Kon pa Mehorá Nos Sirbishi: Hasi un Anotashon di e Hendenan Ku A Mustra Interes

Apòstel Pablo a duna Timoteo e siguiente konseho inspirá: “Presta atenshon konstantemente na bo mes i na e siñansa ku bo ta duna.” (1 Tim. 4:16) E palabranan ei ta indiká ku, sea nos tin tiki òf hopi eksperensia, nos tur mester hasi esfuerso pa mehorá. Pa yuda nos den esaki, Nos Ministerio di Reino ta presentá un seri nobo titulá: “Kon pa Mehorá Nos Sirbishi.” Kada artíkulo ta analisá un aspekto importante di nos sirbishi i ta ofresé sugerensia ku por yuda nos mehorá den e aspekto ei. Den e luna ku e artíkulo ta aparesé, ta bon pa nos duna mas atenshon na e aspekto ei den sirbishi. Den un parti di e Reunion di Sirbishi di e siguiente luna, nos lo haña oportunidat pa komentá tokante kon e sugerensianan a mehorá nos sirbishi. Pa e luna akí nos ta ser animá pa hasi un anotashon di e hendenan ku a mustra interes.

Dikon e Ta Importante: Nos trabou di prediká ta enserá mas ku djis duna un sermon. Nos mester bolbe serka e hendenan ku a mustra interes i siña nan e bèrdat; asina nos ta muha e simianan ku nos a planta. (Mat. 28:19, 20; 1 Kor. 3:6-9) Pues nos meta mester ta pa bolbe bishitá e persona, papia tokante e kosnan ku ta interes’é i sigui amplia riba e último kòmbersashon. Pa logra esakinan, ta importante pa nos hasi un anotashon di e hendenan ku a mustra interes.