Bai Bèk Serka Tur Esnan Ku Mustra Sierto Interes
1 Hopi di nos ta den e bèrdat awe pasobra un persona a tuma nota di nos reakshon faborabel riba e mensahe di Reino, i ku pasenshi el a bolbe—kisas vários biaha—pa kultivá e interes ei. Di mes manera, nos tambe mester hasi sigur di bai bèk serka tur esnan ku mustra sierto interes. De echo, hasimentu di rebishitá ta parti di nos trabou di ‘hasi disipel.’—Mat. 28:19, 20.
2 Diserní si e Persona Tin Interes: Asta si un persona no aseptá literatura, su ekspreshon di kara, su tono di bos òf su eskoho di palabra lo por revelá ku e tin sierto interes den e mensahe di Reino. I a base di esei, nos lo por hasi un rebishita. Un ruman hòmber a bishitá un persona sinku siman tras di otro sin por a laga literatura serka dje. Na e di seis bishita, e persona a aseptá literatura i ku tempu un estudio di Beibel a kuminsá.
3 Si bo ripará ku e persona tin interes, bai bèk mesora, podisé un par di dia despues. No duna “e malbado” oportunidat pa ranka loke bo a planta den e persona su kurason. (Mat. 13:19) Si bo a hasi areglo pa bai bèk na un ora spesífiko, hasi sigur di tene bo na bo palabra.—Mat. 5:37.
4 Predikando Riba Kaya: Bo ta hasi esfuerso pa kultivá e interes di e personanan ku bo ta haña miéntras bo ta prediká riba kaya òf ora bo ta duna testimonio informal? Na final di bo kòmbersashon lo bo por bisa: “Mi a disfrutá di nos kòmbersashon. Unda mi por haña bo pa nos por sigui kòmbersá?” Ora ta apropiá, algun publikadó por disidí di duna e persona interesá nan number di telefòn òf nan ta puntr’é si nan por interkambiá number di telefòn. Si regularmente hende ta mira bo riba kaya na e mesun sitio, kisas nan no ta vasilá pa duna bo nan number di telefòn òf adrès. Asta si nan no ke bisa bo kon pa haña kontakto ku nan, tòg bo por sigui purba kultivá nan interes e siguiente biaha ku bo topa nan riba kaya.
5 Nos ta sinti un goso ora nos mira kon mata ku nos a muha i kultivá ta floria. E mesun goso ei nos por sinti ora nos ta hasi rebishita i yuda e personanan progresá spiritualmente. (1 Kor. 3:6) Pone komo meta pa bai bèk serka tur esnan ku mustra sierto interes.