Wak pa Bo Gòlpinan Ta Bon Dirigí
1. Kon e palabranan di 1 Korintionan 9:26 ta apliká na nos trabou di prediká?
1 Apòstel Pablo a skirbi: “E forma ku mi ta kore no ta manera kos ku mi no sa unda mi ta bai; e manera ku mi ta dirigí mi gòlpinan no ta pa dal den bashí.” (1 Kor. 9:26) Ku e palabranan akí, Pablo a indiká ku su mente tabata fihá riba metanan spiritual. E no a laga nada distraé. Ma loke Pablo a bisa ta apliká tambe na nos trabou di prediká. Nos lo haña mihó resultado den sirbishi ora nos “gòlpinan,” òf esfuersonan, ta bon dirigí. Kon nos por logra esaki?
2. Kon nos por imitá Pablo i su kompañeronan di promé siglo ora di skohe sitionan i momentonan pa prediká?
2 Bai Kaminda Tin Hende: Pablo i su kompañeronan di promé siglo a bai kaminda nan a ferwagt di haña hende. (Echo. 5:42; 16:13; 17:17) Pues si mayoria di hende den nos teritorio ta na kas parti atardi, esaki lo ta e mihó momento pa bai di kas pa kas. Tin mas tantu hende mainta trempan i atardi lat ta para warda bùs na bòrchi òf trein na stashon? Ki ora nos ta haña mas hende den e áreanan komersial den teritorio? Si nos prediká riba kaya na e momentonan ei, nos lo haña mihó resultado.
3. Kon e forma ku nos ta traha nos teritorio ta mustra ku nos gòlpinan ta bon dirigí?
3 Traha e Teritorio Bon: E forma ku nos ta traha nos teritorio tambe ta mustra si nos ta dirigiendo nos gòlpinan bon. Por ehèmpel, na lugá di bai ku un grupo grandi den e mesun área, lokual ta eksigí hopi tempu i esfuerso pa organisá i dirigí, lo ta sabí pa splet e grupo. Meskos ta konta tambe ora nos ta bai traha teritorio di kunuku. Si e grupo ta chikitu, nos lo traha e teritorio mas lihé i lo haña mas oportunidat di prediká. Otro kos ku nos por hasi ta di pidi pa haña un teritorio personal banda di nos kas i asina redusí e tempu pa yega teritorio.
4. Kon nos por bira bon “piskadó di hende”?
4 Hesus a kompará su disipelnan ku “piskadó di hende.” (Mar. 1:17) Meta di un piskadó ta pa kue piská, no djis tira liña. P’esei, un bon piskadó ta bai na e sitio i momento ku e sa ku tin piská i ta kuminsá piska mesora. Sí, e ta perkurá pa su esfuersonan ta bon dirigí. Laga nos tambe mustra e mesun diligensia den nos trabou di prediká.—Heb. 6:11.