Kasin Magmaliw Ka a Tasi na Tuan Dios?
“‘Sikayo so tastasik,’ kuan nen Jehova, ‘tan siak so Dios.’”—ISAIAS 43:12.
1. Akin a nepeg tayon dayewen so tuan Dios?
SAKBAY a tuloy na impatey nen Jesus, ‘intangay toray mata to ed tawen’ a manpikasi. Imbaga to ed samay Sakey a pampipikasian to a bilang “say alenleneg a tuan Dios.” (Juan 17:1, 3) Makatunongan, wala lambengat so sakey a mabilay tan tuan Dios, say Soberano na talba, say Manamalsa. Lapud utang tayo so kiwawala tayo ed tuan Dios, nepeg ya isaklang tayo ed sikato so dayew a kanepegan to. A singa ibabalikas na Apocalipsis 4:11: “Sika so manepeg, Jehova, a Dios mi, a mangawat na gloria tan say dayew tan say pakayari, lapud pinalsam so amin a bengatla, tan lapud linawam et sikara so wala tan apalsa.”
2. (a) Anto so makatunongan a sisiaen nipaakar ed tuan Dios? (b) Panon so pitalosan to ed saraman so malabay a mandayew ed sikato?
2 Makatunongan ya ilaloan a say tuan Dios so agmangiyabuloy ed ando lan ando ed mauges iran kipapasen a manederal ed mangaraldalin a palsa to. Tan makatunongan met so panisia a saray managdayew ed sikato so pakabatan to ed no anto so gawaen to tan anto so labay to ed sikara a gawaen sakbay ya idapo to so panangukom. (Amos 3:7) Panon so pitalosan to ed saray manag-anap na katuaan? Uusaren to so mabulos a totoo a bilang sangiyan to. “‘Sikayo so tastasik,’ kuan nen Jehova . . . ‘Sakbay ko et anggapo so Dios ya atibukel, tan mantultuloy ya anggapo. Siak—Siak si Jehova, tan nilikud ed siak et anggapo so manangilaban.’” (Isa. 43:10, 11) Balet panon so pakabidbir na sakey a too ed saraman so uusaren na tuan Dios a bilang tastasi to? Panon so piduma ra, tan say mensahe ra, ed saray managdayew ed arum a dirios?
Sakey ya Angat ed Arum a Dirios
3. Anton angat so impaarap nen Jehova ed amin nin arum a dirios?
3 Pinuyanan nen Jehova si Isaias a mangikurit ed sayan angat ed amin nin arum a dirios: “Siopa ed limog da [saray dirios na nasyones tan totoo] so makapangibaga ed sayan [sustosuston propesiya]? Odino kasin nagawa da itayon makadngel ya anggan diad saray ununan bengatla [a nagawa ed arapen]? Sikara [bilang dirios] so mamawala komon na tastasi ra, pian sikara [bilang dirios] so nayarin niyabawag a matunong, odino paulian ira [saray totoo na nasyones] ya ondengel tan mangikuan, ‘Sikato so katuaan!’” (Isaias 43:9) Sirin aangatan nen Jehova so amin a dirios a dadayewen na totoo a paneknekan dan sikara so dirios. Saray tastasi ra so nepeg a mamawala na ebidensya a saray dirios da so napanmatalkan tan manepeg a narayew.
4. Panoy pikabat tayo a saray dirios na kadaanan a nasyones so andi-kana?
4 Balet anto so pinawala na saratan a dirios tan saray managdayew da? Kasin impaarap da itayo ed peteg a kareenan, aligwas, bunigas, tan bilay? Papaneknekan na awaran a saray dakerakel a dirios na karaanan a nasyones so nansumpal ya andi-kakanaan tan andi-pakayari. Sikara so ag-anggan makapantultuloy a bilang puntirya na panagdayew, lapud sikara so anggapo ed kiwawala natan. Saray dakerakel a dirios na kadaanan ya Ehipto, Asiria, Babilonia, Medo-Persia, Gresya, Roma, tan arum iran nasyones so apaneknekan a tila. Sikara lambengat so wala ed saray libro na awaran odino diad saray museum a saray estatuwa ra so puntirya lambengat na inkamausisa.
