Kon pa Kuminsá Estudio den e Buki Beibel Ta Siña

Hopi di nos lo ta kontentu pa kondusí un estudio di Beibel, klaru, basta nos por logra kumins’é. E buki nobo Kiko Beibel Ta Siña Realmente? por yuda nos. E prólogo na página 3-7 ta prepará pa yuda nos kuminsá un kòmbersashon bíbliko ku e doño di kas usando e buki aki. Asta esnan ku tin poko eksperensia den e ministerio lo ripará ku ta fásil pa kuminsá un estudio.

◼ Kisas bo por purba e método aki, usando página 3:

Despues di menshoná un notisia òf un problema ku ta preokupá hende den bo teritorio, dirigí e doño di kas su atenshon na e preguntanan ku lèter diki na página 3, i invit’é pa komentá riba nan. Despues bai na página 4 i 5.

◼ Òf kisas bo ta preferá di kuminsá dor di resaltá página 4 i 5:

Lo bo por bisa: “Lo ta algu maravioso si e kambionan riba e plachinan aki realmente tuma lugá, no ta bèrdat?” Òf lo bo por puntra: “Kua di e promesanan aki bo tin gana di mira kumpli?” Skucha e kontesta ku atenshon.

Si e doño di kas mustra un interes spesial den un di e tekstonan di Beibel, mustr’é kiko Beibel ta siña tokante e tópiko ei dor di konsiderá e paragrafnan den e buki ku ta trata e teksto ei. (Wak e kuadro riba e página aki di e suplemento.) Konsiderá e informashon manera lo bo hasi na un estudio di Beibel. Bo por hasi esaki na e promé bishita na porta mes, den sinku pa dies minüt.

◼ Un otro método ta pa animá e persona pa ekspresá su mes, usando página 6:

Dirigí e doño di kas su atenshon na e preguntanan abou na e página, i puntr’é: “Bo a yega di hasi bo mes e preguntanan aki?” Si e mustra interes den un di e preguntanan, bai na e paragrafnan den e buki ku ta kontestá e pregunta. (Wak e kuadro riba e página aki di e suplemento.) Segun ku boso ta konsiderá e informashon huntu, bo ta kondusiendo un estudio di Beibel.

◼ Bo por usa página 7 pa krea un oportunidat pa duna un demostrashon di un estudio di Beibel:

Lesa e promé tres frasenan riba e página ei i despues bai na kapítulo 3, i duna un demostrashon di un estudio di Beibel usando paragraf 1-3. Hasi areglo pa bolbe bèk pa konsiderá e kontestanan di e preguntanan den paragraf 3.

◼ Kon pa hasi areglo pa bai bèk:

Na final di e promé seshon di estudio, hasi areglo pa sigui ku e konsiderashon. Bo por djis bisa: “Den un par di minüt nos a haña sa kiko Beibel ta siña tokante un tópiko importante. Otro biaha nos por konsiderá [laga un pregunta ku boso lo konsiderá]. Mi por pasa otro siman na e mesun ora?”

Segun ku nos ta yega mas serka di Yehova su tempu señalá, e ta sigui ekipá nos pa nos por kumpli ku nos trabou. (Mat. 28:19, 20; 2 Tim. 3:17) Laga nos hasi bon uso di e ekselente hèrmènt nobo aki pa kuminsá estudio di Beibel.

[Box on page 3]

Konsiderashon di Tekstonan di Beibel na Página 4-5

◻ Revelashon 21:4 (pág. 27-8 §1-3)

◻ Isaias 33:24; 35:5, 6 (pág. 36 §22)

◻ Juan 5:28, 29 (pág. 72-3 §17-19)

◻ Salmo 72:16 (pág. 34 §19)

Kontesta pa Preguntanan na Página 6

◻ Dikon nos ta sufri? (pág. 108-9 §6-8)

◻ Kon nos por trata ku e preokupashonnan di bida? (pág. 184-5 §1-3)

◻ Kon nos por hasi nos bida di famia mas felis? (pág. 143 §20)

◻ Kiko ta pasa ku nos ora nos muri? (pág. 58-9 §5-6)

◻ Nos lo bolbe mira nos defuntunan stimá un dia? (pág. 72-3 §17-19)

◻ Kon nos por ta sigur ku Dios lo kumpli ku su promesanan pa futuro? (pág. 25 §17)