Museonan—Dicon Nan Ta Bal un Bishita?

WASHINGTON, D.C., e capital di Merca, ta atrae masha hopi turista.a Kico ta atrae nan einan? Un di e atraccionnan principal ta White House, e residencia oficial di e presidente na Pennsylvania Avenue Num. 1600. E monumento historico aki ta atrae mas cu un miyon y mei bishitante tur aña. Nan tin mag di cana pasa door di cierto salanan cu ta decora na estilo di diferente periodo di historia. E salanan ta muebla cu mueblenan balioso di antiek y tambe cu set di porselana y di forki cu cuchiu di antiek.

Un otro edificio impresionante ta Capitolio, e sede gubernamental di e pais aki di casi 300 miyon habitante. Segun cu bo ta cana door di e salanan y gangnan di Capitolio, lo bo mira estatua di lidernan famoso di pasado. Si bo ta alerta, lo bo por asta mira tambe un of otro senador famoso cana pasa. Pero no ta tur turista ta bin Washington pa mira e edificionan aki. Hopi di nan ta ser atrai na e centronan di cultura cu tin den e stad aki—e museonan y galerianan di arte.

Tin asina tanto museo y galeria den Washington, D.C., cu lo ta imposibel pa trata nan tur, y pa bo bishita nan tur bo mester keda pa un bishita hopi largo na Washington. Laga nos wak cuanto nos por explora durante un bishita di djis un par di dia.

Un Museo di Museonan

Sin ningun duda, e centro cu mas ta interesa bishitantenan ta e Instituto Smithsonian. Dicon? Pasobra e no ta simplemente un museo; e ta henter un coleccion di museo y di centronan di conocemento. E Kasteel Smithsonian ta facil pa identifica riba e Paseo Nacional (of National Mall, esaki ta un pad hancho di yerba di un kilometer y mei cu tin Capitolio na un punta y e Monumento di Washington na e otro punta). E kasteel ta e edificio colorido traha di piedra di santo cora cu ta resalta na banda robes di e famoso pad ora bo ta cara pa e obelisco di e Monumento di Washington.

Cua ta e luga mas popular di e compleho Smithsonian? Den nos era di ciencia, esei ta e Museo Nacional di Aire y Espacio, cu segun un buki di guia turistico, “ta e museo mas bishita na mundo.” Dicon e ta asina popular? E tin 23 galeria extenso, y su exhibicionnan, di cua hopi ta colga den blafon, ta ilustra e historia excitante di bulamento. E inmenso galeria Echonan Memorabel di Bulamento ta asta show e avion di motor Flyer, cu ta e avion cu Orville Wright a uza pa su biahe historico na Kitty Hawk, Nort Carolina, na 1903. Djis pega tin e avion di Charles Lindbergh, Spirit of St. Louis, cu el a laga traha specialmente pa e por a gana e premio pa e prome buelo solo cu a crusa Oceano Atlantico na 1927. Y claro cu tin exhibicionnan moderno di navenan espacial cu a marca historia y tambe di barancanan cu hende a bin cu ne for di luna.

Ta Placa Ta Atrae Bo?

Djis pasuit di e pad, y na un distancia cu bo por cana for di e Monumento pa Conmemora Washington, tin un edificio cu ta atrae miles di ciudadano curioso, kendenan probablemente ta cana cu muestranan di e producto cu ta sali for di e luga aki—placa di papel! Ta e Cas di Moneda. E tour di 40 minuut ta mustra e proceso di graba y imprimi cu ta necesario pa traha e biyetenan di dollar cu hende ta uza den nan transaccionnan diario. Pa aña, nan ta imprimi placa di papel cu ta bal mas cu 140 mil miyon dollar! Acaso e papel special cu nan ta uza ta un secreto di Estado? Pa cuanto tempo un biyete di dollar ta keda den circulacion? Ki pasonan nan ta tuma pa contraresta e trahamento di placa falso? Tur e preguntanan aki y hopi mas ta ser contesta durante e tour aki.

Banda di e Cas di Moneda tin un edificio unico cu a habri na 1993, y cu ta atrae bishitante for di rond mundo. Ta e Museo Mericano pa Conmemora Holocausto, un luga cu ta pone bo para keto y pensa.

