For di Nos Lectornan

Maestronan Mi tin cuater aña como juffrouw di scol basico, y mi a keda encanta cu e serie “Con Nos Lo A Haci sin Maestro?” (8 di maart 2002) Un cos cu mi a ripara y cu ta precupa mi ta cu muchanan no sa e diferencia entre bon y malo. Tambe ta dificil pa maestronan ora cu e muchanan sa bon kico ta nan derechonan prome cu nan ta conciente di nan responsabilidadnan. Apesar di esei, duna les ta un carera recompensador, specialmente ora e alumnonan tin smak pa siña y ta haci progreso.

J. K., Merca

Danki pa e articulonan aki. Nan a yuda mi compronde cuanto sacrificio maestronan ta haci pa nos, maske hopi bes nos no ta haci mescos pa nan.

S. M., Italia

Mi tin ocho aña. Boso articulonan tocante maestronan a yuda mi mira cu nan stima e alumnonan. Nan gusta siña mucha, asta ora esei ta dificil. Mi a skirbi mi juffrouw un carchi pa gradicie. Ami cu mi ruman mohe di cuater aña ta siñando con pa siña otro hende tocante Yehova. Maske tin biaha esei ta duro, nos ta hacie pasobra nos stima hende.

T. M., Merca

Cuater aña despues cu mi a stop di duna les, un alumno a skirbi mi pa expresa su aprecio pa tur e biahanan cu mi a yud’e. Hunto cu e carta el a manda un bladwijzer cu e mes a traha. Boso por imagina con contento e carta ei a haci mi!

A. R., Slovenia

Na mi yiunan su scol mi a duna e cabes di scol y dos juffrouw e revista aki. Mi a warda dos dia y a bai bek pa wak kico nan a opina. Nan a pidi 20 revista mas na Spaño y Ingles pa parti pa e mayornan.

M. M., Merca

Aña pasa mi a traha como juffrouw di scol basico pa cuater luna. E otro maestronan cu mi a traha cu ne tawata bisa cu e falta di aprecio di parti di e mayornan a haci nan trabou dificil. Pesei mi a keda hopi contento cu e serie di articulo aki si ta balora e trabou di maestronan dedica. Ora mi trimester a caba, mi a haya hopi carta di gradicimento for di mi alumnonan. Cada un di e cartanan aki ta un tesoro pa mi!

S. I., Hapon

Sintimento di Culpa Mi tawatin mester di e articulo “E Punto di Bista Biblico: Remordimento Semper Ta Malo?” (8 di maart 2002) Debi cu mi tawata spera demasiado di otro hende, tawata dificil pa mi controla mi emocionnan ora mi tawata trata cu mi compañera den e trabou di predica tempo completo. Pero e articulo aki a mustra cu no ta amoroso pa constantemente nos purba laga hende sinti nan culpabel ora nan no haci un cos manera nos ta haya ta bon. Esei por asta stroba e persona di haci e cambionan desea. Mi ta contento cu mi por a cambia mi punto di bista. Por fabor, sigui siña nos e manera cu Yehova ta mira asuntonan.

K. K., Hapon

Perde Bariga Ora mi a mira e articulo “Mi A Perde Bariga” (8 di april 2002), awa a yena mi wowo mientras mi tawata corda con esei a pasa cu mi. Mesora mi a haci oracion pa gradici Yehova cu el a percura e informacion tan necesario aki y pa e consuelo cu e articulo ta duna. Un cos cu semper lo consola nos ta cu den Dios su mundo nobo, esaki lo no sosode nunca mas cu ningun hende.

J. S., Merca