ya amin a manangaro ed si Jehova a pabalegen so pananisia ra tan saray bilay da ed Kristo, ya uliran na maridios a debosyon. Panon, sirin, a pinalinew nen Jesus so sagradon sekreto na maridios a debosyon?

Anemiran Kabiangan

8. (a) Antoray anemiran nengneng na sagradon sekreto a deneskribe nen Pablo ed 1 Timoteo 3:16? (b) Siopa so “Sikato” a ginawan nipatnag?

⁸ Diad madibinon puyan, inebatan itan a tepet nen Pablo. Dia ed 1 Timoteo 3:​16, sikatoy aneskribe ed anemiran nengneng na sayan sagradon sekreto, ya isasalaysay a: “Sikato so [1] nipatnag ed laman, [2] niyabawag a matunong ed espiritu, [3] nampanengneng ed saray angheles, [4] nipulong ed limog na saray nasyones, [5] sinisia ed mundo, [6] naawat ed tagey ed gloria.” Siopa so say “Sikato” a nipatnag? Mapatnag, “Sikato” so say nisipan a Bini, si Jesus, a nanggawa na linawa na Dios. Sikato so sankaimportantian ed sagradon sekreto, a gawaen ton tuan baleg.

9. Anto so paneknek a say 1 Timoteo 3:16 et agnabasan: “Say Dios so nipatnag ed laman”?

⁹ Sasalien na saray trinitaryan a guloen so pakatalos ed sagradon sekreto diad pangibabagan satan a “Sikato” ed 1 Timoteo 3:16 so Dios a mismo. Imbase ra iya ed King James Bible a nabasan “say Dios so nipatnag ed laman.” Anggaman ontan, anto so ibaga na saray napanmatalkan iran Griegon manuskrito? Anggapoy pansalat, ya inusar da so pronoun a “Sikato” imbes a “Dios.” Saray tekstual a kritiko natan so mikasakey a say impangyarum ed “Dios” ed sayan kasulatan so sakey a lingo ed panagsulat. Sirin, dakel iran balobalo nin patalos, a singa say American Standard Vesion, The New English Bible, tan say New World Translation, a dugan nabasan: ‘Sikato [odino, Sikato a] nipatnag ed laman.’ Andi, saman so aliwan Dios a mismo so pinmatnag “ed laman.” Imbes, satan so inad-aron Anak to tan inmunan palsa, ya insulat nen apostol Juan ya: “Et say Verbo nagmaliw a laman tan akipan-ayam ed sikatayo, tan sikatayoy akanengneng ed gloria to, sakey a glorian na bogbogtong ya anak a nanlapud ama; tan sikato so napnoan na andi kanepegan a panangasi tan katuaan.”​—Juan 1:14.

“Nipatnag ed Laman”

10. (a) Panon a say ununan nengneng na sagradon sekreto et pinmatnag ed bautismo nen Jesus? (b) Akin a nagmaliw ya “unor ya Adan” si Jesus?

¹⁰ Nen binautismoan si Jesus say inmunan nengneng na sagradon sekreto so pinmatnag: Si Jesus “so nipatnag ed laman” bilang alanaan ya Anak na Dios. Inyalis nen Jehova a Dios so bilay na Anak to a manlapud tawen ed eges nen Maria pian nianak si Jesus ed laman bilang sakey ya ayadyarin too. Sirin, unong ya ipanengneng na 1 Corinto 15:45-47, a nagmaliw a komadua si Jesus, odino “unor,” ya Adan, sakey ya ayadyarin toon kamarerwa a kasimbangan na inmunan Adan. Diad anton gagala? Tinukoy na 1 Timoteo 2:5, 6 so “unor ya Adan” bilang “sakey a too, si Jesu-Kristo, ya inter to so inkasikato a kasimbangan a dondon ed amin.” Diad sayan legal a basian na sakey ya ayadyarin toon bagat, si Jesus so manamegley ed balon sipanan ed 144,00 iran totoo a nagmaliw a kaiban miuley ed sikato diad Panarian to.​—Apocalipsis 14:1-3.

