Sobrepeso Ta Birando un Epidemia Mundial?
“PA HOPI tempo hende a considera sobrepeso como un consecuencia di bida moderno den paisnan rico y desaroya. Pero awor e ta plamando tambe den paisnan den desaroyo”, segun un informe den e revista medico di Gran Bretania, The Lancet. E revista a remarca cu expertonan di nutricion awor ta spierta cu lo tin “un epidemia mundial” di malesanan relaciona cu sobrepeso, manera diabetis, presion halto, cancer y malesanan di curason y di ader.
Na China, awor cu durante e ultimo ocho añanan aki e cantidad di hende homber cu sobrepeso a bira triple y e cantidad di hende mohe a bira dobel, e porsentahe di casonan di presion halto ta igual cu na Merca. Mas cu mita di tur e casonan nobo di diabetis cu keda constata ta na India cu China. E nivel di diabetis na Egipto ta igual cu na Merca, y awor mita di e hende mohenan na Egipto ta mucho gordo. Na Mexico, den tur gremio y den tur parti di e pais tawatin un aumento rapido di hende cu sobrepeso, y consecuentemente un aumento di diabetis. Asta den paisnan Africano hopi pober cu ta keda suit di Sahara, sobrepeso y diabetis ta aumentando.
Aunke comemento di fast food (cuminda rapido) kisas ta responsabel pa sobrepeso den algun pais, un di e causanan principal ta cu hopi fabricante ta agrega mas sucu na nan productonan “pa laga nan smak miho.” Ademas, hende di Asia y Africa ta cushina cu mas azeta, locual ta produci extra caloria. Tecnologianan avansa den industria y agricultura ta nifica cu hende ta haci menos trabou fisico pa produci mercancia. Hende kier traha menos y haya mas tempo liber. Awor cu computer y television ta asina popular, trahadonan ta move menos, y “email a pone un fin na e asunto di cana bai hiba un mensahe of lanta for di bo luga pa bai papia cu colega.”
Como cu sobrepeso ta aumentando rapidamente bou di muchanan di scol tambe, specialmente na luganan caminda nan a reduci recreo y actividadnan fisico, ta masha urgente pa docentenan ta conciente di e relacion cu tin entre nutricion y logronan academico. Gail Harrison, di e Scol pa Salubridad Publico na Universidad di California, ta spierta nos cu fuera di medidanan di prevencion, “ta esencial pa tin un agenda comun pa prevencion riba nivel mundial, compaña pa e desaroyo di strategia, pericia y infrastructura” pa trata cu e epidemia di sobrepeso y cu e malesanan relaciona cu ne.