BO TA CORDA?
Bo a tuma tempo pa lesa e ultimo edicionnan di E Toren di Vigilancia? Wel, wak si bo por contesta e siguiente preguntanan:
Kico ta e “mundo” cu lo pasa bay?
E “mundo” cu lo pasa bay ta tur hende cu no ta biba di acuerdo cu e boluntad di Dios. (1 Juan 2:17) Tera y humanidad fiel lo keda existi pa semper.—1/1, pagina 5-7.
Maske Abel a muri, con e ta papia cu nos? (Heb. 11:4)
Pa medio di su fe. Nos por siña di su fe y haci esfuerso pa imit’e. Te ainda su ehempel ta bibo y vibrante.—1/1, pagina 12.
Den ki area di nos bida nos tin cu tene cuidou pa no laga nada aleha nos for di Dios?
Algun di e areanan aki ta: nos trabou of carera, e recreo y diberticion cu nos ta scoge, relacion cu miembro di famia cu ta expulsa, uzo di tecnologia moderno, preocupacion cu nos salud, un punto di bista robes tocante placa y ponemento di demasiado enfasis riba nos punto di bista of posicion.—15/1, pagina 12-21.
Kico nos por siña for di Moises su humildad?
En bes di laga e echo cu e tabatin autoridad susha su cabes, Moises a depende riba Dios, no riba su mes. Nos lo no kier laga poder, autoridad ni habilidad natural susha nos cabes; mas bien, nos kier confia den Jehova. (Prov. 3:5, 6)—1/2, pagina 5.
Na unda e hendenan cu haya resureccion lo bay biba?
Un cantidad limita—144.000—lo bay biba den cielo. Pero mayoria di hende lo resucita pa biba aki riba tera, cu e speransa di biba pa semper riba dje.—1/3, pagina 6.
Kico e echo cu e Israelitanan tabata “incircuncida di curason” ta nifica? (Jer. 9:26)
Nan tabata terco y rebelde, y nan mester a elimina tur mal pensamento y deseo of motivacion incorecto. (Jer. 5:23, 24)—15/3, pagina 9-10.
Pakico nos por bisa cu Hesus su bida tabatin sentido?
E tabatin un proposito den bida, esta, di haci e boluntad di Dios. E tabatin un gran amor pa su Tata y el a stima hende. Pues, Hesus tabata sa cu e tabatin e amor y aprobacion di su Tata. Esey ta e clave pa un bida cu berdadero sentido.—1/4, pagina 4-5.
Kico e parti visibel di Dios su organisacion ta inclui?
E ta inclui e Cuerpo Gobernante, comitenan di sucursal, superintendentenan biahero, cuerponan di anciano, congregacionnan y publicadornan individual.—15/4, pagina 29.
Dicon nos por bisa cu Dios no tabata cruel ora el a ehecuta su huicionan den pasado?
Jehova no tin placer den morto di hende malbado. (Eze. 33:11) Loke el a haci den pasado ta demostra cu den su gran amor semper el a spierta hende prome cu e ehecuta su huicio. Esaki por duna nos e speransa di sobrevivi e huicionan di futuro.—1/5, pagina 5-6.
E Israelitanan tabata ehecuta criminalnan colgando nan na staca?
No. Otro nacionnan di antiguedad si tabata haci esey, pero no e Israelitanan. Por lo menos, den tempo di e Scritura Hebreo, nan tabata mata e malbadonan prome, entre otro cu piedra. (Lev. 20:2, 27) Despues nan tabata colga e cadavernan na staca of palo como un spiertamento pa otronan.—15/5, pagina 13.
Dicon ta asina dificil pa logra paz mundial?
Aunke hende a logra hopi cos, nan no por dirigi nan mes paso. (Jer. 10:23) Satanas ta controla e mundo, pesey hende lo no por trece paz mundial. (1 Juan 5:19)—1/6, pagina 16.