Pansiansiaen Iray Maabig a Rotina Pian Nagamoran so Daakan a Bendisyon
1. Akin a makagunggona so pangusisa ed espiritual a rotina yo?
1 Sanen nagmaliw kayon Kristiano, seguradon nansagpotan yo so pakawalaan na maabig a rotina ed espiritual iran kimey a mangilaktip ed panagaral na Biblia, saray Makristianon pantitipon, lawak na kimeyan, tan pikakasi. Bilang resulta na panamendisyon nen Jehova ed saray sagpot yo, binmulaslas kayo ed espiritual. Nayarin pigara lan taon so linmabas manlapu nen abautismoan kayo. Kasin pansiasiansiaen yo so maabig iran rotina ed espiritual a ginawa yo la sanen nagmaliw kayon Kristiano?
2. Panon itayon nagunggonaan ed inagew-agew a panagbasa na Biblia?
2 Usisaen so Rotina Yo: Kasin niyugali yo la so pambasa na sakey a parte na Salitay Dios ed kada agew? Daakan a bendisyon so nagamoran tayo ed satan! (Jos. 1:8; Sal. 1:2, 3) Diad Israel nensaman, kinaukolan a basaen na kada ari so kopya ton Ganggan dia “ed amin ya agew a pambilay to.” Antoray nagunggona to? Sikato so nawalaan na mapaabeban puso tan naaralan ton takotan si Jehova ta pian agto onkasipa ed saray ganggan To. (Deu. 17:18-20) Ontan met natan, say inagew-agew a panagbasa na Biblia so ontulong ed sikatayo pian mansiansia itayon andi-matik tan andiay-kasalanan ed sayan marelmeng tan mauges a mundo. Satan so makatulong met ed sikatayo pian sigpot itayon nakinlongan parad ministeryo.—Fil. 2:15; 2 Tim. 3:17.
3. Antoran gunggona so nagamoran tayo no regular itayon onatendi ed saray pantitipon?
3 Niyugali la nen Jesus so onloob ed sinagoga, a ditan sisingbaten so Kasulatan. (Luc. 4:16) Seguradon satan so amabiskeg ed sikato pian naarap to iray subok a sagmaken to. Napabiskeg itayo met ed espiritual iran bangat a ninanabang ed saray pantitipon ed kongregasyon tan ed makagunggonan ‘pampapasesegan.’ (Roma 1:12) Say pilimog ed saray agagi tayo so makatulong pian nasungdoan tayo iray kairapan ed sarayan kaunoran ya agew. (Heb. 10:24, 25) Kasin ugali yo nin siansia so onatendi ed amin a pantitipon?
4. Panon itayon nagunggonaan ed pibibiang ed lawak na kimeyan diad kada simba?
4 Ipapabitar ed sikatayo na apuyanan a salaysay ya akibiang iray apostol ed panangiyabawag na maong a balita ya “inagew-agew ed templo tan ed saray kaabungan.” (Gawa 5:42) Anggaman ag-itayo makapanpulong ed inagew-agew, sarag tayo kasi so mibiang ed sakey a nengneng na ministeryo ed kada simba? No ontan so gawaen tayo, seguradon magmaliw itayon mas epektibo ed pangusar na Salitay Dios, tan maseguron panliketan tayo iray makapaseseg ya eksperiensya ed pananginabang na katuaan na Biblia ed arum.
5. Akin ya importante so naynay a pampikasi ed si Jehova?
5 Daakan a bendisyon so agamoran nen propetan Daniel lapud sikatoy “naynay” a nanlingkor ed si Jehova diad interon bilay to. Laktipen na satan so niyugali to lan pampikasi a naynay ed si Jehova. (Dan. 6:10, 16, 20) Ontan met, no naynay itayon onaasingger ed si Jehova panamegley na impapuson pikakasi, sikatayo so palaboan to na masanton espiritu to. (Luc. 11:9-13) Niarum ni, si Jehova so onapit met ed sikatayo, ya abuloyan to itayon manggayaga ed maapit a pisisiglaotan ed sikato. (Sal. 25:14; Sant. 4:8) Agaylan abig a tumang! Panseetan tayo sirin a maong so pamasiansia ed maabig iran rotina ed espiritual ta pian nagamoran so daakan a bendisyon nen Jehova.