Lo Duna un Tremendo Testimonio
1. Fuera di e diskurso, kiko mas lo por impreshoná e bishitantenan ku bin Memorial? Splika.
1 Ki dia lo duna esei? Riba e anochi di Memorial. Nos a hasi hopi esfuerso pa invitá hende pa bin Memorial. Loke e bishitantenan skucha no ta e úniko kos ku lo impreshoná nan. Despues ku un señora a asistí na Memorial, el a komentá riba loke el a mira: tur hende tabata amigabel i e edifisio, ku boluntarionan a traha i mantené, tabata limpi i bunita. P’esei, no e oradó so, sino nos tur ta duna un testimonio na e okashon akí, ku ta esun mas importante di aña.—Efe. 4:16.
2. Kon kada un di nos por duna un testimonio na e bishitantenan?
2 Saludá e Bishitantenan Kalurosamente: Nos sonrisa i saludo amigabel lo duna un bon testimonio na e bishitantenan. (Juan 13:35) Maske bo no por para papia ku tur hende, kisas bo por hasi esfuerso pa sera konosí ku e hendenan rònt di bo. (Heb. 13:1, 2) Wak si bo ta mira bishitantenan ku kisas no konosé niun hende. Muy probablemente nan a risibí un invitashon durante e kampaña. Lo bo por puntra e persona, “Ta promé biaha bo ta bini?” Bo por ofres’é pa sinta banda di bo i ku si e tin kualke pregunta gustosamente lo bo kontestá esei. Si bo kongregashon mester sali mesora pa e siguiente kongregashon por reuní, bo por bis’é: “Mi tin gana di sa kon bo a haña Memorial. Tin un manera ku mi por tuma kontakto ku bo?”
3. Kiko nos por hasi pa esnan inaktivo sinti nan kómodo?
3 Risibí Esnan Inaktivo Gustosamente: Sin duda, lo tin publikadónan inaktivo presente, inkluso esnan ku ta asistí solamente ora tin Memorial. Yama nan bon biní, anto laga nan sa ku bo ta kontentu di mira nan. (Rom. 15:7) Despues di Memorial, ansianonan por bishitá nan na kas pa animá nan pa sigui bin reunion. Nos ta deseá di henter nos kurason pa esnan ku asistí sinti nan motivá pa duna gloria na Dios, no djis debí na loke nan skucha sino tambe debí na loke nan mira ‘pa medio di nos bon obranan ku nan ta opservá.’—1 Ped. 2:12.