Observando Mundo

Palonan Ta Reduci Polucion di Stad

“Pa prome bes expertonan a logra midi te na ki grado diferente tipo di palo por reduci polucion”, segun e corant The Sunday Times di Londen. Den un estudio di tres aña cu nan a haci den e area di West Midlands, cientificonan di Inglatera y Escocia a midi muestranan di tera cu nan a cohe den cercania di mas o menos 32.000 palo, pa wak cua tipo di palo a absorba mas tanto particula dañino for di den atmosfer. Tambe e investigadonan a midi particulanan den atmosfer y e nivel di ozon. E palonan cu a absorba mas tanto tawata es, larix y pino; esnan menos eficiente tawata eik, wilg y populier. E estudio a demostra cu “palo por ta tres biaha mas efectivo den elimina polucion for di atmosfer cu tereno di yerba.” Si, un calculacion di computer a mustra cu si nan planta palo riba maske ta mita di e terenonan habri di West Midland, polucion di aire ocasiona pa particula lo baha cu 20 porshento.

Intolerancia Religioso Ta Intensifica na Georgia

“Testigonan di Yehova tawata planiando pa tene un reunion evangelico awe riba un tereno banda di un roi akinan, pero un grupo di bochinchero a bini e anochi anterior”, segun un informe den The New York Times. “Dos dozijn di homber bisti cu crus di Iglesia Georgiano Ortodox a yega den bus y plunder e cas di e anfitrion, Ushangi Bunturi. Nan a montona Bijbel, panfletanan religioso y e pertenencianan di sr. Bunturi riba otro den cura y a kima nan . . . Nan a yena e pisina di bautismo cu gasoil. Polis tambe tawata na e sitio, entre nan e hefe local di polis . . . No tawatin ningun aresto. . . . E atakenan tawata como si fuera plania.” Aunke tawatin casonan di tension religioso “den hopi di e exrepublicanan di Union Sovietico, incluso na Rusia”, segun Times, “Georgia ta e unico cu ta mustra tal intensidad di violencia pa cu minorianan religioso, y tambe e unico caminda cu tin evidencia cu autoridadnan ta complice di e atakenan.” Georgia a garantisa libertad di religion den su constitucion formula despues di e era Sovietico. Pero den e creciente ola di violencia cu ta tuma luga einan, tawatin decenas di caso di maltrato y candela intencional na man di bochincheronan.

Hobennan Ta Basha Bin na “Iglesia di Placer”

Bou di e titular “Hobennan Ta Bisa Si na ‘Iglesia di Placer’,” e corant Aleman Nassauische Neue Presse a informa relaciona cu e prome festival di Dia di Iglesia pa Hoben, organisa door di iglesia protestant na Hesse y Nassau. Rond di 4.400 persona a asisti na e festival di cinco dia. E programa tawatin entre otro workshop, deliberacionnan den grupo, servicionan djanochi cu bela y cantamento, y hopi deporte, reunionnan social y bandanan musical. E corant a bisa cu loke ‘nan a laga completamente afo entre e mas cu 220 eventonan tawata studio di Bijbel na e manera convencional y servicionan religioso tradicional.’ Un pasto pa hubentud a keda hopi sorprendi cu “algun hoben a pidi—di tur cos cu nan por a pidi—pa haya studio di Bijbel, cu ta algo cu tin e reputacion di ta laf.” Un teenager a bisa: “En realidad e programa no tin casi nada di haci cu iglesia, pero e ambiente ta dushi.”

Religion y Guera

“E disputanan di mas sangriento y peligroso awe . . . ta envolve religion”, segun e corant USA Today. Ta masha dificil tambe pa resolve e disputanan ei. E corant a agrega: “Ta mas dificil pa aplica e medionan normal di diplomacia—por ehempel, ser dispuesto pa negosha, y pordona reclamonan bieu—ora cu e combatientenan ta pretende cu Dios ta na nan banda. Esei ta conta sea ora cu religion ta djis un medio pa haya apoyo popular of e ta e causa mes di conflicto riba asuntonan menos religioso manera di tereno of poder.” Diferencianan religioso ta causa problema pa asta trece un tregua temporal. Un ehempel ta e bringamento resien cu tawatin na Kosovo. Nan a pensa pa trece un pausa den e bringamento durante Pasco di Resureccion, pero no por a implement’e como cu catolico y ortodox no ta celebra e Pasco ei riba mesun fecha. Segun USA Today, “na final di cuenta, no tawatin ningun pausa.”