Hobennan Sa Puntra . . .

Pakico Mi Ta un Yiu Adopta?

“Ta manera bo ta biba cu un handicap permanente. E ta un dolor di curason cu bo no por cura.”—Robert.

A SINA un homber cu a ser adopta for di dia cu el a nace ta describi su bida. E ta continua: “Practicamente tur dia di bo bida, bo curason ta anhela pa haya contesta riba preguntanan manera: Ken ta mi berdadero famia? Unda nan ta biba? Pakico nan a laga mi den man di otro hende?”

Chantial, kende ta yiu di un tata adopta, ta lamenta cu e no sa mes ta ken ta su welanan biologico. E ta bisa: “Mi ta sinti cu mi ta perde algo, pasobra mi no tin ningun contacto cu mi omonan, tantanan y primo- y primanan.” No ta tur yiu adopta ta pensa mescos. Pero algun si. Pakico?

E Causa di Rabia

Un mucha cu haya sa cu el a ser separa for di su famia biologico por hay’e cu un trauma formal. Catrina, kende a ser adopta tempo cu e tawata chikito, ta bisa: “Mi tawatin un problema cu rabiamento pasobra mi no tawata compronde pakico mi mama biologico a laga adopta mi. Mi tawatin e sintimento cu mi mama a bandona mi pasobra mi tawata mahos y imposibel pa stima. Si el a duna mi maske ta un chens, mi sa cu lo mi por a hacie orguyoso di mi. Mas mi a pensa riba mi mama biologico, mas rabia mi tawata haya den mi curpa.”

Catrina su relacion cu su mayornan adoptivo tambe tawata bou di basta tension. “Mi tawata sinti cu ta mi mayornan adoptivo a kita mi for di mi berdadero mama”, e ta bisa. “Pesei mi a baha mi rabia riba nan.” Si, un di e sintimentonan di un persona adopta por ta rabia.

E rabia ei por ta peligroso. Tin biaha, manera e caso di Catrina ta ilustra, bo por tin e tendencia di baha bo rabia den un manera robes of pa expres’e contra e hendenan robes. Bijbel ta conseha: “Stop di rabia y laga furia para.” (Salmo 37:8) Con esei ta posibel? Wel, e Palabra di Dios ta bisa tambe: “Prudencia [of, “perspicasia”, NW] di un hende ta haci cu e no ta rabia lihe.” (Proverbionan 19:11) Perspicasia ta e capasidad di distingui e berdadero naturalesa di bo situacion, y esei lo por yuda calma bo rabia. Con asina?

No Djis Supone Algo

Perspicasia por yuda bo analisa e cosnan cu bo ta supone y cu kisas ta hinca rabia den bo curpa. Por ehempel, si bo ta un yiu adopta, bo ta djis asumi cu bo mayornan biologico a laga adopta bo pa motibo cu tawatin algo robes cu bo? Esei tawata e pensamento di Catrina. Pero semper esei ta e caso? Kisas ta imposibel pa determina kico a motiva bo mayornan, pero tin bon motibo pa no supone cu tawatin algo robes cu bo. Al fin y al cabo, pakico mayornan sa duna nan yiunan pa adopcion? Hopi bes nan ta sinti cu nan no tin otro opcion.

Tuma por ehempel e caso di Moises. E relato di Bijbel den Exodo capitulo 2 ta bisa nos cu ora e Farao di Egipto a decreta pa mata tur baby masculino Israelita, Jocabed a tene su yiu chikito Moises scondi tres luna largo. Un dado momento e no por a scond’e mas, pero lo e no por a soporta mira nan mata su yiu tampoco. Pesei “ora cu e no por a scond’e mas, el a cohe un macutu di richi y a clafati’e [fur’e] cu asfalt y breu. E ora ei el a pone e yiu aden y a pon’e meimei di e richinan canto di Neil.”—Exodo 2:3.

Sin duda tawata algo masha dificil pa e bandona su yiu den e manera aki. Pero ki otro opcion e tawatin? E amor cu e tawatin pa su yiu a motiv’e pa e haci loke el a pensa tawata miho p’e. Ta interesante pa nota cu Jocabed su yiu mohe a para vigila eibanda y a keda te ora el a mira con nan a coi su ruman homber sano y salvo bai cu ne. Probablemente el a haci esei riba peticion di su mama angustia.

Claro cu no ta tur caso di adopcion ta motiva pa un situacion di emergencia asina bisto, pero hopi bes e motibonan ta similar. Robert ta bisa: “Mi ta un yiu djafo. Lo mester tawata hopi duro pa mi mama cria mi, ya cu tawatin mas yiu den e famia. Mi mama lo a pensa cu tawata miho pa mi pa e laga otro hende adopta mi.”