11. Para ed siopa iray palangkap na dondon ya inbagat nen Jesus?

¹¹ Kasin minabang met iray arum ed bagat nen Jesus ed patey? Positibon on! Ibabaga na 1 Juan 2:2 a si Jesu-Kristo “so sakey a bagat para ed kasalanan tayo [satan so, saray kasalanan na alanaan iran Kristiano a singa si Juan], ingen aliwan para ed sikatayo lambengat noag ta ontan met ed interon mundo.” Saray panamalangkap na bagat a dondon nen Jesus so onlaknab sirin angga ed saray 144,000 alanaan iran Kristianos ed interon mundo na katooan. “Sakey a baleg ya ulop” a manbibilay natan tan nilibon minilyon so napaoli ed Paraison dalin a makawat na andi-anggaan a bilay a nibase ed pananisia ra ed bagat nen Jesus. A singa, nipropesiya la ed Apocalipsis 7:9, 10, say baleg ya ulop et inurasan daray kawes da tan pinaputi ra ed panamegley na panaagamil ed pananisia ed dala na Kordero, si Jesu-Kristo. Sikara so nikuentan matunong unong ed pikakaaro ed Dios. Tekep na gayaga, akabatan da ed nanduruman nengneng na sagradon sekreto tan nipanengneng so maridios a debosyon a mitunusan ed alimbawa nen Jesus.

Arum Niran Kabiangan

12. Panon a si Jesus so “niyabawag a matunong ed espiritu”?

¹² Natan, kumusta met so komaduan nengneng na 1 Timoteo 3:16? Si Jesus “so niyabawag a matunong ed espiritu.” Balet panon? Ed panamegley ya impamaoli ed manamenben na katooran ya Anak to a manlapud patey ed espiritun bilay. Kapara iya na pangiyabawag na Dios a si Jesus so sigpot a matunong tan manepeg ed nitandoro iran kimey. Unong ya ibabaga na Roma 1:4, si Jesus so “niyabawag ya Anak na Dios unong ed espiritu na inkasantos ed panamegley na kioli a manlapud saray inatey.” Mikasakey ed saya, ikuan nen Pedro ed sikatayo ed inmunan sulat to, ed kapitulo 3, bersikulo 18: “Aminpinsan ya inatey si Kristo ed amin a panaon nisesengeg ed saray kasalanan, sakey a matunong a too para ed saray agmatunong, pian itonton to kayo ed Dios, a sikatoy inyan ed ipapatey ed laman, ingen pinabilay ed espiritu.” Kasin itonton kayo na alimbawa nen Jesus ed maridios a debosyon ed Dios?

13. Say apaolin Jesus so nampanengneng ed anto iran angheles, tan anton nengneng a mensahe so impulong to ed sikara?

¹³ Diad pantultuloy ed 1 Timoteo 3:16, sinmublay a tinukoy nen Pablo so komatlon nengneng na sagradon sekreto, ya ibabagan si Jesus so “nampanengneng ed saray angheles.” Siopa irayan angheles? Nipaakar ed si Jesus, natan a “pinabilay ed espiritu,” sinmulat si Pedro ed 1 Pedro 3:19, 20: “Diad sayan kipapasen met sikato so linma ed dalan to tan nampulong ed saray espiritu a nipangaw, a datin tinmunganga sanen say anos na Dios so manalagar ed saray agew nen Noe.” Unong ed Judas 6, saraman ya epiritu so “saray angheles ya ag-amenben ed orihinal a kipapasen da ingen pinaulian day dilin ayaman a pasen” ed katawenan. Angala ra na silalaman iran laman pian manliket ed isesebel iran relasyon ed sekso ed bibii. Sanen pinilit ira na Delap ya ompawil ed espiritun pasen, sikara so nibantak ed Tartaro, sakey a kipapasen na kabilungetan. (2 Pedro 2:4) Say pinaolin Jesu-Kristo so nampulong ed sikara. Ingen kasin saman so sakey a mensahe na kililiktar? Peteg ya andi! Imbes, sikaray inukom nen Jesus ed katilaan da bilang say mismon kasonian na maridios a debosyon. Siopaman a managlingkor na Dios a galgalawen labat so seksual ya imoralidad natan so nepeg a mangala na pasakbay a manlapud panangukom ya imbalikas ed saraman ya angheles!

