Saray Distriton Kombension Tayo—Mabisbiskeg ya Ebidensya ed Katuaan
1. Diad saray tinaon ya piesta na saray Israelita, anton importante iran espiritual ya katuaan so nayari dan dalepdepen tan pantongtongan?
1 Saray Israelita nensaman et mantitipon ya mamitlod sakey taon parad saray tinaon ya piesta. Anggaman saray lalaki labat so kakaukolanen ya onatendi, maslak et mimila so interon pamilya ed Jerusalem pian panliketan irayan maliket ya kombension. (Deu. 16:15, 16) Saratan ya ebento et mangiiter na pankanawnawa pian dalepdepen tan pantongtongan iray importantin espiritual ya katuaan. Anto so arum ed saratan ya katuaan? Say sakey et si Jehova so maiter tan maaron Manangitarya. (Deu. 15:4, 5) Ontan met, sikatoy mangiiter na panangigiya tan proteksion. (Deu. 32:9, 10) Nayarin dalepdepen met na saray Israelita ya bilang pinili nen Jehova a magmaliw ya totoo to, nepeg dan ipatnag ed dugan paraan so inkatunong to. (Deu. 7:6, 11) Ontan met iray gunggona ed iyatendid saray tinaon a distriton kombension tayo.
2. Panon a say programa ed distriton kombension et mangiter na liwawa ed katuaan?
2 Say Programa et Mangiter na Liwawa ed Katuaan: Diad saray distriton kombension tayo, panliliketan tayo ray paliwawa, drama, demostrasyon, tan saray interbio ya ontutulong pian mas natalosan tan niyaplika iray katuaan ed Biblia. (Juan 17:17) Angiparaan so organisasyon nen Jehova na sakey a programa ya talagan denesinyo pian naikday imano iray pankaukolan na totood interon mundo. (Mat. 24:45-47) Kasin labay mo lan nanengneng tan narengel no anto ray ipresenta?
3. Antoy nepeg tayon gawaen pian nagunggonaan ed programa?
3 Siempre, nagunggonaan tayo labat no wadman itayo tan ondengel a maong ed satan ya taloran agew. Manpatanir lan masakbay ed amo yo pian makapanbakasyon ed trabaho. Seguroen ya magenap so painawa kada labi pian alerto kayo legan na programa. Apaneknekan la na dakel ya makatulong so inengneng ed espiker tan pannota pian mansiansian atentibo. Ag-abuloyan so cellphone yon manisturbod sikayo odino ed arum. Paliisay pitongtong tan pan-text. Paliisan met so pangan odino iyinum legan na programa.
4. Panon ya natulongan na atateng iray anak da pian nagunggonaan legan na kombension?
4 Diad saray taon a Sabaton, sano mantitipon iray pamilya na saray Israelita pian ondengel ed Ganggan ya ibasa legan na Piesta na Kobongkobong, kaiba da iray ‘ugugaw pian ondengel tan makaaral’ ira. (Deu. 31:12, NW) Talagan makapaseseg a nanengneng iray pamilyan sanaabay ed yurongan legan na kombension tan saray ugugaw ya ag-onuugip tan mandedengel a maong! Maabig no diad kada labi et nengnengen iray nota yo tan pantongtongan a saniiba iray punton naapresya yo ed programa. “Say inkamakulangkulang et nisinger ed puso na ugaw,” kanian maabig no imanoen na atateng iray anak da, anggan saramay tinedyer, legan na panangugto tan diad pampupundoan da imbes ya “palpaulyanan” ira.—Uli. 22:15; 29:15, NW.
5. Panon ya mangipanengneng ed karakep na katuaan so kondukta, panangawes tan panag-ayos tayo legan ya walad lugar na pankombensionan?
5 Parakepen na Maabig ya Kondukta Tayo so Katuaan: Say maabig ya kondukta tayo sano walad lugar na pankombensionan et mangipanengneng ed karakep na katuaan. (Tito 2:10) No akasulong so badge card tayo, aglabat itan mangipakabat ya walay kombension odino pakabidbiran ed sikatayo na arum ya onatendi, noagta mangiter met na pantasi ed saray makakanengneng. Naobserbaan na totoo ed lugar na pankombensionan tayo ya saramay aka-badge card et malinis tan masimpit so panangawes da, aliwan akulastay tan makapaayat ya singa uso ed sayan mundo. (1 Tim. 2:9, 10) Kanian nepeg tayon imanoen so panangawes tan panag-ayos tayo legan a walad lugar na pankombensionan. Anggano say pankombensionan et aliwan diad loob na bilding, singa bilang diad stadium, nepeg ya mapagalang so sulong tayo. No labay tayoy mansalat na kawes kayari programa tan onlad sakey a restawran, nepeg tayon tandaan ya delegado tayo nin siansia na kombension tan agnepeg ya mansulong na masyadon casual.
