Panagaral ed Sagradon Sekreto na Maridios a Debosyon
“Anggan si Kristo so nanirap para ed sikayo, ya angitilak na sakey ya ehemplo ed sikayo pian tomboken iray bakat ton maapit.’—1 PEDRO 2:21.
1. Anto so gagala nen Jehova no nipaakar ‘ed sagradon sekreto na maridios a debosyon’?
“SAY sagradon sekreto na sayan maridios a debosyon” so agla sakey a sekreto! (1 Timoteo 3:16) Agaylan satan so niduma ed saray sekreto na palson relihyon, singa say mystikon Trinidad, a siansianin sekreto! Anggapon balot so makatalos ed satan. Imbes, ginagala nen Jehova a satan a sagradon sekreto so niparungtal ed persona nen Jesu-Kristo a nepeg a naitdan na sankalaknaban a panangipalapag. Nagmaliw a manunan alimbawa si Jesus a mismo a sakey a masimoon a manangibawag na Panarian na Dios. Naaralan tayo ni dakel ed mensahe to tan dalan na panagpulong, unong a nanengneng tayo la natan.
2. Akin a say panagminestro nen Jesus so niyuna nen say dondon? (Mateo 20:28)
2 Mangiyan tayo na nagkalalon pangonsidera, sirin, ed si Jesus a “nipatnag ed laman.” (1 Timoteo 3:16) Diad Mateo 20:28 nabasa tayo a satan a Jesus so “sinmabi, ya aliwan panlingkoran, noagta pian manlingkor tan pian iter to so kamarerwa to a dondon ya onsalat ed amayamay.” Saya ingen so mangyang ed panaglinkor to a manuna nen say dondon. Akin ya ontan? Bueno, dia ni ed Eden say masilib ya Uleg so akisangsangan ed kanepegan na inkasoberano nen Jehova ed katooan, ipapanengneng a say palsa na Dios so aderal tan diad silong na subok anggapoy toon makabenben na katooran to ed Sankatageyan. (Ipareng so Job 1:6-12; 2:1-10.) Say andi-kabalawan a ministeryo nen Jesus bilang ayadyarin too, “say unor ya Adan,” angipanengneng a say manag-angat a si Satanas so marelmeng a managtila. (1 Corinto 15:45) Niarum ni, naspot a pinaneknekan nen Jesus so kualipikasyon to a manlingkor bilang “Manunan Ahente tan Manangilaban” tan pian “mangukom ed atooan a dalin diad inkatunong,” diad pangialangon ed inkasoberano nen Jehova.—Gawa 5:31; 17:31.
3. Panon a kompleton sinuppiat nen Jesus so angat nen Satanas?
3 Kompleton asuppiat nen Jesus so mabalaw ya angat nen Satanas! Diad amin ya awaran na too, anggapoy too ed sayan dalin a nanlingkor ed Dios na ontan lan debosyon—anggaman walaray panludlurey, panleglemew, tan pisikal tan mental a panamairap. Nepeg a mansungdo si Kristo ed mabalaw a panangakusa bilang Anak na Dios. Diad amin na saratan—angga ed marelmeng tan makapabaing ya impapatey—sikato so nansiansia, tan agnagiing ed katooran to ed Ama to. Diad Filipos 2:8, 9, insulat itan nen Pablo lapud tinmolok si Jesus ‘ya anggad ipapatey, on, ipapatey ed panamairapan a kiew, ya intandoro na Dios tan initdan to na ngaran a matulanggaring ed ami-amin a ngaran.’ Imparungtal nen Jesus si Satanas bilang maditan matila!
4. Akin a nayaryan nen Jesus ya ibaga ed si Pilato a sikatoy linma ed mundo a mantasi ed katuaan?
4 Sirin, diad kasampotan ed pigaran taon na impasyan panagpulong, matalek a makapantasi si Jesus ed si Pontio Pilato: “Sikan mismo so mangibabagan siak so Ari. Nisesengeg ed saya siak so nianak, tan nisengeg ed sayan gagalan siak so linma ed mundo, pian tasian ko so katuaan. Balangsakey a wala ed dapag na katuaan so ondengel ed boses ko.” (Juan 18:37) Impanengneng nen Jesus so superlatibon maridios a debosyon ed panangibawag ed katuaan na Panarian na Dios ed interon Palestina. Impasal toray babangatan a masimoon a managpulong met. Agaylan say alimbawa to so mamayobo ed sikatayon ontombok ed saray bakat to natan!
