For di Nos Lectornan

Crimen Violento E manera cu e serie “Tin un Solucion pa Crimen Violento?” (8 di juli 2003) a ser redacta tawata simplemente extraordinario. Mi a gusta con e prome articulo a declara e echonan sin menciona e solucion. El a djis finalisa cu algun bon pregunta pa stimula pensamento, locual ta permiti e lector compronde e seriedad di e problema. Despues a sigui e solucionnan basa riba Bijbel. Mi no por haya un miho palabra pa describi e articulonan aki. Nan tawata fasinante!

A. L., Merca

E ultimo articulo den e serie aki, titula “Tin un Solucion Realistico?”, a yuda mi mira cu pa hende stima husticia, nan tin cu cambia tanto nan forma di pensa como nan curason. Manera Isaias 54:13 ta declara, nos tur tin cu laga Yehova Dios siña nos. For di aworaki, cu yudansa di Yehova nos por cuminsa entrena nos mes pa ta e tipo di hende cu Yehova kier pa nos ta.

V. K., Merca

Diabetes Masha danki pa e serie di articulonan di portada “Con pa Biba cu Diabetes.” (8 di mei 2003) Pa 12 aña caba mi tin diabetes Tipo 1, y cu frecuencia mi ta pasa hangua di insulina. Mi esposa ta un gran sosten pa mi. Nos tur dos ta sigui siña tocante e enfermedad, nos ta bai docter hunto y ami ta purba haya un actitud mas positivo. Door cu mi ta sirbi como un superintendente biahero, mi a ripara cu mas y mas di e rumannan cristian ta realisa cu nan mester trata un persona enfermo cu cariño y pasenshi pa por yud’e enfrenta e desafionan den bida. Un actitud asina ta yuda mi sigui sirbi e congregacionnan. E serie di articulo aki a bini net na ora. Un biaha mas, masha danki.

W. B., Polonia

Ami ta un diabetico pa 28 aña caba. Dies miembro di mi famia ta sufri di e enfermedad aki. Boso serie ta contene e informacion mas amplio cu mi a mira te awor. E articulonan ta refleha e amor di nos Creador—algo cu ta haci falta den otro articulonan cu ta trata e tema aki cu no tin un orientacion religioso. Door cu mi no kier tawata mucho dependiente di mi famia, mi a trata di sconde mi malesa pa otro hende. Pa mi, tawata un placer di por cuida otro hende. Pero e articulo aki a yuda mi mira cu pa mi por cuida otro hende miho, mi tin cu cuida mi mes.

L. P., Francia

Tragedia Danki pa e articulo “Hobennan Sa Puntra . . . Con Mi Por Trata cu Tragedia Repentino?” (8 di juli 2003) Ora mi a caba di lesa e articulo aki, mi a sinti cu Yehova a duna mi guia pa un problema cu mi tawatin pa hopi aña. Como cristian, mi sa cu cosnan ta “trabahoso” den e “ultimo dianan” aki. (2 Timoteo 3:1) No obstante, ki ora cu mi a mira un noticia spantoso na television, mi tawata bira masha intrankil. Mi por a sinti mi asina desanima cu mi tawata perde tur energia y, tin biaha, mi tawata keda cas en bes di sali den sirbishi. Mi tawata blo precupa tocante kico por pasa of laga di pasa den futuro. Pero e articulo aki a haci mi corda e importancia di persisti den nos rutina spiritual, y di habri nos curason pa Yehova y pone pleno confiansa den dje. Di henter mi curason, mi ta gradici boso pa boso publicacionnan.

E. K., Japon

Na januari di 2003 mi welo a fayece den hospital. Tawata pa prome bes cu mi a mira un famia pega di mi muri mi dilanti. E articulo aki a contesta mi preguntanan. Vooral e subtema “Dicon Cos Malo Ta Tuma Luga” a conmove mi. El a yuda mi compronde cu morto di mi welo tawata debi na circunstancianan imprevisto. Esei no a nifica cu Yehova a bandona nos. Despues cu mi a lesa e articulo, e miedo cu tawata tormenta mi alma a disparce.

M. O., Japon