Hobennan Sa Puntra . . .

Con Mi Por Stop di Purba di Ta Perfecto?

“Basicamente ta perfeccionismo ta controla mi bida.”—Carly.

PERFECCIONISMO—e idea cu bo mester ta perfecto den tur loke bo ta haci—ta molestia mente di hopi hoben.

E buki Perfectionism—What’s Bad About Being Too Good? (Perfeccionismo—Ta Malo pa Ta Mucho Bon?) ta bisa: “Tin un gran diferencia entre e esfuerso saludabel pa sobresali y e afan insaludabel pa logra un ideal inalcansabel. Kisas e hende cu ta haci esfuerso pa sobresali ta sinti e necesidad fuerte pa ta ordena y kisas e ta spera hopi di su mes, pero e ta acepta su fayonan tambe y ta mira nan for di un punto di bista positivo. . . . Di otro banda, e perfeccionista ta biba den un miedo constante di haci fout. Su normanan ta demasiado halto.”

E descripcion ei ta pas cu bo? Si bo normanan ta demasiado halto, ta masha facil pa bo limita e cosnan cu bo ta haci y asta evita di cuminsa cosnan cu ta nobo. Of kisas bo tin e tendencia di pospone cosnan importante pasobra bo tin miedo di faya. Bo por tin asta e inclinacion di rechasa personanan cu no ta cumpli cu bo normanan, y core e riesgo di keda bo so, sin ningun amigo.

Si e descripcion akiriba ta pas cu bo, pensa riba e palabranan di Bijbel na Eclesiastes 7:16: “No sea demasiado husto, y no sea sabi di mas. Pakico lo bo ruina bo mes?” Si, e perfeccionista por “ruina” su mes! De echo, nan a yega di relaciona perfeccionismo asta cu trastorno den comemento manera anorexia nervosa y bulimia, cu ta un peliger pa bo salu.a

Pesei talbes bo ta puntra: ‘Con mi por stop di purba di ta perfecto?’ En berdad no ta facil pa cambia bo manera di pensa tocante esaki. Pero cu yudansa di Dios, bo por. Pesei laga nos wak con Dios ta mira perfeccionismo.

Perfeccion Ta Un Meta Alcansabel?

Na prome luga, ta posibel pa bo ta perfecto den e sentido completo di palabra? Bijbel ta bisa cu no, pasobra “no tin ni un hende husto, ni sikiera un . . . Tur a desvia; hunto nan a bira inutil.” (Romanonan 3:10-12) Palabranan cu ta pone bo pensa, no ta berdad? Nan ta indica cu ken cu purba di ta completamente perfecto lo faya.

Wak e ehempel di apostel Pablo, kende tawata un homber masha spiritual. Toch, ni Pablo no por a sirbi Dios sin faya. El a confesa: “Ora mi ta desea di haci loke ta bon, maldad ta presente den mi. Pasobra segun e hende interior mi ta deleita mi mes den e lei di Dios, ma den e miembronan di mi curpa mi ta mira un otro lei cu ta bataya contra e lei di mi mente y ta haci mi preso di e lei di pica, cual ta den mi miembronan.” (Romanonan 7:21-23) Ta cu yudansa di Dios so Pablo por tawata un cristian fiel.

Afortunadamente, Dios no ta exigi ni spera di ningun di nos pa nos ta completamente perfecto. “E sa di kico nos ta traha; E ta corda cu ta stof nos ta.” (Salmo 103:14) Ta te den e mundo nobo di Dios hende finalmente lo alcansa e estado di perfeccion.

Ahusta Bo Expectativanan

Mientrastanto, no ta realista pa pensa cu bo por ta perfecto den e sentido completo di palabra. De echo, bo mester spera cu de bes en cuando bo ta haci fout. (Romanonan 3:23) Tin biaha nos no ta conciente mes di nos foutnan! Salmo 19:12 ta bisa: “Niun hende no por mira su mes fayonan.” (Today’s English Version) Un hoben cu yama Matthew ta expres’e asin’aki: “Bo no ta perfecto—niun hende riba tera no ta perfecto. Si bo ta spera perfeccion di bo mes, hamas lo bo ta felis. . . . Esei no ta realista, e no ta posibel.”

Cu e idea ei na mente, pakico bo no ta purba ahusta algun di bo expectativanan? Por ehempel, bo ta caba cu bo mes dor di purba di ta e miho den un cierto cos? Bijbel ta indica cu un esfuerso intenso asina, basicamente, ta nada mas cu “banidad y coremento tras di biento.” (Eclesiastes 4:4) Echo ta cu masha poco hende ta logra mes di ta e miho. Y asta ora un hende logra esei, generalmente ta cuestion di tempo prome cu bin un otro miho cu ne.

Apostel Pablo a duna e conseho: “Mi ta bisa cada un di boso pa no pensa mas halto di su mes cu e mester pensa; ma pa mas bien pensa di su mes cu sano huicio.” (Romanonan 12:3) Keda realista! Ahusta bo expectativanan. Esakinan mester ta un refleho di tanto bo capasidadnan como bo limitacionnan. Busca manera di sobresali, pero no busca perfeccion. Pone meta spesifico pero cu ta alcansabel.

