No Anto so Ibaga Nipaakar ed Saray Magasin

Say Panag-bantayan Ene. 15

“Lapu ed amin a nagagawan panagpaagus na dala, diad padesir yo, kasin mas ontatalona so kaugsan nen say kaabigan? [Abuloyan ya onebat.] Imanoen pa so ibabaga na Biblia nipaakar ed Dios. [Basaen so Salmo 83:18b.] Lapud say Dios so Sankatageyan ed interon dalin, peteg kasin ontalona so kaugsan? [Abuloyan ya onebat.] Sayan isyu na Say Panag-Bantayan so mangiiter na makapenek ya ebat ed satan a tepet.”

Awake! Ene. 22

“Aliwan singa nensaman, say seguridad tayo natan so nasesesga. Say pirmin pampapagaan natan et say tatawagen ya identity theft (panagtakew ed pakabidbiran na sakey a too). Kasin nadngelan yo la itan? [Abuloyan ya onebat.] Isisipan na Biblia ya onsabi panaon et naandi la ed dalin so amin a sesga ed seguridad tayo. [Basaen so Isaias 11:9.] Sayan magasin so mangipaliwawa no panon iyan nagawa.”

Say Panag-bantayan Peb. 1

“Pampapagaan na dakel a totoo natan so inkaandi na trabaho, tan arum so pirmin nadedesdes diad trabaho ra. Diad padesir yo, kasin posibli ni so magmaliw a maliket tan maligen diad trabaho? [Abuloyan ya onebat. Insan basaen so Isaias 65:21-23.] Sisingbaten na sayan isyu na Say Panag-Bantayan ya onsabi panaon et amin so nawalaan la na makapenek a trabaho.”

Awake! Peb. 8

“Sayan isyu na Awake! so mangirereport ed makapasinagem a katuaan ed panaon tayo​—say prostitusyon ed ugugaw. Isisipan na Biblia a sayan makapaermen a nengneng na panag-abuso ed ugugaw so magano lan mangangga. [Basaen so Uliran 2:21, 22.] Ipapanengneng na sayan magasin no siopay responsable ed sayan panagmaltrato ed ugugaw tan no panon met a napatunda itan.”