Un Museo pa Conmemora Asesinato Masal y Sobrevivencia

E nomber Holocausto ta bin di un palabra Griego uza den Bijbel cu ta nifica un ofrenda kima completo. (Hebreonan 10:6) Sinembargo, relaciona cu e museo aki, “Holocausto ta referi na e persecucion y destruccion sistematico cu estado a patrocina di Hudiunan Europeo na man di Alemania Nazi y su colaboradonan entre 1933 y 1945.” Hudiunan tawata e victimanan principal, pero e strategia di Estado tawata tambe pa purba elimina e dos tribunan gitano Roma y Sinti, hendenan incapasita, Polaconan, presonan Sovietico di guera, homosexualnan, Testigonan di Yehova y disidentenan politico.

E prome impresion cu bo ta haya ora bo cana drenta den e edificio no ta di un caluroso bonbini. Camponan di consentracion Nazi tawata diseña pa intimida hende. E museo ta refleha e sintimento ei. Loke bo ta mira rond di bo ta un structura masha halto mes, menasante, impersonal, traha di staal y bloki manera un fabrica. For di e Sala di Testimonio na e prome piso, bo por hisa cara wak e dak di staal y glas cu tin riba e di tres piso. E bista door di e dak, segun e descripcion den un foyeto oficial, “ta troci, deforma y poni na un angulo straño.” E arkitecto su intencion tawata pa crea un ambiente den cua e bishitante ta sinti cu “tin algo robes akinan.”

E museo tin cinco piso, pero e area principal pa publico haya tour ta di piso cuater pa piso dos, y nan ta sugeri bo pa cuminsa bo tour na piso cuater. Bo ta haci e tour riba bo mes y e por dura dos pa tres ora. Debi na e plachinan detaya di e persecucion y asesinato di e victimanan, ta ser recomenda pa no laga mucha bou di 11 aña bishita e Exhibicion Permanente. Na prome piso tin un exhibicion separa pa mucha cu yama E Relato di Daniel. E ta duna e historia di e Holocausto for di e punto di bista di un mucha den Alemania Nazi.

E liftnan pa bai di cuater piso ta manera container di staal, friu y menasante. E relato historico di Holocausto ta cuminsa riba e piso aki y ta abarca e “Atake Nazi”, 1933-39. Aki bo ta mira con propaganda troci di Nazi a logra controla e poblacion Aleman y inculca miedo y teror, specialmente den curason di miyones di Hudiu Europeo. Kico bo por mira na di tres piso?

E piso aki tin e tema alarmante “Solucion Final”, 1940-45. Segun e guia pa bishitante, e “ta describi e ghetonan, deportacionnan, trabou di catibo y camponan di consentracion, y e implementacion di e ‘Solucion Final’ [eliminacion di e Hudiunan y otro hende] mediante instrumentonan di destruccion manera e escuadronnan mobil di matansa y e camponan di morto.”

E di dos piso tin un tema mas positivo: “Ultimo Capitulo.” E ta splica “rescate, resistencia, liberacion y esfuerso di e sobrevivientenan pa reconstrui nan bida.” Na un banda di e piso tin e Centro Educativo di Wexner, cu tin algo di sumo interes pa hopi Testigo di Yehova. Tin varios computer caminda e bishitante por busca e relatonan di algun di e Testigonan cu a sufri y, den algun caso, asta sacrifica nan bida.

Por ehempel, bo por sigui e relato heroico di Helene Gotthold, di Dortmund, Alemania. E tawata mama di dos yiu, y el a insisti cu e mester asisti na reunionnan cristian apesar di e prohibicion Nazi. Nan a ehecut’e cu guiyotina na december 1944. Bo por mira hopi relato mas di victima- y martirnan di e era di campo di consentracion.

Na e piso aki tin tambe e remarcabel Toren di Bida (conoci tambe como e Toren di Cara), cu ta tres piso halto. E ta un coleccion di centenares di potret di habitantenan Hudiu di Eishyshok (conoci tambe como Eisiskes), un pueblito cu ta keda den e pais cu awe ta Lituania. E potretnan a ser saca entre 1890 y 1941. E tawata un comunidad Hudiu cu a prospera pa 900 aña. Anto na 1941 un escuadron mobil di matansa di SS (Einsatzkommando) a masacra henter e poblacion Hudiu den apenas dos dia! Segun registronan oficial Nazi, nan a elimina 3.446 Hudiu—989 homber, 1.636 mohe y 821 mucha. Burocracia Nazi tawata masha cabal.