6 Diad saray tinaon ya piesta, panliliketan na saray Israelita so makapaseseg ya pantitipon kaiba iray kaparan managdayew ya nanlalapud arum a parte na bansa tan nanlapud interon mundo, tan lapud satan et niwalay pankakasakey. (Gawa 2:1, 5) Legan na distriton kombension, say Kristianon impanaagi tayo ya anggapod arum et sankaimanon maong. Sayan makapalikliket a kabiangan na espiritual ya paraiso tayo et mabetbet ya pandinayewan na saray makakanengneng. (Sal. 133:1) Imbes ya mangaliw nid paway, mas maabig no manbalon lay simplin pangugtoan tan anamoten so pankanawnawan nakabat tan nakatongtong iray agagi ya kaabay ed yurongan.
7 Kaslakan et pandinayewan na saray makakanengneng so organisado tan mauk-uksoy iran kombension tayo, lalo la no naamtaan da ya amin a mankikimey et boluntaryo. Sarag mo kasin ‘mabulbulos ya iyapay so sarilim’ ya mankimey ed kombension? (Sal. 110:3) Mabetbet ya manboboluntaryo iray interon pamilya pian nipasal iray anak dan ontulong ed arum. No mabaing ka, say pankimey ed kombension et maabig ya paraan pian nakabat iray arum ya onatendi. Imbaga na sakey a sister: “Likud ed pamilyak tan pigaran kakaarok, dagdaiset so kabat ko diman. Balet nen angiba ak ya manlinis, dakel so akabat kon agagi. Na-enjoy kon maong ’man!” Talagan naliketan itayo no parakelen tayo ray kakaaro tayo diad pamboluntaryod kombension. (2 Cor. 6:12, 13) No agmo ni asali nanboluntir, tepetan iray elder no antoy gawaen mo pian onkualipika.
8 Imbitaan Iray Arum ya Ondengel ed Katuaan: Singa met ed apalabas iran taon, taloy simba antis na kombension tayo, mangibunog tayoy imbitasyon ed saray totoo. Anggad posible et bunogan na saray kongregasyon so amin ya teritorya da. (Nengnengen so kahon ya “Panoy Pangimbita Tayo?”) Nepeg ya awiten iray keran imbitasyon ed kombension. Usaren iraya na saray onatendi diad pampulong ya impormal ed lugar na pankombensionan.
9 Kasin onkikiwas iray totoo ed sayan panangimbita? Diad sakey a kombension, tinulongan na attendant so sanasawa ya mananap na yurongan da. Imbaga dad sikato ya akaawat iray imbitasyon tan inisip dan singa marakep itan. Kanian nambiahe ray 320 km pian makaatendi! Diad sakey nin agawa, legan ya mankakabkaabungan so sakey a sister, inikdan toy imbitasyon so sakey a laki ya singa interesadod kombension. Kanian impaliwawa tod samay laki so imbitasyon. Kayari pigaran agew, diad kombension et anengneng na sister imay laki a kaiba toy kaaro to tan sankaawit day sakey ed saray balon release!
10 Saray tinaon ya piesta et maaron probisyon manlapud si Jehova pian natulongan iray Israelita ya manlingkor ed sikato ed katuaan tan ed paraan ya andiay pakabalawan. (Jos. 24:14) Ontan met natan, say iyatendi tayod saray tinaon ya distriton kombension so ontulong ed sikatayon ‘mantultuloy a mankurang ed katuaan’ tan importante itan a kabiangan na panagdayew tayo. (3 Juan 3) Komon ta bendisyonan nen Jehova iray sagpot na amin ya mangaarod katuaan ya onatendi tan nagunggonaan a maong!
6. Antoy sakey a paraan pian napanliketan tayoy Kristianon pankakasakey legan na kombension?
7. Anto ray rason no akin a manboluntaryo tayon mankimey no nayarian tayo?
8. Panon tayon imbitaan iray arum ya onatendid kombension?
9. Mangisalaysay na saray eksperiensya ya mangipapanengneng ya wala ray maabig a resulta na saray tinaon ya panangimbita tayo.
10. Akin ya importante so iyatendid saray tinaon ya distriton kombension tayo?
[Blurb ed pahina 3]
Say maabig ya kondukta tayo sano walad lugar na pankombensio- nan et mangipa- nengneng ed karakep na katuaan
[Blurb ed pahina 3]
Taloy simba antis na kombension tayo, mangibunog tayoy imbitasyon ed saray totoo
[Kahon ed pahina 5]
Saray Panonot Ed 2012 A distriton Kombension
◼ Oras na Programa: Diad taloran agew, onggapo so programa ed alas 8:20 na kabuasan. Sano niyanunsio lay igapo na musika, nepeg ya onyurong tayo lan amin pian naigapo so programa ed mauksoy a paraan. No Biernes tan Sabado, manampot so programa ed 3:55 na ngarem, tan alas 2:40 na ngarem no Simba.
◼ Parking: Diad amin a pankombensionan, say uksoyan ed paradaan et first-come, first-served. Lapud kaslakan lan limitado iray paradaan, no nayari et manuulop kayo la ed sakey a luganan.