5. Anto so nayarin itepet tayo nipaakar ed dirios na modernon panaon?
5 Ingen, kasin saray modernon dirios tan saray managdayew da so magmaong nen saray kadaanan? Say Hindun relihyon lambengat so walaan na saray nilaksalaksan dirios. Saray Budista, Katoliko, Confusyanista, Judio, Protestante, Shintoista, Taoista, tan dakel nin arum so walaan na saray dilin dirios da. Diad Africa, Asia, tan arum nin pasen, say puersa na natural, ayayep, tan saray kagkagawaan so dadayewen a bilang dirios. Say nasyonalismo tan materyalismo tan anggan say dilin inkatoo na sakey so nagmaliw a dirios, a saray dakel a totoo so mangiiter ed sikara na manunan debosyon da. Dinan a panagdayew so peteg a mangirerepresenta ed sakey a mangibabaga: “Siak si Jehova, tan anggapo so sananey. Nilikud ed siak et anggapo so Dios”?—Isaias 45:5.
“Diad Panamegley na Bunga ra et Nibiig Yo ra”
6. Panon so pakapangibiig tayo ed tuan panagdayew a manlapud palson panagdayew?
6 Si Jesus so angiletneg na napanmatalkan a totontonen diad panangibiig ed no anto so tua odino tila no nipaakar ed relihyon. Inkuanto: “Diad panamegley na bunga ra et nibiig yo ra. . . . Balang maong a kiew so mamawala na maabig a bunga, balet balang abulok a kiew so mamawala na andi-kanan bunga . . . Balang kiew ya agmamawala na maabig a bunga so napupo tan nibantak ed apuy.” (Mateo 7:16-19) Sirin, pian nabidbir so tuan Dios a manlapud saray palso, tan saray tuan managdayew a manlapud saray tila, nakaukolan tayon usisaen no anto so papawalaen da. Kasin say bunga ra so “maabig,” odino kasin “andi-kana”?
7. Anto so ibaga na awaran na sayan siglo ed sikatayo nipaakar ed saray relihyon na sayan mundo?
7 Alimbawa, dinan ed saray relihyon na mundo so akapangiletneg na peteg a kareenan ed limog na saray patumbok to ed sankadalinan? Peteg, saray membro na tuan relihyon, espiritual a sanaagi, so agnepeg a manpapateyan ed balang sinansakey. Balet sanlasus milyon a totoo so pinatey ed saray bakal diad sayan koma-20 siglo, tan amin na saratan a bakal so sinuportaan na saray relihyon na sayan mundo. Bilang nansumpalan, saray relihyoson totoo so amatey ed arum a relihyoson totoo. Malaem ed panaon, sikara so amatey ed totoo ed dilin relihyon da. Saray Katoliko so amatey na Katoliko, saray Protestante so amatey na Protestante, saray Muslim so amatey na Muslim, tan saramay wala ed arum a relihyon so anumbok ed parehon kurang.
8. Panoy pankomento na saray manag-imaton ed relihyoson insaew ed panaon tayo?
8 Diad sakey ya editoryal ya apauloan na “The Violence Done in God’s Name,” si Mike Royko, a singa mitotongtong ed Dios, so angikuan ed saray relihyon na sayan mundo: “Sikara so mangibabalikas na debosyon da ed sika diad pampapateyan da ed saray nilasuslasus. Anganko ta iisipen dan singano say sakey a dapag so makayarin mamunas ed sananey a dapag, mansumpal a say dalan na panagdayew da ed sika so susto.” Inkuanto a manwarin say papa so mangireretrato ed inkasikato a bilang sakey a toon mareen, “saray patumbok to so akabatan a mamapaagus na pigaran milyon a galon na dala sano onsanok ira.” Ontan met, sanen naimatonan na datin Presidente Carter na Estados Unidos a “say mundo so naambagel,” inkuanto: “Say mabiskeg a relihyoson kumbiksion, a sikato komon so mamedber ed totoo diad aro, so ompatnag a mabetbet a kabiangan na kaambagelan tan panagpatey.”
9. Akin ya agtayo nepeg a tumboken iray “andi-kanan dirios”?
9 Say ontan ya andi-kanan bunga so kasuniyan na saramay mandadayew ed tuan Dios. (Galacia 5:19-23) Sirin, saramay manusuporta ed saray manbabakal a relihyon tan pilosopya so kabiangan na palson panagdayew a petepeteg a singa saraman so kadaanan ya Ehipsio, Asirio, taga Babilonia, tan arum ni a nanmatalek ed “saray andi-kanan dirios ya agmakasalita.” (Habacuc 2:18) Tan singa unong a say tuan mapropetikon salita so asumpal ed kadaanan a palson panagdayew, sirin nasumpal ed panaon tayo: “Saray andi-kanan dirios da a mismo so napason sigpot.” (Isaias 2:18) Napanmatalkan so pasakbay to: “Agkayo onaarap ed saray andi-kanan dirios.”—Levitico 19:4.
