Tene Cuidou Cu e Tenglanan Mortal!

DI E CORESPONSAL DI SPIERTA! NA AUSTRALIA

TAWATA un bunita mainta di zomer den nort di Queensland, Australia. Un dia perfecto pa landa den e awanan fresco y scapa di e calor. Pero e mainta ei e radio emisora local na Townsville a anuncia varios bes cu hende a mira e kwal mortal box jellyfish na e beachnan local y a adverti cu tur hende cu ta bai lama mester tene cuidou.

Un pareha jong no a tende e spiertamento na radio. Nan tawata sinta trankilamente pega cu canto den mei meter di awa blou di Oceano Pasifico ora cu diripiente e señora—34 siman na estado—a dal un grito. El a bula lanta y purba ranca varios tengla di kwal for di riba su bil y stoma. Despues cu su casa a yud’e yega canto, e casa a core bai desesperadamente en busca di yudansa, maske e tambe a sufri di e picanan di kwal. Pa ora el a bin bek djis un par di minuut despues, su señora aparentemente a stop di hala rosea y su cara, brasa- y pianan tawata preto. Afortunadamente, e señora hoben a sobrevivi door cu nan a haci reanimacion mesora y ambulans a yega umbes. Su baby tambe a scapa, y el a nace un par di siman despues.

E box jellyfish ta pica centenares di landado tur aña. Algun di nan a muri den un minuut despues cu e tenglanan a mishi cu nan. Nada straño anto cu, manera landadonan den zomer tende cu nan a mira un box jellyfish, tur hende ta sali for di awa mesora! Su troshi di tenglanan largo—cu serca algun di nan por ta 40 pa 60 tengla—por ta peligroso.

Por Tuma Precaucion?

Tin hende ta evita tur landamento den lama ora tin box jellyfish den bicindario. Pero pa esnan cu ta risca drenta lama durante lunanan mas cayente, un wet suit (duikpak) di henter curpa ta e miho manera pa evita un encuentro doloroso cu e kwal aki.

Hopi beach den parti nort di Australia ta ser patruya regularmente y ki ora cu nan detecta box jellyfish, nan ta cohe mayoria di nan cu net. Ademas, nan ta pasa advertencianan regular na radio emisoranan local. Apesar di e precaucionnan aki, semper tin peliger unabes cu e box jellyfish cuminsa move. Parce cu nan ta brui den riu, pero ora nan madura, aparentemente nan ta prefera canto di lama.

Afortunadamente, e pica di un box jellyfish por lo general no ta fatal. Ta depende hopi di cuanto contacto e persona a haya cu e tenglanan, e cantidad di veneno cu e kwal a saca, e madures di e box jellyfish y e edad y salu di e victima cu a ser pica. No obstante, si no duna tratamento mesora, e persona por muri di atake di curason den menos cu un minuut cu e tenglanan a mishi cu ne. E motibo pa esaki ta cu e tenglanan tin rei di celnan cu ta pica y cu e kwal ta los manera flecha chikito asina nan mishi cu otro criatura. Claro cu esaki ta nan manera di haya cuminda, specialmente cabaron.

Box jellyfish por tin te cu ocho wowo. Y maske su wowonan sa ta bira paden, nan por localisa un obstaculo, manera hende of un bestia yagdo. Esaki no ta nifica cu e kwalnan aki ta ataca hende intencionalmente. No, pasobra box jellyfish ta purba pasa rond di e obstaculo si e tin suficiente tempo. E por haci esei door di uza su curpa forma di caha (box). Su curpa ta funciona manera un blaasbalg, kiermen e ta hala awa aden y sac’e pa e por move.

E problema cu hende ta cu hopi bes nan ta core drenta awa of tira cabes, y esei no ta duna e kwal tempo pa evita di dal den nan. Y ora e tenglanan mishi cu cuero humano, nan ta reacciona mesora: nan ta pega na e cuero y saca veneno. E victima ta sinti dolor masha intenso. E veneno ta ser inyecta door di hopi cel cu yama netelkapsel of nematosist, y e curpa ta absorba lihe. Si e victima core of sapatia, e veneno ta ser absorba mas lihe ainda. Un otro problema grandi ta cu maske e tenglanan kibra for di e kwal, nan ta keda pega na e cuero di e victima y nan ta saca mas veneno si e victima purba ranca nan.

Tin un Antidoto?

Si, tin un antidoto. Y nan a scapa hopi hende su bida door di aplica e antidoto corecto rapidamente. Pa añanan hende a kere eroneamente cu e miho tratamento di emergencia pa reduci e cantidad di veneno cu tenglanan tawata saca ta door di basha alcohol puro riba e tenglanan cu ta pega riba curpa di e victima. Sinembargo, investigacion moderno a descubri cu e uzo di alcohol puro eigenlijk ta stimula e tenglanan pa saca mas veneno.

Awor expertonan ta kere cu binager ta e miho solucion. E ta un likido barata y facil pa haya. Binager ta neutralisa e nematosistnan completamente y ta stroba nan di saca nan veneno. Pesei awendia mayoria departamento di gobierno den e areanan di peliger ta pone boter di binager na luganan riparabel, hunto cu borchinan grandi di advertencia contra kwal.

Pesei aunke por ta refrescante, y asta stimulante, pa landa den e awanan tropical di Australia, durante e temporada di box jellyfish, ta bon pa tur landado tene cuidou!

[Cuadro/Plachi na pagina 28]

PRECAUCIONNAN SIMPEL COMO PROTECCION CONTRA KWAL

• Landa solamente na beachnan cu ta ser patruya

• Bisti un wet suit di henter curpa den temporada di box jellyfish

• Percura di tin un caha di prome ausilio, cu ta inclui binager, na man

• Si e kwalnan pica bo, no purba ranca e tenglanan

• Si e victima su curason para of e stop di hala rosea, cuminsa reanim’e mesora

[Plachi na pagina 27]

Un close-up di e tenglanan di box jellyfish

[Reconocemento]

Cortesia di Surf Life Saving Queensland