Manaral a Manlapud Alimbawa Tayo
5. Anto so naaralan tayo nipaakar ed maridios a debosyon diad inengneng a mapeget ed si Jesus?
5 Diad maridios a debosyon tayo ed panggawa ed linawa nen Jehova, napaneknekan tayo met a say Diablo et matila. Antokaman iray subok a paniirapan tayo, anggapoy makasimbang ed saray irap tan insulton naeksperiensa nen Jesus. Sikatayo komon, sirin, so manaral a manlapud Alimbawa tayo. Unong a say Hebreos 12:1, 2 ipasakbay to ed sikatayo, a batiken tayo komon so babatiken a tekep na sungdo “unong ya onnengneng tayo ed Manunan Ahente tan Manag-ayadyari na pananisia tayo, si Jesus.” Aliwan singa si Adan, a sinmaew sanen asubok ed maridios a debosyon to, nagmaliw a too ed dalin si Jesus ya akabet ed amin a subok ya ayadyarin tuloy. Anggad patey, pinaneknekan ton “matoor, andi-kasalanan, andi tilol, a nisian ed saray managkasalanan.” (Hebreos 7:26) Diad andi-kabalawan a katooran, naibaga to ed saray kakabusol to: “Siopa ed sikayo so makapangipatnag a nankasalanan ak? Impuktal nen Jesus ed si Satanas so angat to, diad pangiyabawag a: “Say manueley na mundo . . . andian na panamenben ed siak.” Tan ed panampot ed kaunoran a paliwawa to ed saray babangatan to sakbay na impangiawat ed sikato tan aresto, inkuanto ed sikara: “Manpakpel kayo! Tinalok so mundo.”—Juan 8:46; 14:30; 16:33.
6. (a) Akin a kabat nen Jesus no anton nengneng na represko so kakaukolanen na katooan? (b) Diad anton laknab ya impanengneng nen Jesus so maridios a takot?
6 Kaleganan a wala ed laman diad dalin, naeksperiensia nen Jesus no anto so magmaliw a too, “sakey a mas-abeba nen saray angheles.” (Hebreos 2:7) Akabatan toray kaleteyan na too tan sikato sirin so makanepegan a manlingkor bilang Ari tan Ukom na katooan ed loob na sanlibon taon. Sayan Anak na Dios, ya angibagan, “Galayo ed siak, sikayon nabebelatan tan napapairapan, tan represkoan ta kayo,” kabat to no anton nengneng na represko so kakaukolanen na katooan. (Mateo 11:28) Ibabaga na Hebreos 5:7-9 ed sikatayo: “Diad saray agew a sikatoy silalaman si Kristo so kinmerew na pikakasi tan pikekerew ed saman a Sakey ya amakayarin angiliktar ed sikato a manlapud patey, a tekep na mabiskeg a tagleey tan saray lua, tan sikato so nadngel lapud masanton panaglikas to. Anggan sikato so Anak, inaral to so katotolok lapud saray bengatlan intepel to; tan kayarin sikatoy agawan ayadyari [ed katotolok] nagmaliw a sikatoy responsable ed andi-anggaan a kilalaban ed saraman ya amin ya ontolok ed sikato.” Agtinmunda si Jesus, anggaman sikatoy akaukolan a mansungdo ya anggad punto’y pakaeksperiensia na ipapatey ed pangawat na “sugat ed mukor’ a manlapud mauges ya Uleg. (Genesis 3:15) Singa si Jesus, lawas mangipanengneng tayo komon na maridios a takot, ya anggad ipapatey no nakakaukolan a naeksperiensia, a matalek a dengelen nen Jehova iray tagleey tayo tan gamoran to itayo na kilalaban.