Siopa So Mantatasi ed Si Jehova?
10. Kasin saray patumbok na saray relihyon na sayan mundo so tastasi na tuan Dios?
10 Say sakey a tasi na tuan Dios so nepeg a sakey a mangitatarok na panamatua ed Sikato. Kasin saray patumbok na saray relihyon na sayan mundo so mangitatarok na ontan a panamatua? Panon kabetbet so pitotongtong na saray totoo ed sarayan relihyon ed sikayo nipaakar ed panagdayew da? Kapigan so indalaw da ed abung yo a mangitarok na pantasi ed Dios da? Say angat ya impaarap na tuan Dios ed saray palso a mamawala na saray tastasi so ag-inimano. Saray totoo na saray relihyon na sayan mundo so agmangitatarok na ontan a pantasi. Agda nibaga ed sikayo no siopa so tuan Dios odino no anto so gagala to. Saray klero ra so sinmaew a mangibangat ed sikara na katuaan. “Sikara so bulag a manangitabin. No, sirin, say bulag et itabin to so kapara ton bulag, sikaran dua so napelag ed abot.”—Mateo 15:14.
11. Siopa lambengat so mangitatarok na pantasi ed ngaran na tuan Dios?
11 Siopa so mabulos a mangisakripisyo na panaon, materyal iran kayarian, anggan saray bilay da, diad pantasi ed tuan Dios? Siopa so mangibabaga ed totoo a say tuan Dios so mangibabaga na: “Siak si Jehova. Satan so ngaran ko”? (Isaias 42:8) Siopa so mangibabangat a “sika, a say ngaran mo et Jehova, sika lambengat so Sankatageyan ed amin a dalin”? (Salmo 83:18) Diad panaon to, nayarian nen Jesus ya ibaga ed tuan Dios: “Imparungtal ko so ngaran mo.” (Juan 17:6) Diad panaon tayo, saray Tasi nen Jehova lambengat so makapangibaga na ontan. Agaylan matukotukoy so ngaran da—Tastasi nen Jehova!
Panagtasi Nipaakar ed Panarian
12. Anton makanan bangat so nepeg ya ibaga na saray tuan tastasi ed arum?
12 Niarum ed panangipakabat ed ngaran na tuan Dios, anto, nagkalautla, so ibabaga na saray tastasi to nipaakar ed gagala to? Inletneg nen Jesus so ehemplo diad impangibangat ed saray patumbok to a manpikasi ed tuan Dios: “Onsabi komon so panarian mo.” (Mateo 6:10) Say mangatatawen a Panarian na Dios et say gobiernon sigpot a manuley ed interon dalin. (Daniel 2:44) Sikato so tema na bangat nen Jesus. (Mateo 4:23) Lapud say Panarian so alenleneg a solusyon ed saray gonigon na katooan, impaseseg to: “Itultuloy yo, sirin, ya anapen ya ununa so panarian tan say inkatunong to.”—Mateo 6:33.
13. (a) Anto so ipapanengneng na saray katuaan diad panagpulong na saray Tasi nen Jehova nipaakar ed Panarian na Dios? (b) Panon a say panagpulong ed Panarian so sakey ya ebidensyan si Jehova so alenleneg a Dios na tuan propesiya?
13 Siopa natan so mangitatarok na pantasi ed Panarian na Dios? Si Propesor C. S. Braden, sakey a magunaet ya estudyante na saray relihyon ed mundo, so angikuan: “Saray Tasi nen Jehova so literal ya anakusak ed dalin diad panagtasi ra. . . . Nayarin tuan nibaga ya anggapo so sakey a relihyoson grupo ed mundo ya angipatnag na lalon seseg tan gunaet diad getman pangilaknab ed maong a balita na Panarian nen saray Tasi nen Jehova.” Balet satan so insulat to ed apalabas lan ngalngalin 40 taon! Natan et lalon babaleg a panagtasi ed Panarian so nagagawa, lapud wala so masulok a samplon danay a karakel na Tastasi natan! Ngalngalin talora-tan-kapalduan milyon ed sikara, ed masulok a 54,900 kongregasyon ed sankadalinan, so mantatasi ed Panarian, tan saray bilang da so ondarakel a maples. Sayan maabig a bunga so ebidensya a si Jehova so Dios na tuan propesiya. Sikato so amuyan ed Anak to, si Jesus, a mangipasakbay nipaakar ed panaon tayo: “Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan.”—Mateo 24:14; Juan 8:28.