14. Panon a si Jesus so ginmapon “nipulong ed limog na saray nasyones”?

¹⁴ Say komapat a nengneng ed 1 Timoteo 3:16 so mangibabagan si Jesus so “nipulong ed limog na saray nasyones.” Panon iyan asumpal? Sakbay a sikatoy inaresto, imbaga nen Jesus ed saray apostoles: “Tua, tua, kuan ko ed sikayo, siopaman a manaagamil na pananisia ed siak, satan a sakey gawaen to met iray kimey a ginawak; tan gawaen toray ankakabaleg a kimey nen saraya, lapud onla ak ed Ama.” (Juan 14:12) Kabebekta kayari na saman, nen Pentecostes 33 K.P., inkalbo nen Jesus so mansanton espiritu ed saray babangatan to, tan say makapalagyat iran balita a “sayan Jesus so pinaoli na Dios” so ginmapon nipulong ed saray Judios. Saginonor, inawat met na saray Samaritanos so salita na Dios tan ginmapon akawat na masanton espiritu. (Gawa 2:32; 8:14-17) Insan, nen 36 K.P., nanpulong si Pedro ed si Cornelio tan arum a nanduroypo iran Hentiles ed abung to. Sirin, say maong a balita nipaakar ed si Jesus so ginmapon “nipulong ed limog na saray nasyones,” satan so, limog na aliwaran Judios, ya alanaan met na masanton espiritu.

15. Anto so paneknek a saray inmunan siglon Kristianos et naaralan dan maong so sagradon sekreto na maridios a debosyon?

¹⁵ Unong ya insalaysay ed Gawa 12:24, “say salitan nen Jehova so mantultuloy ya ondaraak tan ondarakel.” Idalatdat na Gawa 17:​6 a kinmelyaw iray sumusumpa ed mamaamianen a Grecia, unong a gagawaen da diman ed sayan agew: “Sarayan totoon nangogotgot ed panaayaman a dalin so wadia met.” Diad loob na 30 taon, makapansulat si Pablo a satan a maong a balita so “nipulong ed amin a palsa a wala ed silong na tawen.” (Colosas 1:23) Naaralan a maong na saray Kristianos ed saman a panaon so sagradon sekreto na maridios a debosyon. Agaylan masimoon ya iyaaplika ra itan! Tan ontan met komon ed sikatayo ya aralen tan iyaplika itan ed sayan maatap ya agew a panagpulong na Panarian!

16. Anto so komaliman nengneng na sagradon sekreto, tan anton kimey so nagawan mapatnag ed satan?

¹⁶ Diad ebat ed inmunan-siglon panagpulong, say komaliman nengneng na sagradon sekreto ed 1 Timoteo 3:16 so nagmaliw a bantog a tuloy a mapatnag. Natan si Jesus “so sinisia ed mundo.” Saya so nansumpalan na singa-Kriston maridios a debosyon a masimoon iran misionero, a pati di Pablo tan Timoteo. Inawit daray maong a balita ed Asia Minor tan Europa, palagi ya anggad Espanya, tan ed Bukig ya Aprika ed panamegley na sangi na abautismoan ya Etiope, legan a nanlingkor si Pedro ed Babilonia.