‘Manbilay ed Inkatunong’
7. Unong ed 1 Pedro 2:21-24, anton modelo so intilak nen Jesus ed sikatayo, tan panon a lanoren itayo na kundang to?
7 Legan a niparungtal ed laman, matoor a tuloy ya inlukas nen Jesus so sagradon sekreto ed maridios a debosyon. Nabasa tayo ed 1 Pedro 2:21-24: “Anggan si Kristo so nanirap ed sikayo, ya angitilak na sakey ya ehemplo ed sikayo pian tomboken iray bakat ton maapit. Agnanggawa na kasalanan, nisay naromogay katilolan ed sangi to. Sanen sikatoy napapairap, agto binmales na panamairap. Sanen sikatoy papasegsegangen, agto nansigensigen, noagta intarok toy inkasikato ed saman so mangukom na matunotunong. Nilegpet ton mismo iray kasalanan tayo ed dilin laman to diad kiew, pian naekal iray kasalanan tayo tan manbilay ed inkatunong.” Legan a sikatayoy mandalepdep ed kundang nen Jesus, agaylan pasesegen to itayon ontombok ed maridios a debosyon, a mansiansian matoor, tan manbilay ed inkatunong a singa ginawa to!
8. Panon tayon manbilay ed inkatunong a singa ginawa nen Jesus?
8 Tuan nambilay si Jesus ed inkatunong. Impasakbay na Salmo 45:7 so nipaaakar ed sikato: “Inarom so inkatunong tan ginulam so kaugsan.” Diad impangiyaplika ed saraman a salita ed si Jesus, imbaga nen apostol Pablo ed Hebreos 1:9: “Inarom so inkatunong, tan binusol mo so kaugsan.” Diad liwawa na pakatalos tayo ed say sagradon sekreto na sayan maridios a debosyon, komon aligen tayo si Jesus a lawas mangaro no anto so matunong tan busolen no anto so mauges. Diad Kristiano iran moral, agaylan belat iray panamairap ed silong na mundo nen Satanas, tan ed amin a pidedeneng tayo ed saraman so wala ed loob tan paway na organisasyon na Dios, a mandiside itayon manbilay ed inkatunong, mamenben ed maptek iran prinsipyos nen Jehova. Tan komon mantultuloy tayon manpiesta ed Salita na Dios pian nawalaan tayo na maridios a pakatalos ya importantin tuloy ed pangipulisay ed Diablo tan saray pakana to.
9. Anto so angarum ed simoon nen Jesus ed ministeryo, tan lanoren na saya so anto no nipaakar ed palso iran relihyoson pastol?
9 Wala ni sakey a bengatlan amayobo ed si Jesus a magmaliw a masimoon ed ministeryo to. Anto itan? Diad Mateo 9:36 nabasa tayo: “Et sanen anengneng toray dakerakel a totoo inabagey to ra, lapud maermen tan abuybuyak ira a singa saray karnero ya anggapoy pastol.” Kanian si Jesus et “ginapoan to so nambangat ed sikara na amayamay a bengabengatla.” (Marcos 6:34) Diad kapilitan, saya nanlanor ed pangiparungtal na kaugsan tan karelmengan na saray palson relihyoson pastol. Unong ed Mateo 15:7-9, inkuan nen Jesus ed pigara ed saraya a: “Sikayon masimpisimpitan, matukotukoy so impangipropesiya nen Isaias ed sikayo, sanen inkuanto, ‘Sayan baley so mangigagalang ed siak ed saray bibil da, ingen say puso ra so arawi ed siak. Andi-kasalanan so pandadayew da ed siak, lapud ibabangat daray bilin na totoo a bilang doktrina.’”