Panangalig ed Aro na Dios
14. Anton kalidad so nepeg ya aligen na saray tuan tastasi na Dios, tan anto so kabaliksan to no agda gawaen?
14 Saray tuan tastasi na Dios so nepeg a mangalig ed sankamatalonaan a kalidad to—aro. “Siopaman ya agmangaro so agmikabat ed Dios, lapud say Dios so aro.” (1 Juan 4:8) Peteg, “saray anak na Dios tan saray anak na Diablo so mapatnag ed sayan katuaan: Siopaman ya agmanggawa na inkatunong so agnanlapu ed Dios, nisay saman so agmangaro ed agi to. . . . Nepeg a manaarowan itayo ed balang sinansakey; aliwan singa si Cain, a nanlapud sakey a marelmeng tan pinatey to so agi to.”—1 Juan 3:10-12.
15. Akin a nibaga tayon saray Tasi nen Jehova so mangipapatnag na puron aro?
15 Saray Tasi nen Jehova lambengat so walaan na ontan a nengneng na aro. Sikara so ag-ontutuek ed saray dirios na bakal, nasyonalismo, tan rasismo. Agda susuportaan so anggan anton bakal na sayan mundo tan sirin sikara so anggapon balot ed kipapasen a suportaan da so pamatey ed saray espiritual ya agagi ra ed arum a pasen na mundo. Sikara, singa inkuan nen Jesus, “so aliwan kabiangan na mundo” tan ‘inggaton da so kampilan.’—Juan 17:14; Mateo 26:52.
16. Panoy panulong ed arum a mangibiig ed saray tuan tastasi na Dios?
16 Sakey ya impanaral ya apauloan na “Malaem ni Nipaakar ed Panamatunong ed Karawalan” so angikuan: “Saray Tasi nen Jehova so mantutultuloy a mamebemben na talindeg dan andi-ramsak a ‘Kristianon neutralidad’ . . . Say mantutultuloy a talindeg da a sumpad nasyonal a serbisyo ed anggan anton nengneng, militarya o sibilyan, tan say agda pamagalang ed saray simbolo na nasyonal a pakabidbiran so nansumpal ed saray peryodo na inkasentensyaan, inkapriso, tan inkagulogulo ed dakel iran bansa . . . Saray Tasi, anggaman kuan, so agbalot kinmiwas ed karawalan.” Inkuan na peryodikon O Tempo ed Brazil nipaakar ed sikara: “Anggaman walaray dakel a mankunkuanan a relihyon ed propaganda ra ed amin a pasen na globo, anggapo so anggan sakey ed tapew na dalin natan a mangipapanengneng na parehon aro.” Sayan peteg ya aro, inyabawag nen Jesus, so mangibiig ed saray tuan tastasi na Dios. “Diad saya et naamtaan na amin a sikayoray babangatan ko, no walaan kayo na aro ed limog yon dili.”—Juan 13:35.
Say Panamasegsegang So Mamadaak na Panagtasi
17, 18. Anton agano nin ehemplo so mangipanengneng no panon a say panamasegsegang so mangarum ed panagtasi ed Panarian?
17 Say panamasegsegang so mansumpal ni ingen ed maad-awang a panagtasi ed Panarian. Alimbawa, diad India et wala lambengat so masulok a 8,000 tastasi nen Jehova. Ingen, diad agano ni et say ngaran nen Jehova tan gagala to so naikdan na malaknab a publisidad ed satan a dalin diad ginawa na 11 Tastasin ugugaw diad impangalig ed saray inmunan-siglon Kristianos ya angibaga ed korte: “Nepeg min tuloken so Dios a manuley nen saray totoo.” (Gawa 5:29) Saray ugugaw ya Indian so pinataynan ed eskuelaan diad agpangansion ed kanta na nasyon. Balet ingganggan na Korte Suprema na India, a singa nibalita ed Deccan Herald na Bangalore, ya “anggapo so obligasyon ed sayan bansa diad pangansion ed Kanta na Nasyon.” Imbaga na Korte a saray ugugaw “so angipanengneng na manepeg a respeto” tan say agda pangansion “so agmansumpal ed agkatutulok.” Ingganggan na Korte a saray ugugaw so awaten-lamet ed eskuelaan.
