E Scol di Ministerio Teocrático pa 2000
1 E Scol di Ministerio Teocrático a resultá di ta un bendicion ricu pa Jehova su pueblo. Durante e último 50 añanan, el a yuda miyones di ruman desaroyá nan abilidad como orador público i maestro di berdadnan bíblico. (Sal. 145:10-12; Mat. 28:19, 20) Abo por mira con e scol a yuda bo? E por sigui haci esei durante aña 2000 si bo participá plenamente den dje i aplicá e conseho cu ta ser duná.
2 N’e promé página dje programa di scol pa 2000 tin e instruccionnan tocante e partinan i e publicacionnan cu lo usa. E ta trata e tempu asigná pa cada parti, e fuente di informacion, con mester presentá e informacion, i otro detayenan. Por fabor, tuma tempu pa lesa e instruccionnan cu atencion i aplicá nan.
3 Lesamentu Semanal di Bijbel: Den e schedule di scol tin dos programa separá pa lesamentu di Bijbel semanal. Un ta e programa normal di lesamentu cu ta abarcá rond di cincu página di Bijbel. Puntonan sobresaliente di Bijbel ta basá riba e lesamentu aki. E otro programa di lesamentu ta adicional i ta abarcá dos bes mas tantu informacion. Dor di sigui e programa aki, lo bo por lesa henter e Bijbel den tres aña. Ta di comprendé cu algun ruman lo kier lesa mas di loke tin den e programa adicional, i otronan lo no por keda al dia cuné. En bes di compará bo mes cu otronan, alegrá den loke abo por logra. (Gal. 6:4) E cos importante ta pa lesa e Palabra di Dios tur dia.—Sal. 1:1-3.
4 Pa inscribí den e Scol di Ministerio Teocrático, bo mester papia cu e superintendente di scol. Por fabor, tuma bo asignacionnan na serio, i no cancelá nan innecesariamente. Apreciá e scol como un percuracion for di Jehova. Prepará bon, familiarisá bo completamente cu e informacion asigná, i expresá bo mes di curason, i asina saca pleno beneficio for dje scol único aki.