Na di dos piso bo ta haya tambe e Sala di Recuerdo, cu tin textonan di Bijbel—manera Deuteronomio 30:19 y Genesis 4:9 y 10—inscribi riba e murayanan di marmer. Tambe tin varios evidencia di e persecucion di Testigonan di Yehova, manera e triangulo biña cu nan tawatin cu bisti como nan identificacion. Wak bon y purba reconoce e Testigonan segun cu bo ta tuma e tour. Tin hopi rasgo mas di e museo cu ta bale la pena bo investiga, incluso e seccion grandi di investigacion cu tin na di cinco piso.

Ora bo sali for di e museo y bo ta bek riba caya, lo bo hala un rosea di alivio. Pero laga nos sigui pa e museo di mas nobo na Washington, uno cu ta abarca un otro tipo di historia cu tambe a inclui intento di genocidio.

Un Berdadero Museo di America

E museo mas resien den e coleccion di museo Smithsonian ta conmemora e prome habitantenan di America. Ta trata aki di mas cu 500 tribu di Mericano nativo cu tawata ocupa e pais aki prome cu Europeo of Africano a pone pia na tera. Esaki ta e Museo Nacional di Indjan Mericano (NMAI), situa na e Paseo Nacional banda di e Museo di Aire y Espacio. El a keda inaugura dia 21 di september 2004. Bo por identifica e museo facilmente na su diseño unico di liñanan curva. E murayanan exterior di e edificio di 23.000 meter cuadra ta gepleister cu calki kasota for di Minnesota. E ta dun’e e aparencia di “baranca gestapel riba otro cu a haya su forma door di cobamento di biento y awa.”

Kico bo por spera di haya den e museo ei? E cinco exhibicionnan inaugural principal “ta presenta aproximadamente 7.000 obheto for di e coleccion mundialmente renombra di NMAI cu ta consisti en total di 800.000 obheto di cultura etnico y arkeologico.” (Insight, e boletin Smithsonian) Tin macutu, articulo di klei y di cralchi cu ta representa tribunan masha leu for di otro manera e Mapuche di Chile, e Quechua di Peru, e Dakota di Merca y e Anishinabe di Canada.

Segun e palabranan di W. Richard West, Jr., kende ta un indjan Cheyenne di suit y director fundado di e museo, e proposito di NMAI ta pa “corigi ideanan robes y yuda tur pueblo, sea nativo of no nativo, haya un miho comprondemento di e bida y cultura di e pueblonan nativo di e hemisferio aki.” Ta dura mas o menos dos ora pa bishita e coleccion aki di indjan Mericano. Unda nos por bai awor den nos tour rapido di e tantisimo exhibicionnan cu tin na Washington?

Arte Atrabes di Siglonan

Laga nos djis crusa e pad bai na e magnifico Galeria Nacional di Arte. E galeria a habri na aña 1941. E tour di e museo ta laga bo mira ocho siglo di arte. Si bo ta un amante di arte, miho bo cuminsa bo tour un mainta tempran, ya cu dependiendo di bo era faborito di arte, lo bo mester di varios ora pa cana, keda wak y medita pa absorba e coleccion maraviyoso aki. Afortunadamente, tin hopi banki pa si bo kier sinta y studia cualkier obra en particular of si bo kier djis sosega.

Como cu Iglesia Catolico tawata e sponsor principal di arte entre siglo 13 pa siglo 15, mayoria di e cuadronan tin temanan religioso. Lo bo haya di e pintor Giotto su “La Birgen y Yiu”, y obranan di Leonardo da Vinci. Di siglo 16, tin Rafael su “La Birgen di Alba” (1508), y tambe obranan di Tintoretto, Tiziano y otronan. Studiantenan di Bijbel lo ta interesa den Tintoretto su cuadro “Cristo na Lama di Galilea” (rond di 1575/1580), cu ta mustra e disipelnan di Cristo den un boto di piscado meimei di un tormenta. Un otro referencia biblico ta e cuadro di El Greco “Cristo Limpiando e Tempel.” Compara e estilonan hopi distinto di e artistanan aki; anto tuma nota di e colornan bibo y accion dramatico di El Greco.