18 Inkuan met na parehon peryodiko: “Sarayan ugugaw so agmalabay a mangansion ed Kanta na Nasyon lapud saray Tasi nen Jehova so angipasen ed inkasikara a Kristianos tan debosyonadon sigpot ed Panarian na Dios. . . . Sikara sirin so agmibiang ed anggan anton nengneng na kurang a pulitikal na Estado.” Ontan met, imbalita na The Telegraph na Calcutta: “Say aksion na saray maneeskuelan ugugaw so angiparungtal met ed liwawa . . . ed saray Tasi nen Jehova, a nansiansian malaknab ya agbinidbir ed bansa tayo ya anggad agano ni.” On, ‘sayan maong a balita na panarian so nipulong ya onkanan pantasi ed amin a nasyones’ sakbay ya onsabi so anggaan.—Mateo 24:14.
Panagtipon ed Saray Tastasi na Tuan Dios
19. Anto so nakaukolan a gawaen na saray masimpit ya impanpuson totoo no labay dan dayewen so tuan Dios?
19 Natan, say tuan Dios, si Jehova, so mangigaganggan ed saray totoo to a mangitarok na pantasi ed inkasoberano tan gagala to. Legan ya iyaabawag da so mensahe to ed lawas malaknab a biskeg, sikato so manitipon ed ondadaak a bilang na saray masimpit ya impanpuson totoo a manlapud amin a nasyones a mikasakey ed saray managdayew ed sikato. (Isaias 2:2-4) Imbeneg daray palson dirios da tan inmarap ira ed panagdayew ed tuan Dios, a singa saramay nankaliktan a mandayew ed si Jehova so nibulos a nanlapud inkadakep ed kadaanan a Babilonia, a kasmak so panagdayew ed saray palson dirios.—Isaias 43:14.
20, 21. Akin a maganat so ibeneg ed saray palson dirios natan tan agmagmaliw a manag-imaton lambengat?
20 Kasin magmaliw ka a tasi na tuan Dios? Kasin ontalindeg ka ed dapag na tuan panagdayew tan paliisan so pibiang ed panagkasalanan-ed-dala tan moral a katetel na sayan mundo tan saray palson dirios to? Ipapaseseg na Salita na Dios: “Ompaway kayo ed sikato [Binababilonian palson panagdayew], baley ko, no agyo labay so minabang ed saray kasalanan to, tan no agyo labay so mangawat ed kabiangan na saray bakbak to.” (Apocalipsis 18:4) On, “ompaway,” onkiwas sakbay ya atrasado la! Agmagmaliw a singa samay too, sanen tinepetan na sakey a Katolikon magasin nipaakar ed labayen ton relihyon, inkuanto: “Anganko ta siak so Manag-imaton nen Jehova. Manisia ak a tuloy ed sisisiaen na saray Tasi nen Jehova—balet ta agko labay so nalanlanor.”
21 Anggaman kuan, kada too ed dalin so agla mabayag ed nalanor sano deralen la nen Jehova iray palson dirios na sayan mundo tan saray managdayew ed sikara: “Saray dirios ya agnanggawa ed saray mismon katawenan tan say dalin so natawtaw a manlapud dalin tan manlapud leksab na sarayan katawenan.” (Jeremias 10:11) Anggapo la ed satan iray manag-imaton. Wala lambengat iraman so tastasi ed tuan Dios tan saraman so andi. (Mateo 24:37-39; 2 Pedro 2:5; Apocalipsis 7:9-15) Kasin magmaliw ka a sakey a tasi na tuan Dios? Nepeg mo, lapud “say tuan Dios so diad sikatayo et sakey a Dios a manangiliktar; tan diad si Jehova a Soberanon Katawan so akankayarian na saray dalan a manlapud patey.”—Salmo 68:20.
Repason Tepetepet
◻ Anton angat so ipapaarap na tuan Dios ed saray palson dirios?
◻ Diad anton napanmatalkan a totontonen so pakapangibiigan tayo ed tuan panagdayew a manlapud palson panagdayew?
◻ Anton bunga so mangipanengneng a saray dirios na sayan mundo so andi-kana a bilang saraman so kadaanan?
◻ Anton maabig a bunga so nepeg a pawalaen na saray tastasi na tuan Dios, tan siopa so mangipapatnag ed satan?
◻ Akin a maganat so ikiwas natan ya ombeneg ed palson panagdayew?
[Saray Litrato ed pahina 14]
Saray andi-kanan dirios na kadaanan a nasyones so naandi a bilang puntirya na panagdayew
[Litrato ed pahina 15]
Diad siglo tayo et ngalngalin sanlasus milyon a totoo so inatey ed bakal a sinuportaan na saray relihyon na sayan mundo
[Credit Line]
U.S. Army photo
[Litrato ed pahina 16]
Inkuan nen Jesus a saray tuan tastasi so nakabatan diad aro a walad limog dan dili