Sakey a Makapadimlan Misteryo
10. Natan, “say misteryo na sayan karawalan” so nipaarap ed siopa, tan ed anto a nagogonigon ira?
10 Unong a nansalitan sumpa si Jesus ed palso iran relighyoson papangulo, sirin sumpaen tayo so makapadimlan misteryo a mapat-patnag a misonian ed sagradon sekreto na maridios a debosyon. Diad 2 Tesalonica 2:7, tinawag itan nen Pablo a ‘say misteryo na sayan karawalan.” Saman so sakey a misteryo nen inmunan siglo K.P. lapud agnayarin iparungtal ya anggad andukey a panaon kayarin ompatey iray apostoles. Natan, nipapaarap itan ed klero na Kakristianoan, a mas interesado ira ed politiko nen say pangibawag na maong a balita na matunong a Panarian na Dios. Pansimpisimpitan so ontalona ed sikara. Saray ebanghelisador ed saray telebisyon na Protestanten Kakristianoan iran sekta so sakey a mapatnag ya alimbawa: totoon mankunkuwanan ya intelehenti ed saray pulok da, angipaalagey na saray minilmilyon-dolyar ya imperyo, mimomoyong ed saray balangkantis, mannangis a singa buwaya sano sikaran mismo’y niparungtal, tan mansiansian mipayabol para ed kuarta, lawas a mas dakel nin kuarta. Say Vaticano na Katolisismon Romano so mangipanengneng met na parehon makapoy a retrato, tekep na anggapoy-konsiensia iran koneksyon ed politika, akinpaway a kagalangan, tan marutak iran panaagamil ed bangko.
11. Anto so nagawa ed klero na Kakristianoan tan ed amin a kabiangan na Babilonian Baleg?
11 Agpankelawan a say kleron klase na Kakristianoan so aturon “say too na karawalan”! (2 Tesalonica 2:3) Sayan manunan kabiangan na mala-balangkantis a Babilonian Baleg so naspot a niparungtal tan naderal, a tekep na amin a nakekeraan a palson relihyon. Unong a nabasa tayo ed Apocalipsis 18:9-17, saray politiko tan managlako (tan saray bumabangko ra) so mannangis: “Kasila, kasila, sika a baleg a syudad!” Diad saman a bekta say Babilonian Baleg tan saray misteryo to so nipatnag, a direksan kasonian na amin a malinew a niparungtal na sagradon sekreto ed maridios a debosyon.
12. Say panangaro nen Jesus ed inkatunong so angitonton ed panggawa to na anto?
12 Say panangaro nen Jesus ed inkatunong tan panamusol ed kaugsan so angitonton ed sikaton mangunaet ya impasya ed biang na tuan panagdayew. Diad inmunan dalaw to ed Jerusalem bilang say alanaan ya Anak na Dios, pinapaway nen Kristo iray managtagilako tan managpabayes na kuarta ed templo, angibawag ya: “Ekal yo dia so sarayan bengatla! Agyo gawaen so abung nen Amak ya abung na tagtagilako!” (Juan 2:13-17) Diad saginonor a dalaw ed templo, imbaga nen Jesus ed saray onsusumpan Judios: “Sikayo so nanlapu ed si ama yon Diablo, tan kaliktan yon gawaen iray pilalek na ama yo. Satan a sakey so managpatey sanen sikato so ginmapo, tan agtinmalindeg a malet ed katuaan, ta anggapo ed sikato so katuaan. Sano sikato so mansalita na tila, mansalita nipaakar ed kayarian to, lapud sikato so matila tan say ama na tila.” (Juan 8:44) Agaylan tepel so impanengneng nen Jesus ed pangibabaga ed saraman a relighyonista ed arap-arapan a sikaray matila tan ananak na Diablo!
13. (a) Iner a nikadkaduman nibalikas nen Jesus so panamusol to ed karawalan? (b) Akin a saray marelmeng a klero so makanepegan ed mipadparan pangukom a satan so niyabawag nen Jesus ed saray eskribas tan Pariseos?
