Saray Magasin Tayo—Denisinyo Parad Dakel a Bumabasa
1. Panon ya aaligen na matoor tan makabat ya aripen si apostol Pablo?
1 Singa si apostol Pablo ya intukoy toy paraan na impangipulong tod maong a balita pian nasagyat so “amin a klase na totoo,” uusaren na matoor tan makabat ya aripen iray publikasyon tayo pian napasabian so totoon nandurumay nanlapuan tan sisisiaen da. (1 Cor. 9:22, 23) Pian epektibo tayon nausar so Say Panag-bantayan tan Awake!, kaukolan ya amta tayo no parad siopa irayan magasin.
2. Parad siopa so Awake!?
2 Awake!: Sayan magasin et parad saray totoo a miparad saramay tinawag nen apostol Pablo a “lalakin taga Atenas.” (Gawa 17:22) Saraman a totoo et aliwan Kristiano, tan dagdaiset so amta rad Kasulatan. Mipadpara, say Awake! et parad saray totoon dagdaiset odino anggapoy amta rad Biblia. Ompan anggapoy ideya rad saray bangat na Kristiano, nayarin ag-ira tanto manmamatalek ed relihyon, odino ompan agda amta a wala manayay praktikal a nitulong na Biblia. Say manunan gagala na Awake! et pian kombinsien iray manbabasa ya walay tuan Dios. Ontan met, denisinyo iya pian pabiskegen so pananisia ra ed Biblia tan pian natalosan da ya duma iray Tasi nen Jehova ed arum ni ran relihyon.
3. Parad siopa so kada edisyon na Say Panag-bantayan?
3 Say Panag-bantayan: Say publikon edisyon na sayan magasin et parad saray manrerespeto met ed Dios tan ed Kasulatan. Wala met so amta rad Biblia balet ta aliwan dugay pakatalos dad saray bangat na satan. Mipara irad samay tinukoy nen Pablo ya “ontatakot ed Dios.” (Gawa 13:14-16) Say panaralan ya edisyon na Say Panag-bantayan et manunan parad saray Tasi nen Jehova. Inilaloan nen Pablo ya saramay nambasa ed sulsulat to et pamilyar ed Kasulatan tan walaan na suston pikakabat ed katuaan. (1 Cor. 1:1, 2) Ontan met natan, saray artikulo ed panaralan ya edisyon et parad saray onaatendid pantitipon tayo tan pamilyar ed saray ideya tan termino ya uusaren tayo ran Tasi.
4. Akin et kaukolan a pamilyar tayo ed kada isyu na magasin ya iyopresi tayo?
4 Anggaman duara so iyoopresi tayon magasin, sakey labat ed saratan so iprepresenta tayo. Kanian, kaukolan a pamilyar ka ed kada isyu. Diad ontan et magmainomay mon ipresenta so anggan dinan a punton paninteresan na nakatongtong mo.