◼ Pangireserba na Yurongan: Say nayarin ireserbaan yo labat na yurongan et saray kaiba yon nambiahe, kaiba yo ed abung, odino saray iyaaralan yo na Biblia.—1 Cor. 13:5.
◼ Panangugto: Ipangasin mangawit kayo lay pangugtoan yo imbes ya ompaway kayo ni ed pasen na kombension pian mangaliw. Nayarin usaren so melag a pananginan a niyabay ed salian yo. Saray angkakabaleg a pananginan tan napisit iran kargaan so agnaabuloyan ed pasilidad na kombension.
◼ Saray Donasyon: Nipatnag tayoy apresasyon tayo ed saray uksoyan na kombension diad pangiter na boluntaryo iran kontribusyon parad sankamundoan a kimey diad pankombensionan. No walay mandonasyon na tseke ed kombension, nepeg ya ingaran itan ed “Watch Tower.”
◼ Saray Aksidente tan Emergency: No wala ray medikal ya emergency diad pankombensionan, ipangasin ipaamta iya ed sankaasinggeran ya attendant, a mangipaamtan tampol ed First Aid ta pian naamtaan na saray kualipikadon namboluntaryo ed satan a departamento so kipapasen tan makapangiter iray nakaukolan a tulong. No nakaukolan, ontawag iray boluntaryo na First Aid diad sankaasinggeran ya ospital.
◼ Tambal: No wala ray tambal ya iinumen yo, ipangasin agyo lilingwanan so mangawit na magenap, lapud anggapo iya ed kombension. Saray uusaren ya pan-inject parad diabetis et nepeg ya ibantak ed bantakan parad hazardous waste, aliwan diad saray basuraan ed pankombensionan.
◼ Sapatos: Kada taon et wala ray naririsgo lapud sapatos. Kanian maabig no mamili itayo na masimpit, komportablen sapatos pian mainomay so kasesegep tan kakaepas.
◼ Panagrekord: Saray kagawaan a panagrekord so agnepeg ya ikonekta ed sound system odino elektrisidad na pasilidad, tan usaren labat iratan no agmakadisturbod arum.
◼ Panlitrato: No manlitrato kayo legan na saray sesyon, ipangasin agkayo manguusar na flash, tan agyo sasaniban iray agagin onderengel.
◼ Saray Please Follow Up (S-43) Form: Nepeg ya usaren so form a Please Follow Up ya pangisulatan na impormasyon nipaakar ed siopaman ya interesado lapud impormal ya impantasi tayo legan na kombension. Nepeg a mangawit iray manangipalapag na sakey odino duaran form diad kombension. Saray asulatan a form et nayarin iter ed Book Room a mangasikaso ed satan odino ed sekretaryo na kongregasyon yo no onsempet kayo.—Nengnengen so Nobyembre 2009 ya Ministeryo Tayo ed Panarian, pahina 4.
◼ Saray Restawran: Igalang so ngaran nen Jehova panamegley na maabig a kondukta yo diad saray restawran. Mangiter na tip, no satan so niyugali ditan.
◼ Saray Badge Card: Ipangasin ipeket so badge card yo legan a walad kombension tan sano manbiabiahe a paonla tan pasempet ed pankombensionan. Saray badge card et naala labat ed kongregasyon yo. Agyo ipapaleen so pangala na saray badge card a parad sikayo tan ed pamilya yo.
◼ Bautismo: Nepeg ya onyurong la ray manpabautismo diad saray yurongan a nigana parad sikara antis ya onggapo so programa na kombension ed Sabado na kabuasan. Balang sakey so mangawit na masimpit a pampabasa tan tuwalya. Pian naseguron saramay manpabautismo et mansulong na matukoy parad ontan ya okasyon, saya so itongtong ed sikara na saray elder a mangirepaso ed saray tepet ed libron Organisado.
◼ Pamboluntaryo: Mas maliket tayo diad iyatendi ed sayan kombension no manboluntaryo itayon ontulong ed saray nakaukolan a kimey. (Gawa 20:35) Siopaman a malabay a manbulontaryo et kaukolan a manpalista ed Volunteer Service Department diad kombension. Saray kalangweran ya anggapo ni 16 años da et nayari met ya ontulong diad pankimey dan kaiba na balanglan say ateng da odino guardian odino arum ya wala lad edad ya inabuloyan dan nakaiba to.
[Kahon ed pahina 4]
Panoy Pangimbita Tayo?
Pian nasumpal tayoy teritorya tayo, nepeg ya magano tayo labat. Nayarin oniay ibaga tayo: “Hello. Kaiba kamid saray mangibubunog ed sayan imbitasyon diad interon mundo. Nia so kopya yo. Nabasa yoy kaaruman ya impormasyon ed sayan imbitasyon.” Mansalitan mabilabilay. No mangibubunog diad weekend, kaukolan met ya iyopresi iray magasin no matukoy.