‘Ku Dios Su Boluntat Sosodé’

1. Kiko ta e tema di e dia spesial di asamblea pa e aña di sirbishi 2012, i dikon ta na su lugá pa trata e tópiko akí?

¹ Nos a ser kreá pasobra esei tabata e boluntat di Yehova. (Rev. 4:⁠11) P’esei, nos mester siña i hasi e boluntat di Dios pa nos por kumpli ku e berdadero propósito di nos eksistensia. Pero esei no ta fásil, pasobra nos tin ku lucha kontra e tendensia humano di kumpli “ku e deseonan di karni i di mente” òf di hasi e “boluntat dje nashonnan.” (Efe. 2:⁠3; 1 Ped. 4:⁠3, NW; 2 Ped. 2:⁠10) P’esei, sin e yudansa di Dios, nos ta kore peliger di kai den e trampa di Diabel, den kual e ta ‘tene nos prezu pa hasi su boluntat.’ (2 Tim. 2:⁠26) Nos programa pa e dia spesial di asamblea pa e aña di sirbishi 2012 lo yuda nos aktua na armonia ku e di tres petishon den e orashon modelo, esta, “ku bo boluntat sosodé.”​—⁠Mat. 6:​9, 10.

2. Ki pregunta lo haña kontesta durante e programa di dia spesial di asamblea?

² Preguntanan Ku Lo Haña Kontesta: Segun ku bo ta skucha e programa di asamblea, purba haña kontesta pa e siguiente preguntanan: Kiko ta un otro kos importante ku nos mester hasi fuera di tende Dios su Palabra? Kon nos por sigui diserní loke ta Dios su boluntat pa nos? Dikon nos mester ta dispuesto pa yuda tur klase di hende? Kon nos por tin un bida produktivo ku ta duna satisfakshon? Hóbennan, kiko boso tin ku demostrá pa ku Yehova? Ki rekompensa nos ta haña ora nos ta hasi Dios su boluntat? Dikon ta importante awor pa nos edifiká i enkurashá otro hende?

3. Kon nos por benefisiá plenamente di e programa di e dia spesial di asamblea?

³ Hasi esfuerso pa bo por ta presente i presta bon atenshon na e programa. Probablemente un representante di Bètel òf un superintendente biahero lo ta e oradó bishitante. Sinti bo liber pa papia kuné i ku su esposa (si e ta kasá) promé òf despues di e programa. Pa bo no bira “un tendedó lubidadó,” ora bo yega kas, repasá e programa huntu ku bo famia i konsiderá kon bo por aktua mas i mas na armonia ku e boluntat di Dios.​—⁠Sant. 1:⁠25.

4. Dikon ta importante pa nos pone hasimentu di Dios su boluntat na promé lugá den nos bida?

⁴ Pronto esnan ku ta sigui tras di nan propio deseo i ku ta nenga di someté nan mes na e boluntat di Yehova lo ser destruí. (1 Juan 2:⁠17) P’esei, nos ta gradisidu na Yehova ku el a prepará e informashon oportuno akí pa yuda nos pone hasimentu di Su boluntat na promé lugá den nos bida.