Hobennan Sa Puntra . . .

Con Mi Por Haya un Bon Compañero di Cuarto?

“Sin compañera di cuarto, lo mi no por a sirbi nunca como predicado di tempo completo y paga huur y awa cu coriente.”—Lynn.a

ORA hobennan bai biba riba nan mes, nan ta keda hopi bes masha sorprendi ora nan ripara con caro bida ta den e ‘mundo real.’ Un manera pa hopi di nan anda cu costo di bida halto ta door di comparti gasto cu un of mas compañero di cuarto.

Pero manera un articulo anterior den e serie aki a mustra, no ta dje facil ei pa comparti camber cu un otro persona, specialmente cu un hende completamente desconoci.b Esaki ta conta asta pa cristiannan hoben cu ta comparti cuarto pa nan por sirbi como predicado di tempo completo. Sin importa kico ta bo situacion en particular, si bo tin pensa di comparti cuarto cu un persona, ta rasonabel pa bo uza “sabiduria sano” ora di scohe e persona ei.c—Proverbionan 3:21.

E Peliger di Mal Asociacion

Hopi adulto hoben ta busca riba borchinan di informacion, den avisonan di corant y riba Internet pa haya posibel compañeronan di cuarto. Pero pa hobennan cristian, e fuentenan ei ta forma un peliger serio. Probablemente nan lo pone bo den contacto cu hendenan cu no tin mesun fe, moralidad ni normanan cu bo. E echo cu bo kier comparti cuarto solamente cu un persona di bo mes fe ta nifica cu bo tin un mente sera of cu bo ta antisocial? No, esei ta muestra di sabiduria. Bijbel mes ta spierta: “Mal compania ta daña bon custumber.”—1 Corintionan 15:33.

Considera e caso di e mucha mohe Lee. E no tawata un cristian batisa ainda ora el a cuminsa biba na e campus di universidad. Despues el a conta: “Tawatin un ambiente peligroso. Algun mucha mohe tawata yega cas y haya nan compañera ta haci sex.” Bibando den e ambiente ei despues di poco tempo tawatin un impacto negativo riba Lee su spiritualidad. E ta admiti: “Mi tawata falta mayoria di mi reunionnan cristian.” Nada straño cu su comportacion a cuminsa bai atras. “Un dia, mi a asta papia palabra malo, y un di e mucha mohenan di: ‘Yehova ta aproba esei?’” Esta un humiliacion! Afortunadamente, Lee a sali for di e mal ambiente ei y a cuminsa haci progreso spiritual. Pero su experencia ta duna un ehempel di e peliger di biba cu hende cu no ta respeta bo normanan.

Con pa Haya un Compañero Adecua

Unda bo por busca anto? Cuminsa den bo propio congregacion di Testigonan di Yehova. Ta interesante cu esnan cu ta predicado di tempo completo hopi bes ta topa otro hobennan cu un mentalidad spiritual na e varios scol- y reunionnan cu ta ser teni special pa predicadonan di tempo completo.d Mayornan, ancianonan di bo congregacion, superintendentenan biahero y otro rumannan tambe lo por yuda; kisas nan conoce algun hoben cu lo ta bon compañero di cuarto.

Otro cos cu por yuda ta di laga hende sa cu bo ta busca un compañero di cuarto. Mas tanto hende sa cu bo ta en busca di esei, mas chens bo tin di haya resultado. (Eclesiastes 11:6) Riba tur cos, pidi Yehova yuda bo haya un compañero di cuarto, y depende riba dje pa e bendiciona bo esfuersonan.—1 Huan 5:14, 15.

Busca e Informacion Necesario

Una bes bo a haya un posibel compañero di cuarto, kisas bo ta cla pa comparti camber cu e persona ei. Pero ta sabi pa bo investiga un tiki prome. E rumannan di su congregacion ta “duna bon testimonio di dje”? (Echonan 16:1, 2) Kisas abo cu bo mayornan por papia directamente cu algun persona cu tin cualificacion spiritual y cu ta yega na dje. Boso lo por puntra: ‘Ki reputacion e persona aki tin? E ta un persona emocionalmente y spiritualmente stabil? E ta predica na otro hende y ta comenta na reunion? E ta un persona conoci pa conducta decente?’

Corda cu “esun cu anda cu hende sabi lo ta sabi.” (Proverbionan 13:20) Segun David: “Mi compañero di cuarto ta masha spiritual. Esei ta yuda mi mantene mi spiritualidad.” Renee, kende tawatin varios compañera di cuarto, tambe ta bisa: “Algun di mi compañeranan di cuarto tawata sugeri pa nos lesa un capitulo di Bijbel hunto tur anochi. Como cu mi mayornan no tawata Testigo, nunca nos no tawatin un studio di Bijbel di famia. Pesei pa mi tawata masha great cu mi por tin un ‘studio di famia’ cu mi compañeranan di cuarto!” Si, un compañero di cuarto cu mescos cu bo tin amor pa cosnan spiritual por ta un berdadero bendicion.

