Kitando Conceptonan Robes Tocante Testigonan di Jehova

MIENTRAS nan tabata participando den nan trabou di cas-pa-cas, dos Testigo di Jehova a topa un homber cu a bisa nan cu e no tabata interesá. E Testigonan a bai trankilamente, pero segun cu nan tabata canando ta bai riba acera, nan a ripará cu e homber tabata sigui nan. “Por fabor, para un ratu!” e homber a grita. “Mi kier pidi dispensa. Mi no sa nada tocante e Testigonan, i mi ta kere cu hopi hende a ser malinformá tocante boso.”

E ora ei e homber a introducí su mes como Renan Dominguez, e presidente di programa dje Club Rotario di Sur San Francisco, California. El a puntra si un Testigo lo kier bin n’e club pa duna un charla tocante e creencia i actividadnan di Testigonan di Jehova. Nan a hinca un programa den otro. E Testigo lo papia pa 30 minuut i despues lo duna chens n’e auditorio pa haci pregunta. Ernest Garrett, un Testigo pa hopi aña den e área di San Francisco, a ser pidí pa duna e presentacion n’e Club Rotario dia 17 di augustus, 1995, i a relatá lo siguiente:

“Mi a pensa i a haci oracion tocante loke lo mi por bisa e miembronan dje Club Rotario kendenan ta hende cu hopi influencia den comunidad i comercio, manera bankero, abogado i dokternan. Mi a haci algun investigacion i a haña sa cu e obhetivo cu Club Rotario tin pretu-riba-blancu ta pa fortalecé e comunidad. Pues mi a presentá e informacion na página 23 dje foyeto Los testigos de Jehová en el siglo veinte, titulá ‘E Balor Práctico dje Bon Nobo den Bo Comunidad.’”a

“Mi a splica cu Testigonan di Jehova ta un influencia den e direccion aki. Tur dia di siman, Testigonan di Jehova ta sali pa bati na porta di nan comunidad. Nan deseo ta pa influenciá nan próhimo pa tin un famia fuerte—i un famia fuerte ta hiba na un comunidad fuerte. Mas individuo i famianan Testigonan di Jehova influenciá pa biba di acuerdo cu principionan cristian, ménos delincuencia, inmoralidad i crímen e comunidad lo tin. E informacion aki a cai den masha bon tera cerca e miembronan, pasobra e tabata na armonia cu e metanan dje Club Rotario.”

“Pakico Boso No Ta Enbolbé den Política?”

“Ora a duna chens pa auditorio haci pregunta, un dje promé preguntanan tabata: ‘Pakico boso no ta enbolbé den política i den gobiernu?’ E cabayero cu a haci e pregunta aki a agregá acerca: ‘Bo mes sa, e Bon Buki ta bisa: “Paga César loke ta pertenecé na César,”’ Mi a bis’é cu nos ta completamente di acuerdo cu e declaracion ei i ta asentí plenamente cuné. Mi a señalá cu e mayoria di hende cu mi a tende cita e texto ei nunca ta cita e otro mitar di dje, cu ta bisa: ‘Paga na Dios e cosnan di Dios.’ (Mateo 22:21) Pues, anto, nos mester concluí cu no ta tur cos ta pertenecé na César. Tin algun cos cu ta pertenecé na Dios. Nos ta haña nos cu e asuntu di busca pa sa loke ta pertenecé na César i loke ta pertenecé na Dios.

“Mi a mustr’é cu ora nan a puntra Jesus, ‘Ta legal pa paga belasting pa cabes na César of no?’ e no a contestá cu un si of un no. El a bisa: ‘Mustrá mi e moneda di belasting pa cabes,’ un denario romano. El a puntra: ‘Di ken e imágen i inscripcion aki ta?’ Nan a bisa: ‘Di César.’ E ora ei el a bisa: ‘P’esei, paga bek e cosnan di César na César.’ (Mateo 22:17-21) Cu otro palabra, paga belasting na César, pasobra nos ta obtené cierto servicionan di César i apropiadamente nos ta paga belasting pa esakinan. Mi a splica cu Testigonan di Jehova ta paga nan belasting i no ta horta gobiernu di loke corectamente ta pertenecé na dje.

“E ora ei mi a declará cu Testigonan di Jehova no ta kere cu nan debe nan bida na César. Nan ta kere cu nan debe nan adoracion na Dios, i corectamente nan ta paga esaki bek na dje. Pues ora nos asumí e posicion aki, no ta nos intencion pa mustra ningun falta di respet pa César. Nos ta obedecé tur e leynan di César, pero ora tin un conflicto, nos cu tur respet ta scoge pa obedecé Dios como gobernante mas bien cu hende. E ora ei e homber cu a haci e pregunta aki a bisa dilanti henter e grupo: ‘Mi no por bai contra esei!’

“Tambe nos tabata por a contestá bastante pregunta tocante nos actividad di predicá. Hopi dje miembronan a acercá mi despues dje reunion i a duna man i a bisa cu nan tabata completamente di acuerdo cu nos—cu e famia ta e fundeshi di un comunidad sano i stabil. E ora ei nos a duna cada miembro e foyeto Los testigos de Jehová en el siglo veinte.