Por ehempel, Pablo a anima Timoteo pa e bira “un trahado cu no tin motibo pa tin berguensa, cu ta parti e palabra di berdad na un manera corecto.” (2 Timoteo 2:15) Si, Pablo a anima hende pa nan sobresali, no pa busca perfeccion. Mescos tambe, fiha metanan rasonabel pa bo mes. Y si bo no ta sigur kico ta “rasonabel”, papia riba e asunto aki cu bo mayornan of cu un otro hende grandi di confiansa.

Algun hende ta asta recomenda pa concientemente bo purba haci cierto cosnan cu bo no ta asina bon aden, manera cuminsa haci un deporte nobo of toca un instrumento. Berdad, segun cu bo ta siña algo nobo, lo bo haci hopi fout sigur. Riba su mes, no tin nada malo den esei. Talbes esei lo yuda bo mira cu hacimento di fout ta parti di e proceso di siñamento.

Pa kico cu bo kier logra—sea ta skirbi un scriptie pa scol of domina un sonata di piano—pensa riba un conseho mas di apostel Pablo: ‘No sea floho den bo trabou.’ (Romanonan 12:11, NW) Si, no pospone cosnan djis pasobra bo tin miedo di faya.

Un hoben a cria e custumber di pospone proyectonan di scol cu e excuse cu e tawata “organisando su mes.” Organisacion personal por ta un bon cos, pero tene cuidou pa e no bira un excuse pa pospone cosnan. E mucha mohe aki a bin realisa cu “si bo tin cu scohe entre entrega un scriptie cu bo no ta completamente satisfecho cu ne y no entrega uno mes, semper ta miho bo entrega uno.”

Saca Ideanan Perhudicial for di Bo Mente!

Ta di compronde cu kisas no ta facil pa haci un trabou cu no ta perfecto. Kisas ainda bo mente ta carga cu ideanan critico of negativo. Kico bo por haci? Un cos ta sigur, pensamento negativo ta masha perhudicial. Pesei haci un esfuerso conciente pa saca for di bo mente ideanan irasonabel tocante bo mes. Mantene un sentido di humor asta ora bo faya. Al fin y al cabo, tin “un tempo pa hari.” (Eclesiastes 3:4) Corda tambe cu Yehova ta condena abla ofensivo—asta ora nos dirigi esei contra nos mes.—Efesionan 4:31.

En bes di condena bo mes constantemente, aplica e palabranan di Proverbionan 11:17: “E hende misericordioso ta haci bon na su mes alma, ma e hende cruel ta tormenta su mes carni.” Pesei pensa riba e pregunta aki: Tawata facil pa bo haya amigo cu e normanan demasiado halto cu bo a pone? Probablemente no. Kisas asta bo a rechasa hende pasobra nan no ta perfecto. Pues, kico bo por haci?

Aplica e mandamento di Bijbel: “Boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci.” (Colosensenan 3:13) Si, door di ta mas rasonabel den loke bo ta spera di otro hende, lo bo tin mas chens di haya amigo!

Kisas bo ta puntra: ‘Pakico hende tin tendencia di evita mi pa motibo cu mi ta un perfeccionista?’ Wel, ora otro hende tende bo papia di bo expectativanan halto, pensa ki efecto esei lo por tin riba nan. E buki When Perfect Isn’t Good Enough (Ora Perfecto no Ta Suficiente) ta splica: “Si bo ta keha demasiado ki ora cu bo haya menos cu un 10 pa un proefwerk, esei lo por ta un insulto pa bo amigonan cu tin cu lucha pa haya un 7 of 6.” Pues purba di ta menos negativo y no pensa riba bo so. Hende lo haya cu bo ta mucho mas agradabel pa anda cu ne.

E hoben Carly ta bin bek riba e asunto bisando: “Basicamente mi tin cu stop di busca perfeccion den tur loke mi ta haci.” Con bo por haci esei? Medita riba e manera cu Dios ta mira cosnan. Si ainda bo tin problema cu bo punto di bista tocante esaki, papia cu bo mayornan of cu un cristian maduro den bo congregacion. Pidi Dios den oracion pa e yuda bo cambia bo manera di pensa. Oracion por ta un yudansa poderoso pa combati perfeccionismo.—Salmo 55:22; Filipensenan 4:6, 7.

Corda semper cu Yehova no ta exigi perfeccion; e ta simplemente spera di nos cu nos ta fiel na dje. (1 Corintionan 4:2) Si bo ta haci esfuerso pa ta fiel, bo por echt sinti bo contento cu bo mes—maske bo no ta perfecto.

[Nota]

[Plachi na pagina 17]

Miedo di faya por pone cu bo no ta haci casi nada

[Plachi na pagina 18]

Ora bo ta purba siña un cos nobo, esei ta yuda bo mira bo fayonan for di un punto di bista positivo