Kasin Nanonotan Mo?

Kasin nangayagaan mo so panbasa ed agano niran paway na Say Panag-Bantayan? No ontan, naromog mon makapaliket so pakanonot ed onggendan:

▫ Akin a pinili na saray espiyan Israelita a manpundo ed abung nen Rahab a balangkantis?

Saray Israelitan espiya so nambilay unong ed Ganggan na Dios, kanian sikaray agnanpundo ed abung nen Rahab lapud imoral iran katunongan. Inkatunongan da seguro a say kiwawala ra ed abung na balangkantis so agtanton mamawala na suspetsa ed syudad. A say abung to so nipaalagey ed padir na syudad et sengegay mainomay a pakabatik. Balet manuna ed amin, si Jehova so angiwanwan ed sikara ed sakey a managkasalanan a walaan na puson ontanlan naapektoan na saray salaysay na pidedeneng na Dios ed saray Israelita a sikatoy nagbabawi tan amasimbalo ed kabibilay to.​—12/15, pahina 24-5.

▫ Panon a say sanok et makaapekta ed bunigas tayo?

Ipapanengneng na saray impanaral a say sanok so mamapawala na saray stress hormone. Say mabetbet ya isasanok da so nayarin magmaliw a sengegan na ag-asimbang a manalimbeng tan makaderal iran porma na kolesterol, a sengegay mapeligron sakit ed puso.​—12/15, pahina 32.

▫ Antoran suhestion so ontulong ed sikatayon mamadaak na panangibunog na saray magasin a Panag-Bantayan tan Awake!?

Magmaliw a maisip ed Panag-Bantayan tan Awake!; pamasiansian simpli ed presentasyon; magmaliw a manangitukoy diad panparaan na pigaran antikey iran presentasyon; mangigeter na personal a kalat.​—1/1, pahina 24-5.

▫ Akin a si Moises so sakey a maabig a teokratikon alimbawan kaukolan a tumboken tayo?

Kinmerew si Moises na panangiwanwan ed si Jehova. Anggapo so personal iran ambisyon to noagta sikato so sinononot nipaakar ed kigloriaan nen Jehova. Sikato so walaan na mabiskeg a pananisia, tan agton balot nilingwanan a si Jehova so peteg a Manuley na nasyon na Israel.​—1/15, pahina 11.

▫ Antoray pigaran dalan ya ontatalona so madibinon bagat?

Say madibinon bangat so ontatalona diad pangitatarok ed totoo nen Jehova na progresibon pantalos ed katuaan. Satan so mangitatarok ed totoo diad espiritual a liwawa, tan ipapanengneng to ed saray mauyamo no panon a dayewen so Dios “ed espiritu tan katuaan.” (Juan 4:24) Say madibinon bangat so ontatalona met ed saray subok tan ed marelmeng a mundo.​—2/1, pahina 10-12.

▫ Anto so tombok na matalonan panagsimbawa?

Say tombok et say suston panagrespeto para’d sananey a too tan say kanepegan to a tratoen ed manamagalang a paraan. Kanian, say Kristianon managsimbawa so nepeg a mapangasi tan mapekder balet nepeg a kawesan so sisimbawaen tekep na panamagalang.​—2/1, pahina 28.

▫ Panon so impangaksobi na Iglesia Romano Katoliko ed Isesegep nen Maria bilang sakey a doktrina?

Diad inmuna iran siglo kayari impatey nen Jesus, say ideya ed Isesegep nen Maria ed tawaen so sigpot a balo ed makabat iran Kristiano. Anggaman ontan, kayarin nagmaliw ya opisyal a doktrina na iglesia so bangat na Trinidad, si Maria so naikdan na sakey ya onbabaleg ya importantin betang. Say teorya na Isesegep so agnaawat bilang bangat ya anggad insabi na Nobyembre 1, 1950, sanen si Papa Pious XII so angiyabawag: “Uukeran mi itan a bilang bangat ya imparungtal na Dios.”​—Munificentissimus Deus.​—2/15, pahina 26-7.

▫ Diad Jeremias kapitulo 24, anto so inrepresenta na duaran boksot na higos, saray maong ya higos, tan saramay mauges ya higos?

Saray maong ya higos et inrepresenta ra iray Judio a diad inmuna et akautibo ed Babilonia, a say nakdaan da et ompawil ed Juda. Saray mauges ya higos so angiretrato ed si Arin Zedekias tan saramay kaulop ton nanrebildi sumpad Arin Nabucodonosor diad impamuyak na samba ed ngaran na Dios. Diad mipadparan dalan, naromog tayo ed modernon panaon so nakdaan ya espritual ya Israel, a mamapawala na maong iran bunga ed saray bilay da, a miduma ed saray klero na Kakristianoan, a mamapawala na abulok a bunga.​—3/1, pahina 14-16.

▫ Sioparay Quartodecimans, tan akin a makapainteres iya ed Kristianos natan?

Kayari panaon na saray apostol, walaray nanimaton ed Pangdem na Katawan ed Nisan 14 na kada taon, a manutumbok ed apostolikon padron. Sikaray akabatan bilang “Koma-labin apat,” odino “Quartodecimans.” Saya so makapainteres natan, ta ipapanengneng to ya anggan kayari impatey na apostoles et walaray pigaran manggawa na suston paraan na panagngilin ed impatey nen Jesus ed Nisan 14 na kada taon.​—3/15, pahina 4-5.

▫ Siopa si William Whiston?

Sikato so sakey ya ekselentin iskolar ed koma-18 a siglo ed Inglatera, maapit a kalimog nen Sir Isaac Newton. Impatalos nen Whiston so Kristianon Griegon Kasulatan, mabetbet ton sinuppiat so bagat na doktrinan Trinidad, tan datin managsalaysay ed astronomya tan matematika. Balet si Whiston so talagan atandaan lapud impangipatalos to ed Ingles na saray sulat na Judion manag-awaran a si Flavius Josephus.​—3/15, pahina 26-8.

▫ Panon a say too so agawa ed indengan na Dios? (Genesis 1:27)

Say too so agawa tekep na abilidad a mangagamil na matalonggaring iran kalidad na Dios ya aro, inkahustisya, kakabatan, tan pakayari​—ontan met ed arum niran kalidad.​—4/1, pahina 25.