Onnengngneng ed Labas na Ginawa-na-Toon “Kareenan tan Kaligenan”

Say katuaan et agbalot nitarok na too so peteg, magnayon a kareenan. Akin ya andi? Lapud saray totoo et aliwan peteg a mananumlang na deen, anggaman minabang ira ed kasalanan lapud amantsaan na dala ya awaran da. Say peteg a mananumlang na deen so mas makapanyari nen say too. Anggapoy arum noag si Satanas a Diablo, ya adeskribe ed Biblia a bilang “mamapalikdo ed interon panaayaman a dalin.”​—Apocalipsis 12:9.

IKUAN na Biblia: “Say interon mundo so mandukdukol ed pakayari na sakey [Satanas] a marelmeng.” (1 Juan 5:19) Kanian, say pakagamor na tuan deen tan magnayon a kaligenan so nepeg a managlawi ed kapagit nen Satanas manlapud eksena a pati say sistema na mundo a walan inletneg to tan ontanlan mapatnag a babanlongan to. (Ipareng so Isaias 48:22; Roma 16:20.) Agnagawaan iya na totoo.

Sirin, panon a nagamoran so kareenan tan kaligenan? Diad panamegley na pakayari na Sakey ya andi-geter a mas mabiskeg ni nen si Satanas. Walan angigeter so Makapanyarin-amin a Dios na panaon a pangganga ed kimey nen Satanas ed limog na katooan. Sano onsabi itan a panaon a pangganga, insan “biglan kadederal” so onsabi ed mundo a mandukdukol ed pakayari nen Satanas. (1 Tesalonica 5:3-7) Amin ya ebidensya so nipaarap ed konklusyon a saya et asingger lan nagawa.

Kareenan tan Kaligenan Natan!

Anggaman kuan, komusta natan? Sakey a sukat na tuan kareenan tan kaligenan so posibli met natan. Panon? Aliwan singa saray sinali la na relihyoson papangulo, diad pibabali ed saray politiko na sayan mundo, noagta, imbes, diad panumbok ed saray ganggan tan konseho na Dios.

Kasin say ontan a kurang so peteg a mamawala na deen? On, peteg. Alimbawa, walan asubok la na saray Tasi nen Jehova tan nalmoan a peteg a posibli a mangayaga ed puron deen tan ontan met ed sukat na kaligenan. Unong a niparungtal ed Biblia say itutumbok ed saray ganggan na Dios so walan amasakey ed sikara a bilang internasyonal ya organisasyon ed tuan deen, antokaman so rasa ra, nasyonalidad, odino lenguahe.​—Salmo 133:1.

Diad katutulok ed dibinon ganggan, walan simbolikon ‘pinitpit [da] iray kampilan ya impagmaliw a komkompay tan aglara manaral na bakal.’ (Isaias 2:2-4) Manlikna ra na inkaligen ed aro na Dios tan walaan na talek a saray espiritual ya agagi ra so mapaga parad sikara. (Roma 8:28, 35-39; Filipos 4:7) No panduaruwan yo no kasin saya so tua, imbitaan mi kayo a bisitaen ira ed sakey ed saray Kingdom Hall da tan nengnengen yon mismo.

Sankamundoan a Kareenan tan Kaligenan

Anggaman ontan, saya so aliwan unor a kasumpalan na sipan na Biblia ed kareenan tan kaligenan. Maseguron andi! Pamatnagan lambengat itan ed pagmaliwan na sayan mundo no amin et ontumbok ed saray ganggan na Dios. Diad asingger la satan a pamatnagan so magmaliw a katuaan.

Inkuan nen apostol Pablo: “Kapiganman a sikaray [saramay agmanlilinkor ed Dios] so mangikuan: ‘Kareenan tan kaligenan!’ [manisisip a walan nitarok da ed kaunoran so kareenan tan kaligenan ed dilin dalan da] insan biglan kadederal so onsabi ed sikara.” (1 Tesalonica 5:3) Asabin desisyonan la na Dios a si Satanas et walan abayag lan amalikdo ed katooan. Panaon la sirin a sikato so ekalen ed pasen na pankikiwasan, a pati ed abulok a sistema na mundo a walad pakayari to. Kayari to panaon la na kasumpalan na propesiya nen Daniel: “Diad saray agew na saraman ya arari say Dios na tawen so mangiletneg na panarian ya agbalot naderal. Tan satan a Panarian so agbalot niiter ed sananey a baley. Buyakbuyaken to tan panganggaen ton amin irayan panarian, tan satan a mismo so mansiansia lawas.”​—Daniel 2:44.

Kasin agmaptek iyan gawa ed biang na Dios? Absoluton andi. Say biglan kadederal so onsabi lambengat ed saramay manepeg ed satan unong ed pangukom na Dios, saray estandarte na Dios. Manmatalek kayo ta ed Amalsa a mandeside a mapmaptek ed sayan pamaakaran? Maseguron nipalima tayo so pamaakaran a maligeligen ed saray lima to! Tan anto so magmaliw a pansumpalan na panangukom a kimey to? Ikuan na uliran: “Saray maptek so manayam ed dalin, tan saray andi-tilol so natilak ditan. No nipaakar ed marelmeng, sikaray napegpeg ed mismon dalin.” (Uliran 2:21, 22) Wala ta so siopaman ya onermen ed kaandi na marelmeng?

Diad impangekal ed saray mananumlang na kareenan manlapud dalin, say peteg a kareenan tan kaligenan so betang na katooan ed sankadalinan ed leksab na manangunggunan uley na Panarian na Dios. “Ag-ira naani mamaunong odino mamagbag ed amin a masanton palandey ko; lapud say dalin so maseguron napano na pikakabat ed si Jehova unong a saray danum et sakbongan da so kadayatan.” (Isaias 11:9) Kasin sisiaen yo iyan sipan ed Biblia? Matalek kayo ta a sarayan bengatla et asingger lan nagawa? No walaan kayo na antokaman a panduaruwa, pasesegen mi kayon nagkalalon usisaen so bengatla. Diad katuaan to, say dalan na Dios so mogmon dalan a nagamoran na too so panpipirawatan a kalat a tuan kareenan tan kaligenan.

[Saray litrato ed pahina 8]

Pangagayagaan na saray totoo nen Jehova so tuan kareenan tan maabig a sukat na kaligenan natan