Destruyendo Obstaculonan pa Establece Unidad

NOS no a scoge e famia of e nacion den cua nos a nace, ni nos no a dicidí cua cultura lo forma nos pensamentu. Nos no tabatin control riba tal cosnan. Nos tur ta dependé di tempu i circunstancia. Pero, nos por controlá con nos ta considerá otro hende i con nos ta actua pa cu nan.

Bijbel ta describí con nos por haci esei. Considerá algun principio cu lo yuda nos eliminá obstáculonan pa comunicacion cu hende cu por a bini di un pasado cu ta diferente di nos pasado.

“E Dios cu a traha e mundu i tur loke tin den dje . . . a traha for di un solo hende tur nacion di hende, pa nan biba riba tur e superficie dje tera.” (Echonan 17:24, 26) Nos tur ta miembro dje mésun famia humano i p’esei tin hopi cos en comun. Comunicacion ta bira mas fácil si nos ta busca loke nos tin en comun. Nos tur ta deseá bon amigunan i tin e necesidad di sinti nos stimá i respetá. Tur hende ta purba di evitá dolor físico i emocional. Hende di tur cultura ta stima música i arte, ta conta chasco, ta kere den trata otro hende nechi, i ta busca manera pa ta felis.

‘No haci nada debí na pleitamentu of debí na halsamentu, sino considerá cu humildad di mente cu e otronan ta superior cu boso.’ (Filipensenan 2:3) Esei no kier men cu nos mester considerá otro hende superior cu nos den tur cos. Mas bien, nos tin cu tuma na cuenta cu den algun aspecto di bida, otro hende ta superior. Nos nunca mester pensa cu sea nos of nos cultura tin un monopolio riba tur loke ta bon.

“Realmente, anto, miéntras cu nos tin tempu faborabel p’e, laga nos obra loke ta bon pa cu tur.” (Galationan 6:10) Simplemente dor di tuma iniciativa di ser cariñoso i atento na otro hende, apesar di nan pasado cultural, nos por haci hopi pa vence un obstáculo pa comunicacion.

“Sabi esaki, mi rumannan stimá. Tur hende mester ta lihé pa scucha, tardá pa papia, tardá pa rabia.” (Santiago 1:19) Bon comunicador mester haci mas cu papia; nan mester ta scuchador empático.

“Conseho den e curason di un hende ta mescos cu awa profundo, pero e hende di dicernimentu ta esun cu lo sak’é.” (Proverbionan 20:5) Sea alerto pa dicerní e sintimentunan i cuestionnan cu ta scondí bou di comportacion superficial di un persona. Yega di conocé hende mihó.

“No [vigilá] cu interes personal boso mes asuntunan so, sino tambe vigilá cu interes personal asuntu dje otronan.” (Filipensenan 2:4) Sea empático dor di mira un cuestion desde e punto di bista dje otro persona. No sea egoista.

Variedad Cultural den Testigonan di Jehova

Ta ser mirá cu e principionan aki ta eficas den e unidad notabel di Testigonan di Jehova, cu ta activo den 232 tera di mundu. Nan ta un pueblo cu ta bini di “tur nacion i tribu i pueblo i lenga” i cu ta determiná di someté nan n’e guia amoroso di Jehova den tur cos.—Revelacion 7:9; 1 Corintionan 10:31-33.

Testigonan individual no ta despreciá e cultura di otronan. Ni esnan cu ta bira Testigo no ta rechasá e cultura den cua nan a wordu criá, aménos cu e ta na desacuerdo cu e principionan bíblico. Den caso asina, nan ta haci cambio den nan bida. Nan ta reconocé cu den tur cultura tin rasgonan digno di elogio i cu esakinan ta bira asta mas bunita den hende cu ta adoptá e adoracion berdadero.

Nan ta haci esfuerso pa mira nos planeta manera e ta parce na Dios—briyante i blou i bunita—orbitando dor dje espacio. E ta un planeta cu un maraviyoso variedad di pueblo i cultura. Testigonan di Jehova ta anticipá e tempu ora tur hende riba tera lo disfrutá di bida como un famia berdaderamente uní.

[Plachi na página 8]

Testigonan di Jehova a siña con pa eliminá obstáculonan cultural