13 Say panamusol nen Jesus ed karawalan so nagkalalon imbalikas ed makatiknan panangatake ed maditan eskribas tan Pariseos, unong a nikurit ed kapitulo 23 na Mateo. Diman imbalikas toray aminpiton “ey-ey,” a nipareng ed ‘pinaputin lubok—a napno na amin a karutakan, pansimpsimpitan, tan kaugsan.’ Agaylan panpirawetan nen Jesus ya iliktar iray apairap a totoo a manlapud karawalan! “O Jerusalem, Jerusalem,” a sikatoy kinmelyaw, “agaylan aminpigapigan nilabay kon tiponen iray anak mo, a tiponen a singa sakey a nganak a tiponen toray siwsiw to ed silong na saray payak to! Ingen agyo nilabay itan. Nia! Say abung yo so nataynan ed sikayo.” (Mat 23 Bersikulo 37, 38) Say marelmeng a klero ed say agew tayo so makanepegan ed mipadparan panangukom lapud, ed saray salita na 2 Tesalonica 2:12, ‘ag-ira anisia ed katuaan balet ta nangayaga ed ag-inkatunong.’ Say karelmengan da so say mogmong kasonian na maridios a debosyon a satan so matoor a tuloy ya impanengneng nen Jesus kaleganan a wadia ed dalin.
Panangibawag na Panangukom na Dios
14. Say apresasyon ed sagradon sekreto na maridios a debosyon so mamakiwas ed sikatayo a manggawa ed anto?
14 Say apresasyon tayo ed sagradon sekreto na maridios a debosyon so nepeg a mangitonton ed sikatayo ya ontombok ed saray bakat nen Jesus a maapit. Singa sikato, nepeg a masimoon tayon mangibawag no anto so idediskribe na Isaias 61:2 unong a “say taon na panamalangkap nen Jehova tan say agew na kababales na Dios tayo.” Tan gawaen tayo komon a masimoon a tuloy so biang tayo “a manligliwa ed amin a managogol.” Unong a sanen si Jesus so wadia ed dalin, manpakpel tayo natan a mangiyabawag ed panangukom nen Jehova, a pati say mabiskeg iran mensahe a sinalita ed saray artikulo na Panag-Bantayan tan ed libron Revelation—It’s Grand Climax At Hand! Nepeg itayon manpulong a sitetepel tan mataktika, saray salita tayon “atekepan na asin” pian mananam ed saraman so onkiling ya ondengel ed inkatunong. (Colosas 4:6) Diad impakaaral ed alimbawa nen Jesus ed maridios a debosyon, makayari tayo komon a mangireport ed asingger lan arapen ya asumpal tayo so kimey ya inter nen Jehova ed sikatayon gawaen.—Mateo 24:14; Juan 17:4.
15. No nipaakar ed sagradon sekreto na Dios, anto so agawa nanlapulad 1914?
15 Kaleganan a nipatnag ed laman, agaylan Alimbawa si Jesus! Agaylan malinlinew ya asumpal so sagradon sekreto na maridios a debosyon ed sikato! Agaylan sitetepel ton apagalangan so ngaran nen Jehova! Tan agaylan makapakelaw a say Ama nen Jesus et pinalangkapan to lapud manamenben-na-katooran a kundang to! Ingen wala ni so dakel nipaakar ed sagradon sekreto na Dios. Nanlapulad 1914 sikatayo la so manbibilay ed “agew na Katawan.” (Apocalipsis 1:10) Unong ya ibabaga na Apocalipsis 10:7, sikato so panaon para ed ‘sagradon sekreto na Dios unong ed maong a balitan nitarok ed kasumpalan.’ Mangatatawen iran boses so angiyabawag natan a: “Say nanarian na mundo agawa ran nanarian na Katawan tayon [si Jehova] tan si Kristo to, tan manuley ya ari ed ando lan ando.” (Apocalipsis 11:15) Introno nen Jehova so Mesianicon Ari, si Jesu-Kristo, ed maglorian trono to pian miuley ed Sikato!
16. Panon a say balobalonin nitronon Ari, si Jesu-Kristo, a tamtampol a mangipanengneng na panangikuenta to ed inkadios ed tawen?
