E Huicionan Divino di Pasado—Nan Tabata Cruel?

PA CONTESTA e pregunta aki, laga nos analisa brevemente dos ehempel di huicio divino cu tin den Bijbel: e Diluvio di tempo di Noe y e destruccion di e Cananeonan.

E DILUVIO DI TEMPO DI NOE

LOKE HENDE SA BISA: “Ta hopi cruel di parti di Dios pa manda un diluvio cu a caba cu tur hende, cu excepcion di Noe y su famia.”

LOKE BIJBEL TA BISA: Dios a declara: “Mi no tin placer den e morto di e malbado, ma mas bien cu e malbado bira for di su caminda y biba.” (Ezekiel 33:11) Pues Dios no a gosa ora el a destrui e malbadonan den tempo di Noe. Ta dicon el a destrui nan anto?

Bijbel ta splica cu ora Dios a trece e huicionan ey riba hende malbado di pasado, el “a pone un ehempel di loke lo pasa cu hende malbado.” (2 Pedro 2:5, 6) Kico Dios a demostra pa medio di e ehempel of patronchi cu el a pone?

Na prome luga, el a demostra bon cla cu aunke e tin duele di destrui hende malbado, e no ta pasa por halto di e manera cruel cu nan ta trata otro hende y e ta tene nan responsabel pa nan actonan. Den futuro lo e elimina tur inhusticia y sufrimento.

Na di dos luga, Dios su actonan di pasado ta demostra cu den su gran amor semper el a spierta hende prome cu e ehecuta su huicio. Por ehempel, el a laga Noe, un predicador di husticia, spierta e hendenan di su tempo. Pero nan a ignor’e. Bijbel ta bisa: “Nan no a haci caso te ora e Diluvio a bin y lastra nan tur bay cu ne.”—Mateo 24:39.

Dios su patronchi a cambia den transcurso di tempo? No. El a spierta su pueblo Israel cu si nan a imita e maldad di e nacionnan rond di nan, lo el a laga nan enemigonan invadi nan, destrui Jerusalem y hiba nan den cautiverio. A pesar di e spiertamento ey, Israel a imita e maldad di e nacionnan bisiña. Hasta nan a sacrifica nan yiunan na dios falso. Jehova a tuma medida contra nan? Claro cu si, pero solamente despues cu el a manda profeta pa spierta nan bes tras bes pa cambia nan actitud prome cu tabata laat. Jehova hasta a bisa nan: “Siguramente, SEÑOR Dios no ta haci nada, sin cu e revela su conseho secreto na su sirbidornan, e profetanan.”—Amos 3:7.

KICO ESAKI TA NIFICA PA ABO? E patronchi cu Jehova a establece den pasado ta duna nos speransa. Nos por tin e siguransa cu pronto lo e destrui tur hende cruel. Bijbel ta bisa: “Hacidonan di maldad lo wordo corta kita afo ... Ma e humildenan lo hereda e tera, y lo deleita nan mes den paz abundante.” (Salmo 37:9-11) Kico bo ta pensa di un huicio cu ta libra hende di sufrimento? E ta algo cruel of misericordioso?

DESTRUCCION DI E CANANEONAN

LOKE HENDE SA BISA: “Destruccion di e Cananeonan tabata un crimen di guera cruel, mescos cu e genocidionan di nos tempo.”

LOKE BIJBEL TA BISA: “Tur [Dios] su camindanan ta husto; [e ta] un Dios di fieldad y sin inhusticia.” (Deuteronomio 32:4) No por compara un acto di husticia divino cu guera di hende. Dicon? Pasobra contrario na hende, Dios si por lesa loke un persona tin den su curason.

Por ehempel, ora Dios a husga e stadnan di Sodoma y Gomora y a dicidi di destrui nan, e fiel homber Abraham a puntra su mes si e decision tabata husto. E no por a imagina su mes cu un Dios di husticia lo bay “destrui e husto hunto cu e malbado.” Cu pasenshi Jehova a sigura Abraham cu si tabatin sikiera dies hende husto na Sodoma, lo e no destrui e stad pa motibo di nan. (Genesis 18:20-33) Ta bisto anto cu Dios a samina curason di e hendenan ey y a mira con malbado nan tabata.—1 Cronicanan 28:9.

Mescos tambe, Dios a mira e maldad di e Cananeonan y cu su rason el a ordena nan destruccion. Nan tabata notorio pa nan crueldad; por ehempel, nan tabata sacrifica nan yiunan den candela na nan diosnan.a (2 Reynan 16:3) E Cananeonan tabata sa cu Jehova a manda Israel podera di e tera. Esnan cu a opta pa keda y bringa contra e Israelitanan no solamente a opone nan sino tambe Jehova, kende a duna suficiente prueba cu e tabata cu su pueblo.

Sinembargo, Jehova a tene misericordia cu e Cananeonan cu a bandona nan practicanan malbado y acepta su normanan moral. Por ehempel, el a pordona bida di e prostituta Rahab y su famia. Anto ora e habitantenan di Gabaon, un stad di Canan, a pidi misericordia, el a spaar bida di tanto nan como nan yiunan.—Josue 6:25; 9:3, 24-26.

KICO ESAKI TA NIFICA PA ABO? Nos por siña un les importante for di e huicio contra di e Cananeonan. Cada dia nos ta mas y mas cerca di e “dia di huicio y di destruccion di hende malbado.” (2 Pedro 3:7) Si nos ta stima Jehova y ta obedec’e, nos lo biba den un mundo sin sufrimento ora e elimina tur esnan cu ta rechasa su gobernacion husto.

Como muestra di su amor, Jehova ta recorda nos cu decisionnan cu mayornan tuma tin consecuencia pa nan yiunan. E ta bisa den su Palabra: “Scoge bida pa bo biba, abo y bo descendientenan, door di stima SEÑOR bo Dios, door di obedece su bos y door di tene duro na dje.” (Deuteronomio 30:19, 20) E palabranan ey ta di un Dios cruel of di un Dios cu ta stima hende y cu kier pa nan tuma bon decision?