E coleccion di cuadro di siglo 17 ta inclui, entre otro, obranan di Rubens y Rembrandt. Studiantenan di Bijbel lo ta fasina atrobe cu Rubens su presentacion di “Daniel den e Cueba di Leon”, pinta rond di aña 1615. Tuma nota di Daniel su trankilidad segun cu e tawata gradici Dios cu el a spar su bida. Awor laga nos bula bai siglo 19 y bishita e pintornan impresionista Frances.

Esaki ta un di e miho coleccionnan di impresionista pafo di Paris. Si pa añanan bo a biba cu copia di e pinturanan, ta masha emocionante pa ta cara cara cu un original. Obranan famoso di Cézanne, Manet, Renoir, Degas y Monet lo laga bo keda babuca, segun cu bo ta studia nan estilo y interpretacion di e manera cu lus ta cai riba cos. Tambe tin algun obra sobresaliente di artistanan Mericano manera Mary Cassatt (“Muchanan Hungando Cant’i Lama”), James Abbott McNeill Whistler (“E Mucha Mohe Blanco”) y Winslow Homer (“Hiba pa Brisa”).

Tin un exhibicion mas cu lo bo kier bishita, e Edificio Oost, cu su coleccion di arte moderno y contemporaneo. Den e patio tin algun escultura grandi di Alexander Calder, Henry Moore y otronan. Tambe lo bo haya un tapijt pa muraya di e artista di Catalonia, Joan Miró.

Manera bo por mira, e Galeria Nacional lo tene bo ocupa pa varios ora of a lo menos tanten cu bo tin energia. Claro cu tin mas galeria di arte cu bo por bishita, manera Galeria di Arte di Corcoran, cu tin un bunita coleccion di artistanan Europeo y Mericano, incluso cuadronan impresionista di Monet y Renoir. Tambe e tin e coleccion mas grandi di obranan di Jean-Baptiste Camille Corot pafo di Francia. Cuanto tempo y energia bo tin disponibel? Esei lo determina cuanto galeria mas lo bo por bishita.

Pero un cos si, lo bo bai for di Washington cu un mayor aprecio y comprondemento pa cultura. Y kisas e ora ei lo bo compronde miho e expresion di e autor Frances Destouches: “Critica ta facil, produci arte ta dificil.” Podise bo bishita lo anima bo tambe pa tour e museo- y galerianan cu tin caminda bo ta biba. Bishita nan, y wak te con leu religion y Bijbel a influencia nan.

[Nota]

[Plachi na pagina 22]

E Kasteel Smithsonian

[Reconocemento]

Smithsonian photo by Eric Long

[Plachinan na pagina 22, 23]

E Museo Nacional di Aire y Espacio tin e “Flyer” original di 1903 (na banda drechi) y Lindbergh su “Spirit of Saint Louis” (abou)

[Plachinan na pagina 23]

E Cas di Moneda ta atrae hopi bishitante

[Plachi na pagina 24]

E Toren di Bida ta tres piso halto

[Plachi na pagina 24]

Un uniform di campo di consentracion cu un Testigo di Yehova a bisti

[Plachi na pagina 25]

Museo Mericano pa Conmemora Holocausto

[Plachi na pagina 25]

Helene Gotthold

[Reconocemento]

USHMM, courtesy of Martin Tillmans

[Plachi na pagina 26]

E Museo Nacional di Indjan Mericano tin un diseño unico di liñanan curva

[Reconocemento]

Photo by Robert C. Lautman

[Plachi na pagina 26]

Un vas di glas supla, traha pa un artista indjan Mericano moderno

[Reconocemento]

Photo by Ernest Amoroso, © Smithsonian Institution/National Museum of the American Indian

[Plachi na pagina 26]

Winslow Homer su cuadro “Hiba pa Brisa”, den e Galeria Nacional di Arte

[Reconocemento]

Winslow Homer, Breezing Up (A Fair Wind), Gift of the W. L. and May T. Mellon Foundation, Image © Board of Trustees, National Gallery of Art, Washington

[Reconocemento pa Potret na pagina 23]

Ariba: Fondo: Smithsonian photo by Dane Penland; avion: © Mark Polott/Index Stock Imagery; tour: Photo by Carolyn Russo/NASM; tres potret abou: Courtesy of the Department of the Treasury, Bureau of Engraving and Printing