For di Nos Lectornan

Belasting Mi tin un par di siman ta haciendo un investigacion riba e topico di belasting. A lanta preguntanan manera: Ki tempo a cuminsa cobra belasting? Mi tawata den pleno investigacion ora mi esposa a ricibi un ehemplar di e Spierta! di 8 di december 2003 cu e serie “Bo Ta Paga Mucho Belasting?” Pa mi sorpresa, e tawata trata net algun di e puntonan cu mi tawata investigando.

S. Y., Tadjikistan

Transfusion di Sanger Mi ta un docter y un predicado di tempo completo. Y mi ta masha gradicido cu boso a publica e relato di Yasushi Aizawa, “Mi A Acepta Dios Su Punto di Bista di Sanger.” (8 di december 2003) Su experencia ta casi mescos cu esun di mi pasobra mi tambe tawatin cu siña pone medicina na di dos luga den mi bida. Un dia lo mi topa ruman Aizawa den Dios su mundo nobo, caminda nos tur dos lo perde trabou como docter. Lo no tin mester di docter e tempo ei!

A. S., Ecuador

Den october di 2002, docternan a diagnostica cu nos yiu mohe mas chikito tin cancer. E tratamento tawata doloroso. El a encera dos operacion, chemotherapie y terapia di radiacion. Durante e tempo ei, nos a haci hopi esfuerso pa pega na e mandamento di Bijbel pa abstene di sanger. Esaki no tawata facil, pasobra na Lituania nan ta duna casi tur mucha cu ta ricibi chemotherapie transfusion di sanger. E articulo “Mi A Acepta Dios Su Punto di Bista di Sanger” a fortalece nos pa sostene Yehova su punto di bista. Y awor e cancer di nos yiu mohe a stop di plama.

M. y S. D., Lituania

Rivalidad Entre Ruman Mi kier bisa boso masha danki pa e articulo “Hobennan Sa Puntra . . . Con Mi Por Sali for di e Sombra di Mi Ruman?” (8 di december 2003) Mi tin 16 aña di edad, y ta parce mi cu semper mi ruman mohe mas grandi ta haya tur atencion. Claro cu mi ta conciente cu Yehova si ta mira mi, pero di un of otro manera toch mi ta sinti mi mi so. E articulo aki a mishi cu mi sintimentonan. Y como cu e tawatin un tono asina bondadoso, ora mi a les’e mi wowo a yena cu awa. Danki pa e conseho practico. El a conmove mi.

M. O., Japon

De bes en cuando mi sa haya e mesun sintimento cu tur e hobennan cita den e articulo. Te asina leu cu mi por corda, semper mi ruman mohe mas grandi a ser mira como e bon ehempel. Pues mi sa kico kiermen cu nan ta compara bo semper cu un otro miembro di famia. Loke boso a bisa tocante haya algo cu abo por haci bon, tawata manera “apel di oro den montura di plata”, esta, palabranan cu a yega net na ora.—Proverbionan 25:11.

S. T., Merca