16 Bilang miuley ed Dios ed balon nianak a Panarian, si Jesus so atawag met a Miguel (a kabaliksan toy, “Siopa So Singa Dios?”). Anggapoy sumusumpan makatalona ed pagmaliw a singa Dios, tan say balobalonin nitronon Ari et tampol ya angidemostra ed saya diad impangibasileng ed daan ya Uleg, si Satanas, tan saray angheles ed dalin. (Apocalipsis 12:7-9) On, walaan na panamagalang si Jesus ed inkadios ed tawen, unong ya impanengeng to so maridios a debosyon kaleganan a wadia ed dalin. Say niglorian Jesu-Kristo so ag-untunda ya anggad apagit toy palson relihyon tan kompleton napaandiy organisasyon nen Satanas, nanengneng tan agnanengneng.
17. Nanlapulad 1914, anto la so nagagawa ed panumpal ed Mateo 25:31-33?
17 Nanlapulad 1914 a say inkasumpal na dilin propesiya nen Jesus ed Mateo 25:31-33 so masindag ya angipanengneng na sagradon sekreto na Dios. Diman inyabawag nen Jesus: “Sano onsabi so Anak na too ed gloria to, tan kaulop toray amin ya angheles, samanlan onyorong ed trono na gloria to. Tan natipon naani ed arap toray amin a nasyon, tan panbibiiganen toray totoo ed sakey tan sakey, a singa say pastol et ibiig to so karnero a manlapud saray kanding. Tan ipasen toy karnero ed nikawanan a lima to, balet saray kanding ed nikawigi to.” Manlapud mabentahan pasen to ed tawen, sayan maglorian Ari, Ukom, tan Manangiyalibansa na maridios a debosyon so mangitarok na ibabales, ununa ed too na karelmengan tan arum iran kabiangan na Babilonian Baleg, tan insan ed amin a nakekeraan iran elemento tan malakanding iran managsuporta na mauges a mangaraldalin ya organisasyon nen Satanas. Insan niiyan si Satanas ed kalinsurong. (Apocalipsis 20:1-3) Ingen saray malakarneron “matunong” so makaliktar ed andi-anggaan a bilay. (Mateo 25:46) Komon ta say pangiyalibansa yo ed maridios a debosyon et mangipasen ed sikayo diad satan a maptek a grupo!
18. Anto so walan magayagan pribelihyo ed sikatayon gawaen a miulibay ed sagradon sekreto na maridios a debosyon?
18 Pasesegen tayo na Apocalipsis 19:10 a “mandayew ed Dios.” Tan akin? Ituloy na kasulatan: “Ta say pantasi nen Jesus sikato so espiritu na panpropesiya.” Agaylan dakel iray inpuyan a propesiya ed inmuna iran panaon a mantasi ed si Jesus! Tan unong a sarayan propesiya et asumpal, say sagradon sekreto na Dios so magmaliw a malinlinew a singa kristal. Mangayaga tayo, sirin, a nakabatan a satan a sagradon sekreto ed maridios a debosyon so sinmabi ed sikatayo diad persona nen Jesus. Makapakelkelaw ya apribilehyoan tayon ontombok ed say bakat to bilang mapaabeba iran ministro na Panarian na Dios. On, sikatayo so apagalangan a mibiang a mantalos tan mangiyabawag ed amin na sagradon sekreto na Dios unong ed maong a balita!
Panon So Pangebat Yo
◻ Anto so naaralan tayo malapud alimbawa nen Jesus ed maridios a debosyon?
◻ Panon tayon manbilay ed inkatunong unong a ginawa nen Jesus?
◻ Anton makapadimlam misteryo a mapatnag a misonian ed sagradon sekreto na maridios a debosyon?
◻ Say apresasyon tayo ed sagradon sekreto na maridios a debosyon so mamakiwas ed sikatayon manggawa na anto?
[Litrato ed pahina 14]
Bilang sakey a manangiyalibansa na maridios a debosyon tan sakey a masimoon a mangiyabawag na Panarian, nayaryan ya ibaga nen Jesus ed si Pilato a: “Diad saya a siak so inbaki dia ed mundo, pian siak so mantasi ed katuaan”
[Litrato ed pahina 16]
Nibalikas so maridios a debosyon nen Jesus sanen binaat toray eskribas tan Pariseos