Sosten y Compasion for di Tur Skina

BOLUNTARIONAN a bini for di tur skina di Merca y tambe for di otro pais. Un di e boluntarionan ei tawata Tom (potret ariba) di 29 aña, un bombero di Ottawa, Canada. El a bisa Spierta!: “Mi a mira loke a pasa na television y mi kier a duna sosten moral na mi compañeronan bombero na New York. Mi a bini cu auto diabierna, y diasabra mi a bai Ground Zero (e epicentro di e desaster) pa ofrece mi yudansa. Nan a pone mi traha den e asina yama brigada di hemchi, sacando piedra y fragmentonan cu hemchi.

Lentamente nos a sefta e ruina, shobel pa shobel, buscando cosnan cu lo por identifica e bomberonan cu a muri. Mi a haya un hermen di Halligan cu nan ta uza pa habri porta gelok, y tambe un par di conexion di un slang. Tawata un trabou duro y cuidadoso. A tuma dos ora pa 50 boluntario yena un solo dumptruck.

Djaluna, 17 di september, nos a saca curpa di algun bombero cu a core drenta e edificio e diamars anterior. Nunca lo mi lubida e esena. Tur e trahadonan di rescate a stop di traha, kita nan helm, y a para, como muestra di respet pa nos coleganan cu a muri.

Ora mi tawata para ta mira e esena na Ground Zero mi a realisa diripiente cu bida ta hopi fragil awe. Esei a pone mi reflexiona riba mi bida, mi trabou y mi famia. Apesar di e riesgonan, mi trabou ta masha recompensador, mi por yuda hende y asta scapa bida.”

Testigonan Ta Duna Yudansa Practico

E prome dos dianan di e desaster, rond di 70 hende a busca refugio na e sede mundial di Testigonan di Yehova. Algun di nan cu a perde nan camber di hotel y nan ekipahe, a haya un caminda pa keda y otro paña. Tambe nan a haya cuminda. Pero kisas mas importante ainda, nan a haya sosten emocional cerca ancianonan Cristian experencia.

Tambe Testigonan di Yehova a manda ekipo di emergencia y articulonan di necesidad pa e gruponan di trahado di rescate cu tawata traha na e sitio cu nan a yama Ground Zero. Tambe nan a yuda e cuerpo di bombero cu transport pa nan por a hiba bomberonan na e area di rescate. Ricardo (na banda drechi ariba), un Testigo di Yehova di 39 aña cu ta recohe sushi, a participa den e trabou di limpiesa hunto cu centenares di otronan. Nan tawata saca tonelada di ruina tur dia. Ricardo a conta Spierta!: “Loke bo tawata mira a causa masha hopi stress, specialmente pa e bomberonan cu tawata busca nan cambradanan perdi. Mi a mira nan saca un bombero cu tawata bibo. Un otro bombero a muri ora un curpa a cai fo’i laira riba dje. Hopi bombero tawata yora. Ami mes no por a wanta mas y mi a yora. Riba e dia ei no tawatin hende cu mas curashi cu nan.”

“Tempo y Suseso Imprevisto”

Miles di hende a muri den e desaster. Entre esakinan tin por lo menos 14 Testigo, kendenan tawata na e luga di tragedia of eibanda. Joyce Cummings, di 65 aña y originalmente di Trinidad, tawatin afspraak cu un dentista pega cu World Trade Center. Desafortunadamente, e afspraak tawata rond di e ora di desaster. Ta parce cu el a hala hopi huma aden y nan a hib’e pura hospital, pero docternan no por a scap’e. E tawata un di e hopi casonan di hende cu a sufri e efecto di “tempo y suseso imprevisto.” (Eclesiastes 9:11, NW) Joyce tawata conoci como un predicado cu hopi celo.

Calvin Dawson (wak e cuadro) tawata traha na un compania di bolsa di balor na piso 84 di e toren pasuit. E tawata den su oficina y tawatin un bon bista riba e toren panort djis despues cu avion a dal den dje. Su doño di trabou, cu no tawata den oficina, a bel na telefon pa haya sa kico a pasa. E ta conta: “Calvin tawata purba conta mi kico el a mira. E di: ‘Hende ta bulando for di bentana!’ Mi di cu ne pa e sali for di einan y saca tur hende fo’i oficina.” Calvin no a logra sali na tempo. Su doño di trabou ta sigui bisa: “Calvin tawata un homber maravioso y nos tur tawata apreci’e, asta algun di nos cu no tawata spiritual. Nos a admira con religioso y comprensivo e tawata.”

Un otro victima Testigo tawata James Amato (pagina 10, banda drechi abou), tata di cuater yiu y comandante den e cuerpo di bombero di New York. Hende cu conoc’e a bisa cu e tawatin asina tanto curashi cu “e ta subi drenta un edificio na candela maske hende ta core bai.” Despues di su morto, James a ser promove na e rango di hefe di batayon.

Un otro Testigo bombero, cu shete aña di experencia, tawata George DiPasquale. E tawata casa cu Melissa y tawatin un yiu mohe di dos aña, Georgia Rose. E tawata un anciano den un congregacion di Testigonan di Yehova na Staten Island y tawata na piso 10 di toren pasuit ora e toren a basha abou. E tambe a perde su bida mientras cu e tawata purba salba otro hende.

Esakinan ta solamente dos di e centenares di bombero, polis- y trahadonan di rescate cu a perde nan bida mientras nan cu curashi tawata purba scapa hende. Nos no por caba di enfatisa e balentia di e hombernan aki. E alcalde di New York City, Rudolph Giuliani, despues a bisa un grupo di bombero cu a ricibi promocion: “E echo cu boso tawata dispuesto pa sigui padilanti cu curashi bou di e sircunstancianan di mas dificil ta un inspiracion pa nos tur. . . . Y no tin . . . miho ehempel di curashi cu e Cuerpo di Bombero di New York City.”

