Beneficiá dje Scol di Ministerio Teocrático pa 1996—Parti 2
1 Djis despues di e inauguracion di e Scol di Ministerio Teocrático na 1943, un dje sucursalnan di Sociedad a informá: “E areglo masha excelente aki a logra den un corto tempu di yuda hopi ruman homber kendenan a pensa cu nan nunca lo por ta orador público di bira masha eficiente riba plataforma i mas eficas den veld.” E scol ta sigui percurá entrenamentu excelente, locual nos tur tin mester.
2 Lesamentu di Bijbel: Esnan cu ta ser duná partinan di orador no ta e úniconan cu ta beneficiá dje scol. En realidad, nos tur tin un asignacion—e lesamentu semanal di Bijbel. E programa di scol ta mustra cua capítulonan di Bijbel mester ser lesá tur siman. Tin hopi recordatorio bíblico cu ta enfatisá e importancia di lesa e Bijbel diariamente. (Hos. 1:8; Sal. 1:2; Echo. 17:11) Lesamentu di Bijbel ta esencial pa bon salú spiritual; e ta nutri e mente i curason. Si nos lesa e Bijbel pa por lo ménos cincu minuut pa dia, nos lo por keda al dia cu e programa di scol pa lesamentu di Bijbel. Na fin dje aña, nos lo a lesa mas cu 150 capítulo dje Palabra di Dios. Si nos tene un Bijbel na man, nos lo por lesa algu di dje tur dia.
3 Discurso di Instruccion: Afin di stimulá e rumannan na sirbishi leal i celoso, e orador cu ta duna e discurso di instruccion mester usa bon métodonan di siñansa, pa transmití comprendimentu i pa edificá aprecio pa Jehova, su Palabra i su organisacion. Ancianonan i sirbidornan ministerial por logra esaki dor di prepará bon, formulando nan discurso rond dje tema, papiando cu conviccion i haciendo e material biba. (Heb. 4:12) Ta importante pa e orador keda den su tempu asigná. E buki “Toda Escritura” ta yen cu textonan bíblico i ta presentá un cantidad di informacion bíblico excitante cu por beneficiá nos spiritualmente. Jehova sa kico nos tin mester, pasobra su pensamentunan ta hopi mas haltu cu nos pensamentunan. Mediante su Scritura inspirá, e ta bisa nos kico ta probechoso pa nos di manera cu nos por ta plenamente ekipá i competente pa e bon trabou di testificá tocante su nomber i Reino. Nos lo ta personanan bendicioná si nos haci caso dje conseho inspirá aki pa sobrebibí e “tempu crítico” aki.
4 Puntonan Sobresaliente di Bijbel: Rumannan cu haña e asignacion aki mester selectá versículonan specífico cu por ser aplicá den un manera práctico p’e beneficio dje congregacion. Esaki ta rekerí pa nan lesa e capítulonan asigná, meditá riba nan i investigá versículonan selectá pa haña puntonan cu lo clarificá e nificacion di e textonan ei. Parti patras dje Watch Tower Publications Index, tin e “Index di Textonan Bíblico,” cu por ta útil pa localisá informacion tocante versículonan specífico di Bijbel. Rumannan na encargo dje parti aki mester ehercé bon huicio i evitá di agregá informacion irelevante. Nan no mester prepará mas material cu por ser cubrí razonablemente den seis minuut.
5 Nos tur por beneficiá dje Scol di Ministerio Teocrático. E por yuda nos mehorá den nos abilidad di papia i di siña otronan. Probechando plenamente di e percuracion aki siguramente lo yuda nos haci “nos progreso ser manifestá na tur hende.”—1 Tim. 4:15.