Hóbennan Sa Puntra . . .

Rock Alternativo E Ta Algu pa Mi?

“Mi por identificá mi mes cu e canticanan tocante diferente problema i experencia cu nos, hóbennan, ta topa cuné.” —George di 15 aña.a

“E ta meimei di música pop i heavy metal.”—Dan di 19 aña di edad.

“E ta nobo. E ta diferente. E no ta e música predominante, producí en masa.”—Maria di 17 aña.

ROCK alternativo. Hopi hóben ta gusta scuch’é. E ta molestiá algun adulto. I mayoria mayor probablemente tin poco of ningun idea di loke e ta mes.

Nos tin cu admití cu no ta fácil pa splica exactamente loke rock alternativo ta. Originalmente, e tabata e música di hóbennan cu tabata kier algu diferente, un alternativa riba e música popular predominante cu por tende na radio. Algun hende ta bisa cu tur cos a cuminsá ora cu stacionnan local di radio di colegio a cuminsá duna algun banda musical prácticamente desconocí chens pa bai den aire. Nan tabata gruponan musical cu tabata orguyoso cu nan no a bende nan mes na e industria di música comercial. E gremio nobo di músiconan aki no tabata kier tin nada di haci cu e companianan principal di grabacion ni técnicanan di mercadeo pa influenciá masanan grandi, manera videonan musical. Tambe, nan a canta tocante tópiconan cu rara bes ta ser mencioná den e canticanan di Top 40.

Distinto di música heavy metal i rap, rock alternativo no ta semper fácil pa reconocé of pa categorisá. Asta expertonan den e industria di música no ta di acuerdo cu otro tocante kico rock alternativo ta exactamente. Esei ta pa motibu cu, mescos cu su nomber ta indicá, e ta cubri un variedad amplio di zonido i sintimentu. Un yoncuman a bisa: “Ta masha difícil pa clasifik’é. E ta cubri un espectro amplio dje música di awe.” Un otro persona hóben a ofrecé e splicacion aki: “E no ta semper hard rock ni soft rock, ni lihé ni slow, ni di un ritmo alegre ni melancólico.” Un hóben asta a admití: “Mi no sa si mi por bisa cu mi gusta rock alternativo pasobra mi no sa sigur kico e ta.”

Con cu bai bin, e popularidad di rock alternativo a crece te n’e punto cu hopi di su artistanan mas popular ta ser considerá awor como un parti dje música predominante. Tambe, ta parce cu mayornan ta ménos incliná na tin incumbinencia contra dje compará cu heavy metal i otro rock cu ta bula tambú di orea. Eigenlijk, ta parce cu di tur manera ta poco mayor sa cua gruponan of títulonan di album ta ser yamá alternativo. Asina mes, bo mester tin un poco cuidou ora ta trata di e música aki.

Kico Ta Hacié Atractivo?

Tuma, por ehempel, pakico asina tantu hóben ta ser atraí na e música aki. Pa hopi e ta simplemente un asuntu di gusta loke nan amigunan ta gusta. Tambe e ta duna un base comun pa combersacion i pa actividadnan, manera intercambiá caset i CD.

Sin embargo, pa mayoria hóben loke ta haci rock alternativo asina atractivo ta con e ta zona i su mensahe. En particular, hopi hóben ta haña cu nan por identificá nan mes cu e experencia i sintimentunan dje escritornan di letra. E seri di artículo principal den e revista Time riba e tópico aki a splica: “Miéntras cu canticanan di pop hopi biaha ta tocante amor, e letra di rock alternativo generalmente ta tocante sintimentunan mas fuerte: desesperacion, pasion, confusion. . . . Si bo ta un tiener of tin bint’i picu aña, tin hopi chens cu bo famia a pasa dor di un divorcio. Música alternativo a bira un música emocional, papiando directamente tocante cuestionnan cu no a haña solucion, manera abandono i inhusticia.” P’esei, un disc jockey di colegio, di 21 aña di edad, ta bisa: “El a atraé ami i mi amigunan pasobra nos generacion ta asina indiferente pa cu e mundu. No tin nada ta spera nos ora nos caba scol.”

Algun hóben cristian tambe a bai ta gusta rock alternativo. Naturalmente, mayoria a evitá e canticanan mas ofensivo, mas rebelde, violento of inmoral. Asina mes, algun dje cristiannan hóben aki a bisa cu nan no ta confia e canticanan aparentemente ménos dañino. E hóben Dan a comentá: “Ta conocí cu algun dje cantantenan ta homosexual i lesbi of usadornan di droga, i nan letranan ta reflehá nan estilo di bida.” Un otro hóben cu yama Jack, ta bisa: “Algun dje gruponan musical tin e idea cu ningun hende tin cunes cu nan, cu nan problemanan of e futuro di hóbennan djawe, di manera cu nan ta expresá esaki den nan canticanan. Hopi di nan no tin ningun motivacion of speransa.”

Un Palabra di Cautela

Bijbel ta bisa nos cu “e mundu henter ta drumí den poder dje malbado,” Satanas e Diabel. (1 Juan 5:19) P’esei, e no mester ta un sorpresa pa bo cu música ta un dje medionan cu Satanas ta usa pa engañá hóbennan. Artículonan anterior den e revista aki i su compañero, E Toren di Vigilancia, bes tras bes a demostrá e echo aki.b E spiertamentunan cu a ser duná tocante música heavy metal i rap ta apropiado tambe ora ta trata di rock alternativo. Manera Bijbel ta bis’é: “Esun spiertu ta considerá su pasonan.”—Proverbionan 14:15.

