E Scol di Ministerio Teocrático pa 1998

Ser educá ta nificá “ser siñá of instruí den un conocimentu of técnica specífico.” Mediante e Scol di Ministerio Teocrático, nos ta ser entrená constantemente den e conocimentu di Dios. Tambe, nos participacion den e scol aki ta permití nos desaroyá nos abilidad di papia i di siña otronan. E programa di scol pa 1998 lo duna nos hopi oportunidad pa haci mas progreso spiritual.

Ora bo examiná e programa di scol pa otro aña, lo bo nota cu e buki Felicidad den Famia a ser agregá n’e curículo pa 1998, i Partinan Num. 3 i Num. 4 lo abark’é progresivamente. Ora cu Parti Num. 4 ta basá riba e buki Felicidad den Famia, un ruman homber mester present’é den forma di un discurso n’e congregacion. I, como recordatorio, ningun hende riba e programa di scol mag bai overtime.

Un Rasgo Nobo: Pa nos beneficio personal, tin un “Programa Adicional pa Lesa Bijbel” entre paréntesis cuadrá djis despues dje number di cantica pa cada siman. Aunke ningun parti dje programa semanal di scol ta basá riba dje, hacié bo meta pa siguié. Esaki lo yudá bo haña e custumber di lesa Bijbel tur dia, si bo no ta haciendo esei caba.

Pa mas informacion tocante partinan, conseho i repasonan skirbí, por fabor, lesa cuidadosamente e instruccionnan hañá den e “Programa pa Scol di Ministerio Teocrático pa 1998” i tambe página 3 di Nos Ministerio di Reino di october 1996.

Si bo no ta inscribí ainda den e Scol di Ministerio Teocrático, nos ta invitá bo pa inscribí awor. E scol único aki ta sigui hunga un papel importante den entrená sirbidónan humilde i deboto di Jehova pa bira mihó cualificá como su ministernan.—1 Tim. 4:13-16.