17. Akin a si Jesus so sinisia ed interon modernon mundo?

¹⁷ Anto so nipaakar ed agew tayo? Nanlapulad 1919 say alanaan a nakdaan so mangipapanengneng na alimbawan maridios a debosyon. Amalagey a mabiskeg irayan alanaan ed say letnegan a pananisian inletneg nen Jesus. Nagkalautla nanlapulad 1935, nantugyop ira na baleg ya ulop, a nandayew ed ilalon makaliktar ed “baleg ya irap” tan mangayaga ed andi-anggaan a bilay ed sakey a paraison dalin. (Apocalipsis 7:​9, 14) Sirin, say maong a balita a nipaarap ed si Jesus so sinisia ed interon modernon mundo. Diad maridios a debosyon, ngalngali 3,700,000 iran Tasi nen Jehova so manpupulong natan tan onaaligwas ed kaliber-liber na globo!

18. Panon a si Jesus so “naawat ed tagey ed gloria”?

¹⁸ Nakera ni so sananey a nengneng na satan a sagradon sekreto, say komanem: Si Jesus “so naawat ed tagey ed gloria.” Legan na 40 iran agew kayarin binmilay ed espiritu, si Jesus so nankinon too iran laman, pinmarungtal ed saray babangatan to tan ibabaga ed sikaray “bengabengatlan nipaakar ed panarian na Dios.” Insan to amatagey ed tawen. (Gawa 1:3, 6-9) Say pikakasi to, a nikurit ed Juan 17:​1-5, sirin so naebatan: “Ama, . . . igloriam so anak mo, pian say anak igloria to ka . . . Siak so angigloria ed sika . . . Et natan sika, Ama, igloria mo ak ed laktip ed inkasika ed samay gloria a wala ed sikata nen andi ni mundo.”

19. Anto so niulop ed impawil nen Jesus ed tawen?

¹⁹ Agaylan baleg a gayaga so walan niulop ed impawil nen Jesus ed tawen! Asasakbay ni, sanen inletneg nen Jehova so dalin, “amin na saray anak na Dios so ginmapon imeyag lapu ed liket.” (Job 38:7) Nagkalalo ni ed saraman ya anghelikon managparawes et ababaleg ya aliketan a mangabrasa lamet ed matoor a Tsampyon na inkasoberano nen Jehova ed limog da!

20. Akin a si Jesus so anawir ed ontan lan amasudsurin a ngaran, tan anto so ginawa to kaleganan a wadia ed dalin?

²⁰ Diad Hebreo 1:3, 4, inkuan nen Pablo ed mananalon si Jesus: “Kayarin alinisan toray kasalanan tayo imyorong ed kawanan na Ari ed nipatagey a pasen. Kanian nagmaliw a mag maong nen saray angel, diad laknab ya anawir na sakey a ngaran ya amasudsurin nen say sikara.” Nawat nen Kristo itan a ngaran lapud impanalo to ed ag-inkatunong. Sayan Anak na Dios so tuan angiyuna a mangilukas na dalan ed maridios a debosyon dia ed dalin. Sikatoy angiletneg met na sakey a padron para ed amin na saray arum a makadampot ed andi-anggaan a bilay. Tekep na inkitandoro nen Jesus ed nikawanan na Dios ed tawen, say sagradon sekreto na sayan maridios a debosyon so niparungtal ed amin a nengneng to.

Panon So Pangebat Yo?

◻ Anto so “maridios a debosyon”?

◻ Panon a si Jesus so “nipatnag ed laman” tan kayarin “niyabawag a matunong ed espiritu”?

◻ Ed anto iran angheles a nampanegneng si Jesus, tan tekep na anton mensahe?

◻ Panon a si Kristo so “nipulong ed limog na saray nasyones” tan “sinisia ed mundo”?

◻ Kapigan a si Jesus so “naawat ed tagey ed gloria,” tan kayari na impanggawa na anto nipaakar ed maridios a debosyon?