Si, tin hopi motibo pakico mayornan ta laga otro famia adopta nan yiunan y cria nan. Pero manera e ehempelnan aki ta ilustra, esei no necesariamente ta pa motibo cu e mama ta odia su baby of ta mira un ke otro defecto den dje. Den hopi caso, e mama ta kere sinseramente cu lo bai e yiu miho si un otro famia cri’e.

E Balor di Stimacion

Perspicasia lo por yuda bo mas aleu ora bo pensa riba e motibo pakico bo a ser adopta. Tuma atrobe e ehempel di Moises. Cu tempo, “Farao su yiu mohe a coh’e bai cu ne, y a cri’e como su mes yiu.” (Echonan 7:21) Kico a motiva Farao su yiu mohe pa proteha un criatura siendo cu e tawata sa cu e ta yiu di e Hebreonan condena? Segun Bijbel: “E mucha tawata yora. Y el a haya duele di dje.” (Exodo 2:6) Si, Moises a ser adopta no pasobra el a ser odia of rechasa sino pasobra el a ser stima.

Hopi yiu adopta ta bin realisa cu nan mayornan biologico no a simplemente bandona nan—aunke ta esei ta sosode masha hopi biaha e temponan aki—sino a presenta nan na un instituto pa haci sigur cu nan lo wordo bon cuida. Y otro hende a adopta nan despues pa motibo cu nan a stima nan suficiente pa tuma nan bou di nan cuido. Ta algo asina a sosode cu bo? Door di consentra riba e amor cu bo ta ricibi y balor’e, e dolor cu bo por ta sinti ta bira menos.

Ademas, kisas otro hende fuera di bo famia adoptivo tambe ta stima bo. Si bo ta parti di e congregacion cristian, bo a ser bendiciona cu hopi mama, tata, ruman homber y ruman mohe spiritual cu ta stima bo. (Marco 10:29, 30) Ancianonan cristian por ta “manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” (Isaias 32:2) No basila pa busca contacto cu rumannan cristian maduro y confia den nan. Laga nan sa kico bo ta pensa y sinti.

Robert ta haya cu ta importante pa desaroya lasonan fuerte den e congregacion cristian. E ta bisa: “E bashi cu mi ta sinti t’ei ainda, pero e amor di mi famia spiritual ta push’e te den un huki chikito di mi curason.”

Bo Por Logra den Bida

Evita di saca conclusion incorecto y negativo, incluso e idea di cu pasobra bo ta un yiu adopta, bo no por logra nada den bida. E pensamentonan negativo ei por resulta den un gran desanimacion pa bo! (Proverbionan 24:10) Ademas, en realidad nan no tin base.

Corda, Moises a probecha di tur e oportunidadnan cu el a haya. Bijbel ta bisa: “Moises a wordo educa den tur e siñansa di e Egipcionan, y e tawata un homber di poder den palabra y echo.” (Echonan 7:22) Mas importante ainda, Moises a haya asina tanto instruccion spiritual cu su Tata celestial, Yehova, a bira echt un Persona real p’e. (Hebreonan 11:27) El a logra algo den bida?

Wel, despues Moises a bira lider di un nacion poderoso di talbes tres miyon hende of mas. El a bira profeta, hues, comandante, historiado, mediado di e pacto di Lei y escritor di e prome cinco bukinan di Bijbel. Ademas, mayoria experto ta bisa cu ta e a skirbi e buki di Job y Salmo 90. Si, Moises a logra hopi den bida. Hopi yiu adopta tambe tawatin exito den bida, y bo tambe por.

Robert a logra lanta dos yiu cu exito y actualmente e ta sirbiendo como anciano den e congregacion cristian. Mirando bek riba su añanan como yiu adopta, e ta bisa: “Mi a siña pa no laga loke mi no por corigi molestia mi, sino mas bien pa ta gradicido pa e bendicionnan cu mi a ricibi.”

Si bo ta bibando actualmente den un famia di criansa of bo a ser adopta den un famia, de bes en cuando pensamentonan negativo por molestia bo. Pero purba remplasa nan cu pensamentonan constructivo. Filipensenan 4:8 y 9 ta priminti cu ‘e Dios di pas lo ta cu bo’ si bo sigui ‘ocupa bo mente’ cu loke ta agrada Dios. Pero cua ta algun paso practico cu bo por dal pa bo logra exito den bida mientras cu bo ta biba den un famia adoptivo? Un futuro articulo den e serie aki lo contesta e pregunta ei.

[Plachinan na pagina 26]

E echo cu un hende a adopta bo ta un evidencia cu el a stima bo suficiente pa tuma bo den su famia y percura pa bo