“Despues dje reunion aki e presidente di programa, Sr. Dominguez, a bel mi i a pidí mi si lo mi kier bin na su oficina, ya cu e tabatin mas pregunta pa haci tocante nos creencianan. Nos tabatin un bon combersacion tocante vários texto. Specialmente e tabata kier pa mi splik’é nos posicion tocante sanger. El a remarcá cu e mes lo no tuma un transfusion di sanger, i el a keda asina impresioná cu e informacion cu mi a dun’é for dje foyeto Con sanger por salba bo bida? cu el a invitá mi pa bin bek i papia cu e miembronan dje club riba nos posicion tocante sanger. Ami a invitá un otro Testigo, Don Dahl, pa djoin mi den e programa aki. E ta bishitá hospitalnan pa considerá e asuntu di sanger cu dokternan ora Testigonan tin cu drenta pa haci un operacion. Huntu, nos a splica en detaye con nos ta traha cu dokternan i administracion di hospital pa clarificá nos posicion basá riba Bijbel i pa ofrecé alternativanan exitoso pa transfusion di sanger.”—Levítico 17:10-12; Echonan 15:19-21, 28, 29.

‘Bo Kier Men cu Lo Bo Laga Bo Yu Muri?’

“Despues dje reunion un cabayero a acercá mi i a puntrá mi privadamente: ‘Bo kier men cu lo bo laga bo yu homber muri si e tabata den un accidente i a ser trecé den un sala di emergencia sangrando profusamente?’ Mi a sigur’é cu mi ta compartí su preocupacion, pasobra ami tabatin un yu homber i a perd’é den e explosion di avion riba Lockerbie, Escocia, na 1988. Contestando su pregunta, mi a bis’é promé cu lo mi no kier pa mi yu muri.

“Nos no ta antidokter, antiremedi of antihospital. Nos no ta practicá sanacion di fe. Nos tin mester dje servicionan dje profesion médico. Nos a pone nos confiansa den Dios i tin sigur cu su guia den e asuntu aki di sanger ta pa nos bienestar eterno. Dios ta ser describí den Bijbel como ‘Esun cu ta siñá bo pa beneficiá bo mes, Esun cu ta hací bo stap den e caminda unda bo mester cana.’ (Isaías 48:17) El a duna su Yu e abilidad pa resucitá e mortonan. Jesus a bisa: ‘Ami ta e resureccion i e bida. Esun cu ta ehercé fe den mi, asta si e muri, lo e bolbe na bida; i tur cu ta bibu i ta ehercé fe den mi lo no muri hamas. Abo ta kere esaki?’—Juan 11:25, 26.

“Tur loke nos ta pidi e dokternan pa comprendé ta cu nos posicion ta un asuntu di concenshi i cu nos no por negoshá cuné. Nos no por negoshá cu e asuntu aki, mescos cu nos no por negoshá cu Dios su ley tocante adulterio. Nos no por negoshá cu Dios anto bisa, ‘Dios, no tin ningun circunstancia bou di cua mi por cometé adulterio?’ E ora ei mi a bisa e homber aki: ‘Bo a puntrá mi si lo mi laga mi yu muri dor di nenga un transfusion di sanger. Cu tur respet, lo mi kier a puntrá bo si lo bo laga bo yu muri den servicio militar di cualkier nacion?’ Di biaha el a contestá enfáticamente, ‘Sí! Pasobra esei ta su obligacion!’ Ami a bisa: ‘Lo bo permití bo yu muri pasobra e ta pa un causa cu abo ta kere aden. Permití mi e mésun privilegio cu mi yu.’

“Un resultado interesante di tur esaki ta cu e presidente di programa, Sr. Dominguez, a invitá ami cu mi casá pa cena cuné i su casá. El a haña cu su casá tabata un víctima di malinformacion i conceptonan robes tocante Testigonan di Jehova. E tabatin razon. E casá tabata malinformá. Nos a pasa un anochi ameno, i su casá a haci hopi pregunta tocante nos i nos trabou, i el a permití nos contestá nan en detaye. E dia siguiente Sr. Dominguez a bel i a bisa cu su casá a disfrutá mashá di a cera conocí cu ami i mi casá i a haña cu nos tabata hende masha amabel.

“Mi a sigui bishitá Sr. Dominguez regularmente, i e ta manifestá un interes intenso den Bijbel. El a bisá mi: ‘Lo mi kier animá bo sin falta pa tuma contacto cu e presidentenan di programa di tur e Clubnan Rotario den e área di Greater San Francisco Bay i ofrecé pa duna nan club un charla similar na esun cu bo a duna na nos club. Bo por usa mi nomber como referencia, i ora nan tuma contacto cu mi, cu mil amor lo mi recomendá bo altamente pa ser invitá como orador bishitante.’

“Clubnan Rotario ta internacional. Lo ta posibel pa otro clubnan na Merca i na tur parti di mundu habri nan porta pa presentacionnan duná dor di Testigonan di Jehova?”

[Nota]

[Plachi na página 18]

Sr. Renan Dominguez, na man robes, i Ruman Ernest Garrett