For di Nos Lectornan

Mucha Desfigura E experencia di Mailyn a conmove mi masha. (“Un Cara Nobo pa Mailyn”, 8 di juni 2004) Ora mi a lesa con e mucha di 11 aña aki ta lucha cu un malesa teribel, y apesar di esei ta papia cu otro hende tocante su speransa basa riba Bijbel, esaki a anima mi.

M. B., Italia

E manera positivo cu Mailyn y su famia ta mira cosnan tawata un gran animacion pa mi. Den e mundo djawe, medionan di comunicacion ta pone demasiado enfasis riba aparencia personal. Esaki por ta desalentador. Mi kier pa Mailyn sa cu pa mi su berdadero bunitesa ta masha bisto. Mi ta spera cu lo mi tin e oportunidad pa alegra hunto cu ne ora Yehova dun’e un cara nobo den Su mundo nobo. Mailyn su fe a haci mi mas fuerte.

M. S., Merca

Pronto mi tin cu haci un operacion pa kita un pecho. Ora malesa afecta bo aparencia, bo mester tin fortalesa y curashi pa bo no bira deprimi. Mailyn su curashi y optimismo a fortalece mi. Mi kier bisa Mailyn esaki: Mi ta desea bo tur cos bon. Ami ta haya bo masha bunita!

G. R., Francia

Mi a nace cu un incapasidad fisico cu ta conoci como hazelip. Hopi bes e muchanan na scol tawata keda wak mi straño. Tin di nan asta tawata scupi mi. Mi ta kere cu loke a yuda mi haya curashi y confiansa den mi mes ta e instruccion basa riba Bijbel cu mi mama a duna mi. Pero te cu awor cu mi tin 31 aña, ainda mi ta sinti mi malo cu mi aparencia. Pesei e experencia di Mailyn a conmove mi masha. Mi sa cu ta cu e yudansa di Yehova nos por vence cualkier otro dificultad cu nos lo haya nos cu ne.

T. S., Japon

Mailyn a combence mi cu felicidad y contentamento no ta depende di aparencia fisico. E unico manera pa haya felicidad y satisfaccion ta door di sirbi y stima nos Dios. Mailyn su ehempel tawata un estimulo pa mi.

A. T., Filipinas

Maltrato Durante Enamoracion Mi a keda masha gradicido pa e articulo “Hobennan Sa Puntra . . . Dicon E Ta Trata Mi Asina Malo?” (8 di juni 2004) Mi tawatin un mucha homber cu tawata abusa di mi. Ki ora cu un cos a bai robes, e tawata bisa cu ta mi falta. Door cu mi a lanta den un famia caminda cu tawatin violencia y insulto, mi a kere cu su comportacion tawata algo normal. Awor mi ta contento cu mi a termina e relacion ei; mi exmucha homber a demostra cu lo e no por ta un bon casa.

Anonimo, Belize

E articulo a expresa mi sintimentonan. Prome y durante mi matrimonio, mi a pasa den e tipo di situacionnan cu boso a describi. E violencia psicologico cu mi a experencia a caba cu mi respet propio. Mi ta spera cu e articulo ta motiva hopi hende pa analisa nan relacion durante enamoracion. Ta masha sabi pa siña conoce otro bon prome cu casamento, pa asina evita e problemanan ei.

M. M., Alemania

Fe bou di Prueba Mi a disfruta di e articulo “E Fe di un Famia Ta Pasa den Prueba.” (8 di mei 2004) Mi tin dies aña di edad y mi tin inflamacion di tripa, e asina yama enfermedad di Crohn. Mayoria parti di ultimo winter mi a keda drenta hospital sali, te ora cu finalmente docternan a diagnostica mi malesa. E articulo aki realmente a yuda mi haya mas confiansa y tambe curashi pa trata cu mi malesa. Mi ta anhela e dia cu mi por biba den Paradijs, caminda nos lo no tin e problemanan aki mas.

M. H., Merca