Pa cuminsá, no tin sentido pa sigui e mayoria ora ta trata di bo gustu den música. Tuma nota dje principio bíblico aki, cu por aplicá na laga otronan tuma decisionnan pa bo: “Boso no sa cu si boso ta sigui presentá boso mes na cualkier hende como esclabo pa obedec’é, boso ta esclabo di dje pasobra boso ta obedec’é?” (Romanonan 6:16) Pa un hóben cristian, e cuestion no ta loke ta aceptabel entre esnan di su edad, sino loke ta “aceptabel pa e Señor.” (Efesionan 5:10) Ademas, ki clase di hóben ta ser atraí na rock alternativo? Hóbennan cu ta parce di ta felis, balansá i interesá den cosnan spiritual? Of ta parce manera cu esnan cu ta scuch’é ta principalmente hóbennan malcontentu, infelis of asta rabiá?

Ta cierto cu algun hóben cu personalidadnan alegre i optimista tog por ser atraí na rock alternativo. Pero pensa riba esaki: Cristiannan, hóben i bieu, tin un futuro briyante ta spera nan. (2 Pedro 3:13) Apostel Pablo ta recordá nos con sigur e cumplimentu di Dios su promesanan ta, bisando: “Ta imposibel pa Dios gaña.” (Hebreonan 6:18) Ki sentido tin, anto, pa exponé bo mes na e punto di bista scur i negativo pa cu futuro cu algun cantica di rock alternativo ta expresá? Bira absorbá den música cu ta expresá miedu i desesperacion lo por ruiná bo fe? Ademas, ki efecto scuchamentu constante na música asina lo por tin riba bo punto di bista emocional?

Sea Selectivo

Nos no ta bisando cu tur música clasificá como “alternativo” ta necesariamente dañino of ofensivo. Pero suponé cu bo haña sa cu un hende ta purbando di venená bo. Maske lo bo no stop di come, siguramente lo bo examiná bo cuminda cuidadosamente, no ta asina? Sabiendo cu Satanas ta tratando di venená bo punto di bista i actitud tambe mester hací bo ta cauteloso tocante e música cu bo ta scoge. Manera Bijbel ta bisa, “e orea mes ta pone palabranan na prueba, mescos cu e shel’i boca ta proef ora di come.” (Job 34:3) En bes di sigui e mayoria ciegamente, pone e música cu bo ta gusta na prueba.

Con bo por haci esei? E cuadro titulá “Un Guia pa Selectá Música” tin algun sugerencia útil cu lo bo kier purba. Tambe, purba puntra bo mayornan cristian kico nan ta pensa di bo música. (Proverbionan 4:1) Bo por keda sorprendí cu nan contesta! Claro, bo mayornan ta mas bieu cu bo. Ta di comprendé cu nan no ta compartí bo gustu den música. Pero si bo música ta desagradá nan te n’e punto cu nan ta hañ’é ofensivo, degradante of dañino, lo bo mester ignorá loke nan tin di bisa? Bijbel ta bisa: “Un hende sabí lo scucha i ricibí mas instruccion.”—Proverbionan 1:5.

Considerá con e música ta afectá bo. E ta poné bo sinti rabiá, rebelde of deprimí? Si ta asina, esakinan ta señalnan di spiertamentu cu bo no mag ignorá! Pakico no busca música cu ta relahá of calmá bo, of cu ta alegrá bo?

Tendencianan den música ta cambia constantemente. Promé cu bo sa, un of otro estilo di música lo ta e último moda. Pero no laga e mareanan aki hibá bo cu nan. Mustra dicernimentu i sea selectivo ora ta trata di bo música. Haci sigur cu loke bo ta scucha na dje ta sano i edificante. (Filipensenan 4:8) E ora ei música por ta un parti balioso i agradabel di bo bida!

[Notanan]

[Komentario na página 22]

“Miéntras cu canticanan di pop hopi biaha ta tocante amor, e letra di rock alternativo generalmente ta tocante sintimentunan mas fuerte: desesperacion, pasion, confusion.” —Revista Time

[Kuadro na página 23]

Un Guia pa Selectá Música

◆ Examiná e kaft dje album. Esaki hopi biaha lo bisá bo hopi tocante e música i e músiconan mes. Tene cuidou cu kaftnan di album cu ta presentá violencia, símbolonan demoniaco, forma di bisti i peña masha straño of desnudes riba nan.

◆ Considerá e mensahe dje letranan. Esakinan ta identificá manera di pensa i estilo di bida dje músiconan. Ki ideanan nan kier pa abo aceptá?

◆ Con e música ta zona den su totalidad ta duna indicacion dje manera cu e músiconan lo kier pa abo sinti—melancólico, alegre, desafiante, excitá sexualmente, trankil of desesperá.

◆ Considerá e audiencia general cu ta ser atraí na e grupo musical. Lo bo gusta ser identificá cu e grupo di hende ei i nan actitud?

[Plachi na página 23]

Hopi hóben ta identificá nan mes cu e letra dje canticanan djawe