Un Sirbishi di Consuelo

Durante e dianan despues di e tragedia, rond di 900.000 Testigo di Yehova na Merca a haci un esfuerso uni rond e nacion pa ofrece consuelo na esnan cu tawata pena. Amor pa prohimo a impulsa nan pa consola esnan na luto. (Mateo 22:39) Den nan trabou di predicacion nan a purba indica e unico berdadero speransa pa humanidad angustia.—2 Pedro 3:13.

E Testigonan a demostra compasion ora nan a acerca hende en general. Nan intencion tawata pa ofrece consuelo for di e Scritura y imita e ehempel refrescante di Cristo, kende a bisa: “Bin cerca Mi tur cu ta cansa y carga, y lo Mi duna boso sosiego. Tuma Mi yugo riba boso, y siña di Mi, pasobra Mi ta manso y humilde di curason; y boso lo haya sosiego pa boso alma. Pasobra Mi yugo ta suave y Mi carga ta lihe.”—Mateo 11:28-30.

Autoridatnan a permiti gruponan di anciano Testigo di Yehova di congregacionnan local di Manhattan drenta den e area di Ground Zero pa papia y consola e trahadonan di rescate. E reaccion tawata hopi bon. E ancianonan aki a comenta lo siguiente: “Awa a yena wowo di algun di e hombernan aki ora nos a lesa textonan biblico cu nan.” Tawatin trahado di rescate ta sosega riba un boto na un waf. “E hombernan tawata mustra totalmente abati, cabes abou, simplemente incapas pa caba di realisa loke nan a mira. Nos a sinta hunto cu nan y a lesa textonan for di Bijbel. Nan a gradici nos masha cu nos a bini, y nan a bisa cu realmente nan tawatin mester di e consuelo aki.”

Hopi bes e hendenan cu e Testigonan a papia cu ne despues di e tragedia tawata kier algo di lesa, y nan a parti miles di foyeto gratis. Algun di e foyetonan aki tawata Ora un Persona Stimá Muri, Hamas Lo Yega di Tin un Mundu Sin Guera? y Dios Realmente Ta Interesá den Nos? Tambe nan a duna atencion special na e serie di articulo di portada di dos edicion di Spierta!: “E Cara Nobo di Terorismo” (na Spaño, 22 di mei 2001) y “Con pa Supera e Trastorno di Stress Post-traumatico” (na Spaño, 22 di augustus 2001). Den hopi caso e Testigonan a splica e speransa biblico di un resureccion. (Juan 5:28, 29; Echonan 24:15) Probablemente miyones di hende a ser alcansa cu e mensahe consolador aki.

Esaki Mester Pone Nos Reflexiona

Tragedianan manera esun aki na New York City mester pone nos tur reflexiona riba kico nos ta haciendo cu nos bida. Nos ta bibando solamente pa metanan egoista, of nos ta purba contribui na e felicidad di otro hende? Profeta Mikeas a puntra: “Kico SEÑOR ta exigi di bo, si no ta pa haci husticia, pa stima misericordia, y pa cana humildemente cu bo Dios?” (Mikeas 6:8) Humildad mester impulsa nos pa acudi na e Palabra di Dios pa haya e berdadero speransa pa e mortonan y pa haya sa kico Dios lo haci pronto pa reestablece condicionnan di Paradijs riba e tera aki. Si bo kier sa mas tocante Bijbel su promesanan, nos ta curasha bo pa tuma contacto cu Testigonan di Yehova den bo bicindario.—Isaias 65:17, 21-25; Revelacion 21:1-4.

[Cuadro/Plachi na pagina 11]

E ORACION DI TATIANA

Lena, biuda di Calvin Dawson, a conta Spierta! di e oracion cu su yiu mohe di shete aña a haci un par di dia despues cu el a haya sa cu su tata lo no bini cas for di trabou. Lena a caba di haci oracion, y Tatiana a pidi: “Mami, mi por haci un oracion?” E mama a bai di acuerdo. Tatiana a resa: “Yehova, nos Tata den shelo, nos kier yama bo danki pa e cuminda aki y pa e dia di bida aki. Y nos kier pidi bo pa bo spirito ta hunto cu ami cu Mami pa asina nos por ta fuerte. Y nos kier pidi bo pa bo spirito compaña Papi, pa asina e por ta fuerte ora e bini bek. Ora e bini bek, lag’e ta bon, fuerte y felis y salu, y nos lo mir’e atrobe. Den nomber di Hesus . . . y, y no lubida di haci Mami fuerte. Amen.”

Komo cu Lena no tawata sigur cu Tatiana a comprende kico ta kico, el a bis’e: “Tiana, esei tawata bunita. Pero Dushi, bo sa si cu Papi no ta bini bek, no?” Mesora, Tatiana su cara a mustra cu el a keda geshock. E di: “E no ta bini bek?” Su mama di: “No. M’a kere cu mi a bisa bo esei. M’a kere cu bo a comprende cu Papi no ta bai bini bek.” Tatiana di: “Pero semper Mami a bisa mi cu lo e bini bek den e mundo nobo!” Realisando porfin kico su yiu mohe tawata kier men, Lena a bisa: “Despensa mi, Tatiana. M’a comprende bo robes. M’a kere bo tawata kier men cu Papi lo bini cas bek mañan.” Lena a remarca: “Mi a sinti mi bon cu e mundo nobo ta asina real pa e.”