Papia Habri cu Otro

Awor abo cu e persona mester topa otro y papia. Tal combersacion por yuda bo wak si boso personalidad ta bai cu otro. Ta interesante cu e revista Communication Research Reports ta informa di un estudio cu a revela cu compañeronan di cuarto cu tin mesun estilo di comunica tawata esnan ‘cu mas a gusta y keda satisfecho cu nan compañero di cuarto.’ Pues si bo ta un persona habri, social y expresivo, lo bo por haya bo cu problema si bo bai comparti cuarto cu un persona reserva, keto of cu ta inclina na evita otro hende.

Aunke lo bo no kier pa boso combersacion parce un interogacion policial, lo ta bon pa papia di e metanan y plannan cu bo futuro compañero di cuarto tin a corto plaso. E ta busca pa progresa spiritualmente of e ta djis interesa pa scapa di un situacion tenso na cas? Lynn ta mustra riba un otro problema cu por surgi: “Mi tawatin un compañera cu tawatin un gai, y e gai tawata tur ora den nos camber, kedando te laat anochi.” Lynn tawata haya nan expresionnan di cariño inapropiado y esei tawata molesti’e. Sinembargo, bo por evita e tipo di problemanan ei si boso palabra algun regla basico di antemano. Por ehempel, Renee ta bisa: “Nos tawatin un regla cu mucha homber no mag keda despues di cierto ora.” Tambe lo ta consehabel pa tur dos compañero palabra pa nan nunca keda nan so den camber of apartamento cu un persona di e otro sexo.

Tambe lo ta bon pa papia tocante cosnan manera hobby, preferencia y ki musica boso gusta. Mark ta bisa: “Lo mi tin gana di comparti cuarto cu hende cu ta gusta e mesun tipo di cosnan cu ami gusta, cu tin un personalidad similar, cu gusta haci e mesun cosnan cu mi.” Claro cu e echo cu boso tin otro gusto no kiermen cu boso no por comparti cuarto hunto. E berdadero cuestion ta: Con flexibel boso tur dos ta? Boso ta dispuesto na tolera diferencia y haci ahuste pa acomoda gusto di otro?

Lee ta sugeri: “Bo tin cu puntra tambe kico e otro persona ta spera for di e areglo. Tin hende ta spera cu lo bo ta nan miho amiga y compinchi. Pero ami no ta interesa den esei.” David tambe ta bisa: “Mi ta gusta un compañero di cuarto cu mi por haci cos hunto cu ne, pero cu no ta sinti cu tur biaha e mester bai cu mi ki ora cu mi ta haci cos hunto cu otro hende.” Asina tambe purba saca afo si e persona ta interesa pa e ta bo partner den e trabou di predica of cu e tin algo otro na mente, talbes sirbi den un congregacion di idioma stranhero.

Por ultimo, haci sigur cu boso no ta pasa por halto di asuntonan manera cushinamento (un di boso sa con pa cushina?), con ta parti trabou di cas, uzo di aparatonan personal, luga den cashi, mueble, luga pa warda cos y bestia di cas. Si boso papia tocante e cosnan ei di un manera habri, boso por evita malcomprendemento y sintimentonan ofendi. Proverbionan 20:18 ta bisa: “Bon conseho ta haci un plan mas firme.” (Beibel na papiamentu koriente)

“Corectamente y na un Manera Ordena”

Bo ta haya un otro principio practico na Lucas 14:28, cu ta bisa: “Calcula e gastonan.” Si, purba calcula cuanto boso costo di bida lo ta. Cuanto lo tin cu paga na huur? Cuminda? Awa cu coriente? Boso lo uza mesun telefon? Si ta asina, con boso lo parti e resibo? Lynn ta bisa: “Ami definitivamente lo haci sigur cu un mucha mohe por paga su parti di e gastonan prome cu mi tum’e como compañera di cuarto.” E revista riba Internet The Next Step corectamente ta bisa: “Compañeronan di cuarto cu no ta yuda paga huur y cuminda . . . of cu ta subi bo resibo di awa cu coriente ta duna bo stress innecesario.”

Renee ta bisa: “Tin biaha e cuestion no ta cuanto e tin cu paga, sino ki dia!” E ta splica: “Nos mester a paga nos huur pa dia tres di cada luna. Pero tin biaha un compañera ta sali bai pasa weekend otro caminda sin paga su parti, y ami tin cu pidi nos doño di cas despensa.” Claramente ta sabi pa haci tur cos “corectamente y na un manera ordena”, y no laga cosnan importante pa casualidad. (1 Corintionan 14:40) Hopi bes ta sabi pa pone palabracionnan riba papel.

Si bo ta cuidadoso y prudente bo tin mas chens di haya un compañero di cuarto cu lo ta un bendicion pa bo y no un fuente di angustia. Sinembargo, kico por haci si surgi problema y conflictonan di personalidad? Un futuro articulo lo trata e situacionnan aki.

[Nota]

[Plachi na pagina 26]

Tin peliger den comparti cuarto cu personanan cu no ta pega na moralidad di Bijbel

[Plachi na pagina 26]

Prome cu bo bai di acuerdo pa comparti cuarto cu un persona, boso sinta hunto y papia riba asuntonan importante