For di Nos Lectornan

Cabei Mi a gusta e articulo “Bo Cabei Ta Precupa Bo?” (8 di augustus 2002) Mi tin 14 aña como specialista di beyesa. E manera cu boso a bisa pa skeiro cabei maltrata, ta e manera cu nos ta hacie. Mi a keda impresiona pa e manera profesional cu boso articulonan ta wordo skirbi.

K. K., Hapon

Como un lesado ferviente di Spierta! mi tin cu expresa mi aprecio pa e articulo aki. Mi a cuminsa haya cabei blanco for di ora cu mi a bira teenager. Pa ora mi tawatin banda di 17 aña, bo por a mira e cabei blanconan djaleu. Mi tawata sinti hopi berguensa. E articulo aki a yuda mi haya un punto di bista mas modera di mi aparencia, mientras mi ta consentra mas riba desaroya cualidadnan cu ta agrada Dios.

E. J., Nigeria

Lo mi kier gradici boso di fondo di mi curason pa e articulo “Bo Cabei Ta Precupa Bo?” (8 di augustus 2002) Mi tin 36 aña, y pa basta tempo caba mi ta precupa cu, tiki tiki mi cabei ta cai y mi cabes ta birando limpi. E articulo aki a yuda mi compronde cu ta normal cu bo ta perde un tiki cabei tur dia. Awor mi ta sinti mi hopi mas trankil. Sigui publica e tipo di articulonan aki!

V. G., Slovakia

Mi a haya e articulo aki net na ora. Mi tawata bou di masha hopi stress pasobra mi cabei tawata cai. E articulo aki a calma mi, specialmente e frase cu a bisa cu “hopi bes otro hende no ta dje precupa ei tocante bo cabei manera abo mes.” Loke a yuda mi tambe ta ora mi a haya sa cu maske bo no tin problema cu bo cabei, toch aproximadamente 70 pa 100 cabei ta cai pa dia!

E. L., Merca

Enamora Danki pa e articulo di “Observando Mundo” cu e tema “E Euforia di Amor.” (8 di augustus 2002) E articulo aki a yuda mi realisa cu asta den caso cu bo ta sigui sinti bo enamora di un persona, no necesariamente esei ta un base solido pa un matrimonio felis. E tipo di conseho aki realmente por scapa un persona di sigui un rumbo bobo!

P. L., Rusia

Wega di Placa Net mi a caba di lesa e serie “Wega di Placa—E Ta un Dibirticion Inofensivo?” (8 di augustus 2002) Mi ta gradici Yehova cu El a uza boso pa percura e informacion oportuno aki. Mi no por a kere mi bista ora mi a lesa tocante e comportacion di un hende cu posiblemente ta adicto na wega di placa. Tawata como si fuera boso a describi mi casa! Lamentablemente, e practica pecaminoso aki a hiba na otro picanan serio. Wega di placa ta un pest. Mi ta echt spera cu tur hende lo corda cu e no ta un dibirticion inofensivo.

M. G., Merca