Petrolio Lo Caba un Dia?

“Sin [energia] e wielnan di industria no por funciona . . . Lo no por traha auto, truck, trein, barco of avion . . . Sin energia, casnan lo keda friu y scur, cuminda lo ta curu. . . . Sin recursonan di energia, nos lo ta literalmente bek den Edad di Piedra.” —Saca for di “Encuesta Geologico Mericano di Evaluacion di Petrolio Mundial 2000.”

EXPERTONAN di energia ta kere cu e reservanan di petrolio cu tempo lo agota. Algun di nan ta calcula cu e reservanan mundial di petrolio lo dura un 63 pa 95 aña mas. Mientrastanto, hende ta haciendo uzo di otro fuentenan di energia, di cua algun ta ser uza ya pa decadanan. Entre e fuentenan di energia renobabel—es decir cu por bolbe ser abastece rapidamente—tin e siguiente tipo: solo, biento, ola di lama, cayente di oceano y hidroelectrico. Pero actualmente, ainda tin problemanan grandi relaciona cu nan produccion y distribucion.

E prospecto cu hende lo caba cu tur fuente di energia iremplasabel, anto e ora ei numa bai haci uzo di esnan renobabel sigur ta un prospecto tristo. Companianan petrolero ta cla pa probecha di e tempo limita cu supuestamente ta ser calcula cu petrolio lo dura. Desafortunadamente, tin tur motibo pa spera cu e problemanan social y di medioambiente liga cu petrolio lo dura mes largo cu e petrolio. No tin nodi bisa cu e raiz di e problemanan aki no ta e petrolio mes. Ta hende su golosidad y sed pa poder ta loke a duna petrolio su mal reputacion.

Felismente, e futuro di petrolio—y de echo di tur fuente di energia—no ta den man di e nacionnan. Na final di cuenta, e ta den man di Esun cu a crea tera y ta percura p’e, Yehova Dios, kende a priminti cu pronto tur problema social y di medioambiente relaciona cu uzo y mal uzo di e recursonan di tera lo disparce. (Revelacion 4:11) Manera Bijbel ta declara, e tempo ta serca pa Dios “destrui esnan cu ta destrui e tera.” Dios su gobernacion husto lo resulta den “un shelo nobo y un tera nobo”, un mundo sin maneho egoista y sin inhusticia. Un mundo den cua lo uza e recursonan di e tera pa e beneficio di henter humanidad obediente.—Revelacion 11:18; 21:1-4.

[Plachinan na pagina 12]

Fuentenan alternativo di energia ta entre otro, panel di solo y molina di biento